عام

حكايه تخوف ج٢

بصيلى ببتسامه رخمه زيه وقال : فاهم  انتى قولتى الى فيه الكفايه بس انا مستنى الفعل

وبعدها سابنى ومشى وانا طلعت على بيتى وانا مقرره لو اطربقت الدنيا مليش دعوه بحد .وبعدها عدت يدوبك ايام واللى كنت حاسبه حسابه حصل . الحرايق بقت كل يوم فى بيت فى البلد وبقت الناس تشوف حاجات غريبه ماتخطرش عالبال وبقت بلدنا سيره تتحاكه بيها البلاد اللى جمبنا وانا بقيت ابص وانا  ساكته . انا خدت عهد على نفسى ماليش دعوه بحد لحد اما جه اليوم دا اللى كنت راجعه فيه من السوق ولمحت ” زاهر ” واقف فى الشارع بصراحه لسانى ماطاوعنيش ارمى عليه السلام .  لأنى مكنتش طايقه اشوفه ومشيت على طول لكن هو وقفنى لما لاقيته بيقول :  طب ارمى السلام لربنا

وقفت وخدت نفس قبل مااقوله :’ السلام عليكم يا” زاهر”

وبعدها لقيته قدامى وهو بيقول

– انا عارف انك مش طايقانى بس انتى عارفه غلاوتك من غلاوة خواتى البنات ياام ” مروان ” ويعز عليا جفاكى معايا .

كان بيتكلم وانا ببصلوا و مستغربه من هيئته الغريبه الواد حاله اتبدل دقنه طولت وهدومه بقت مبهدله ماكنتش منتبهه لكلامه. اللى اول ماخلصه روحت سالاه : انت مالك يا” زاهر” ايه اللى بهدلك كده ؟

ولما لقيته سكت وعينه بقت فى الارض مقدرتش اسكت وانا بقوله : واضح كده انك  دلوقتى بس عرفت  انك بتجرى ورا سراب ومابيها غير اذية الناس عالفاضى

اتكلم بعدبها وقال : انا تعبت اوى كل يوم حفر وقرايه وبعدها اشوف واسمع بحاجات تشيب واصبر نفسى ومافيش اى نتيجه  ومش عارف افك من ” مسعود” ولا” رضوان” ولا اخلص نفسى وانا كل ليله بتتظر نتيجه مش عارف هاتظهر ولا لأ

روحت انا مكمله : انت حر يازاهر بس انا بنبهك انك مش بس بتأذى نفسك بس. البلد كلها مأذيه من عمايلكم يا” زاهر ” والجن اللى مش عارفين تسيطروا عليهم وانت وضميرك بقى عن اذنك

سيبتوا وروحت بيتى وانا بتمنى رجوع ” زاهر ” لعقله وبدعى ربنا يصلحلوا حاله لكن متمش ساعتين ولقيت التليفون رن برقم غريب برد لقيت اللى بيقولى

– انا مش حذرتك يارحمه وهددتك قبل كده . بتدخلى تانى ليه ها

عرفت على طول انه ” مسعود ”  فرديت وقولت : وبعدين معاك ياجدع انت هى غنيوه مانا كافيه خيرى شرى ومليش دعوه بحد فيكوا هى بلاوى وبتتحدف عليا وخلاص

رد وهو بيصرخ فى التليفون : ولما تسلطى ” زاهر ” ويجى يقلب علينا الطرابيزه وعايزنا نوقف دلوقتى اللى احنا بنعمله واحنا خلاص قربنا نوصل  دا مايبقاش تدخل

ابتديت احس بالخوف ساعتها وانا بقول : ياسيدى انا مالى ومال اللى بيحصل ما بينكم انا لاسلطت “زاهر “ولا اتكلمت معاه

رد بنفس الصريخ : بقولك ايه ” رضوان ” شافك وانتى بتتكلمى معاه قبل مايجى ويتخانق معانا

انا ساعتها سكت ومعرفتش ارد واقول ايه

هو ماستناش كتير بعدها وقال بصوت واطى بس يسيب المفاصل  :  انا ” زاهر ” اكد عليا انى مأذيكيش وانا مش هازعله بس بقى انا مليش دعوه بالقضاء والقدر

انا ساعتها اتكلمت وانا بترعش وقولت له : انت تقصد ايه بكلامك ؟

رد هو : بقولك ايه يارحمه ماتدخلى البلكونه كده وبصى عالشارع

اناجريت وانا مفزوعه على البلكونه بصيت لقيته فى واقف من بعيد وهو بيتكلم فى التليفون وبيشولى بدماغه عشان ابص على اخر الشارع

سهقت لما شوفت ” نور ” وهى جايا عليا من اخر الشارع  وبتشاورلى بايدها روحت سيبتها وبصيت عليه وانا بقوله وانا بترعش

– ان تقصد ايه مالها ” نور” انت هاتعمل ايه ؟

كان بيبص بعنيه وماردش وانا عينه عليه مره وعلى” نور” مره

قلبى وقع فى رجلى وانا بقوله : اوعى يكون هاتئ…

مكملتش جملتى لما لقيت عربيه طلعت من الهوى وهى بتجرى بسرعه فظيعه وبتخبط “نور” تطيرها من مكانها وبتحدفها ال

ناحيه التانيه …

.. يتبع

جسمى كان بيرجف وانا بحاول اسيطر على صوتى فى العياط ومش قادره اوقف بكا وانا قاعده مستنيه مع الناس اللى جم معايا من اهل البلد خروجها من العمليات . كل ماافتكر منظرها وهى العربيه بتخبطها بقسوه ولا منظرها والدم مغرقها انا مش عارفه قدرت ازاى اوصل  عندها انا بقيت بس حاسه بصوتى اللى انجرح من كتر الصريخ وانا بجرى زى المجنونه فى الشارع .  بقيت ادعى على نفسى واللعن غبائى اللى خلى واحده بريئه تدفع التمن . صعب  عليا اخويا اوى لما لقيته فجأه وصل عندى وخدنى فى حضنه عشان يطمنى ويطمن نفسه ولما سألته عن مراته قالى انها مستحملتش الخبر ووقعت من طولها وهو اضطر يسيبها فى البيت ويجى لوحده يشوف بنته .انا اول ما سمعت كلامه ده زود الحرقه جوايا وبقيت اشهق بصوت عالى من العياط وهو يطبطب عليا و يهدى فيا على الرغم ان هو اللى يستحق الطبطبه بس اخويا عنده ايمان قوى ومتماسك  . الحاجه الوحيده اللى خلتنى اوقف وابطل عياط هى لما سمعت صوت ” زاهر ” بمجرد ماسمعته بصيتلوا بنظره كلها كره وغل مشاعر الكره جوايا ناحيته غطت على اى مشاعر تانيه . وبقيت شايفاه قدامى هو السبب بغبائه فى اللى حصل ل” نور” كان نفسى اطرده اشتمه اولع فيه اعمل اى حاجه تطفى   بس اللى كان مانعنى انى مش عايزه  اخويا ولا الناس اللى جم معانا من اهل البلد ياخدوا بالهم . لكن اللى فوقنى من سرحانى صوت ” منذر” خطيبها وهو  بيزعق بعصبيه بعد ماوصل المستشفى  عشان محدش بلغه بالحادثه من اول ما حصلت . انا عن نفسى ماكنتش قادره انطق بحرف لكن الشباب قاموا بالمهمه دى وفضلوا يهدوه . الله يكون فى عونه هو كمان   . ماعداش وقت كتير والدكتور خرج من اوضة العمليات يبلغنا بحالتها وحجم الكسور اللى فى جسمها وانهم نقلوها اوضه للعنايه المركزه على ماحالتها تستقر وطبعا حرج علينا عدم الدخول عندها بس بعد الحاح شديد مننا سمح لنا بالدخول فرد واحد وبعدها فرد تانى .  دخل ابوها الاول يشوفها ويطمن عليها . و دخلت انا بعده . وانا بوعد نفسى انى  ماانهارش وقوى قلبى وفعلا على قد ماانا قلبى وجعنى  عليها لكنى كنت بطمن نفسى بشفاها لانى عارفاها قويه  . بس برضوا كنت حاسه كأنى فى كابوس ونفسى اصحى منه على قد ماانا فرحت ان ربنا نجاها على قد ما قلبى اتحرق على اللى حصلها ولا فرحتها اللى اتأجلت . وربنا العالم هتستمر خطوبتها ولا لأ

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى