عام

عروسة سلفى 1

عروسة سلفي جاية تفرش شقتها، وأنا من الصبح وأنا بجري عشان أكرم أهلها وأصحابها، لكن وأنا طالعة أقدم الأكل، حصل موقف خلاني أسيب كل حاجة وأطلع شقتي!

اليوم ده كان عزال عروسة سلفي، وأهلها وأصحابها كانوا جايين يفرشوا الشقة ويقضوا اليوم معاها.

من بدري وأنا قلت لازم أعمل واجبي، ونزلت اشتريت اتنين كرتونة بيبسي، ورصيتهم في التلاجة عشان يسقعوا، وعملت عصير فراولة ومانجا، وجهزت مكعبات التلج، وكل حاجة خليتها جاهزة في شقتي.

بعدها نزلت عند حماتي أسألها ونشارك بعض الرأي في الأكل.

قلت لها:
يا ماما، هنأكل الناس إيه؟

قالت بمنتهى البساطة:
هنجيب فسيخ ونشتري عيش وسلطة.

بصيت لها وقلت:
لا طبعًا يا ماما، مينفعش خالص! دي عروسة وأهلها جايين يفرشوا الشقة، هنجيب فسيخ ونخلي ريحته تملى المكان؟

ضحكت وقالت:
وماله يا بنتي؟ نرتاح ونقعد ونفرح بالعريس.

قلت لها:
لا يا ماما، الناس ممكن تتكلم على أهل البيت لو الأكل معجبهمش، وأنا عايزة اليوم يعدي على خير.

وكان سلفي جوه، فقلت له:
إيدك على ألفين جنيه، أجيب أكل للناس وأشرفك، ولو اتبقى فلوس هرجعهالك.

اداني الفلوس، وراح جاب ست فرخات، وكيلو ونص مفروم، وجلاش، ومكرونة أقلام.

وأنا بدأت الشغل بقى… غسلت الفراخ وتبلتها، وحطيت عليها أكياس تلج عشان تفضل كويسة، وعصجت المفروم، وبدأت أجهز الجلاش والمكرونة.

وسط الزحمة افتكرت إني نسيت اللبن! بعت العريس يجيبه، ولما رجع كملت البشاميل، ودخلت الجلاش والبشاميل الفرن.

الفراخ كمان رصيتها في الصواني، وطلعت بيها فرن البوتجاز بتاعي فوق. كنت بجري من حاجة لحاجة، ومش حاسة بالوقت أصلًا.

ولما العصر كان بيأذن، كنت خلصت كل حاجة.

العريس طلع وقال إنهم استأذنوا يطلعوا الأكل.

قدمت الكانزات، وبدأت أطلع الأكل وأرتبه.

وبعدها قلت:
أنا هطلع براد الشاي.

وأنا نازلة على السلم بين الدورين، رجلي وقفت مكانها، وصوت عالي جاي من باب الشقة الموارب خلاني أتوقف.

سمعت عمة العروسة بتتكلم مع أمها بصوت مليان سخرية وتقول:

شفتي سلفتها وهي طالعة بالأكل؟ إيه ده، هي طالعة لنا بالشكل ده ليه؟ ولا ريحتها بقت كلها بصل وفراخ، كانت غيرت هدومها حتى بدل ما نتعب من منظرها ده!

اتضايقت جدًا، لكن اللي وجعني أكتر كان رد أم العروسة وهي بتضحك وتقول:

خلاص يا أختي، اعتبري هديتها من بنتي في الصباحية إزازة بادي سبلاش وبرفيوم ومزيل عرق، عشان نساعدها تغير ريحتها!

وضحكوا هما الاتنين.

رجلي اتجمدت على السلم، ونفسي اتقطع، والبراد في إيدي كاد يقع.

في ثانية واحدة كل التعب والخدمة والوقفة من الصبح اختفوا من قدامي.

فضلت واقفة على السلم، إيدي اللي ماسكة صينية البراد والكوبايات بتترعش، والضحك الساخر اللي جوه لسه بيرن في وداني.

ريحة بصل وفراخ؟ وبرفيوم ومزيل عرق هدية صباحية؟

حسيت بقهر شديد، خصوصًا وأنا اللي واقفة من تمانية الصبح قدام البوتاجاز عشان أطلع أكل يشرفهم.

أنا اللي طلعت ونزلت على السلم عشان أوفر عليهم التعب وأخليهم يقعدوا مرتاحين.

بدل ما يدعولي بكلمة حلوة تشيل عني التعب، كانوا بيتكلموا عن شكلي وطريقتي بعد كل اللي عملته!

بصيت على الصينية اللي في إيدي، الشاي اللي لسه طالع دخانه وريحته نعناع بلدي، والسكرية المرصوصة بذوق.

حسيت إني لو خطيت خطوة واحدة ودخلت بالصينية دي، هكون بتنازل عن كرامتي قدامهم.

لفيت ضهري في ثانية واحدة.

طلعت السلم خطوتين بخطوتين، من غير ما أعمل أي صوت، ودخلت شقتي وقفلت الباب ورايا.

حطيت الصينية على ترابيزة الصالة، وفي اللحظة دي دموعي نزلت غصب عني.

قعدت على أقرب كرسي وأنا باخد نفسي، وبصيت على إيدي لقيتها حمرا ومتعبة من صواني الفرن، وضوافري اللي اتبهدلت من تقشير البصل وتقطيع الفراخ، والعباية اللي لابساها مبلولة ومتبقعة من غسيل المواعين وصلصة البشاميل.

كل ده عشان مين؟

عشان عروسة لسه مدخلتش العيلة، وأهل شايفين نفسهم فوق الناس، وأنا اللي عملت كل ده بحسن نية وفي الآخر اتقابلت بكلام وجعني.

مسحت دموعي وقلت في سري:

والله ما هعديها بالطريقة دي. مش هسكت، بس مش هعمل مشكلة ولا هقلل من نفسي. هخليهم يعرفوا إن اللي عملته كان من باب الجدعنة والاحترام، مش عشان أقبل أي كلام جارح.

قمت من مكاني، ودخلت أوضة النوم، وفتحت الدولاب.

طلعت أحلى طقم عندي، دريس خروج شيك جدًا لونه كحلي ستان في شيفون، قماشته ناعمة وبتلمع، كنت جايباه لمناسبة قريبة ولسه ملبستوش غير مرة واحدة.

وطلعت طرحة حرير كشمير تليق عليه.

دخلت الحمام، غيرت العباية، واستحميت واهتميت بنفسي، كأني بغسل كل ذرة تعب وإهانة عدت عليا في الساعات اللي فاتت.

خرجت، قعدت قدام التسريحة، حطيت كريماتي، ورشيت من أغلى إزازة برفيوم عندي.

مسكت السيشوار نشفت شعري ورفعته، وبدأت أحط ميك أب ناعم وشيك جدًا، كحل يبرز عيني، وروج هادي، ورسمت حواجبي بتركيز شديد.

لبست الدريس، ولبست ساعتي الفضية، والخواتم والغوايش بتاعتي، ولفيت الطرحة بلفة مظبوطة وراقية.

بصيت لنفسي في المراية، لقيت واحدة تانية خالص.

ست شيك، ملامحها مرتاحة، ريحتها جميلة، ولا باين عليها إنها كانت من نص ساعة بس في المطبخ وسط الأكل والدخان.

وأنا بحط اللمسات الأخيرة، سمعت خبط على باب الشقة.

تجاهلت الخبط ثواني، وبعدها الصوت زاد، وصوت سلفي العريس كان واضح من ورا الباب:

يا أم هنا! يا مرات أخويا! إنتي فين؟ الناس مستنيين الشاي من بدري، وماما بتسأل عليكي تحت!

مشيت بكل هدوء وثبات، وفتحت الباب نص فتحة، وبصيت له بابتسامة هادية.

سلفي أول ما شافني اتفاجئ، ورجع خطوة لورا، وفضل يبصلي من فوق لتحت مش مستوعب التغيير المفاجئ ده.

وقال بتلعثم:

إيه ده يا نورهان؟ إنتي لابسة كده ورايحة فين؟ والشاي فين؟ إحنا بندور عليكي تحت، والناس خلصت أكل ومستنية الشاي، والعصير والبيبسي اللي فوق خلصوا!

رديت بنبرة هادية:

يا أحمد، مش رايحة في حتة، بس تعبت وحسيت إني محتاجة أرتاح وأغير هدومي عشان ما أضايقش حد.

وبالنسبة للشاي والأكل، عندك الصينية أهي على الترابيزة، ادخل شيلها ونزلها لضيوفك بنفسك.

أحمد وشه اتغير وملامحه اتلخبطت، وقال باستغراب:

ريحـتك؟ مين اللي قال كده بس يا أم هنا؟ ده الأكل طالع ممتاز والكل بيشكر فيه، والبشاميل عجبهم جدًا! تعالي بس انزلي اقعدي معاهم، حماتي وعمتها بيسألوا عليكي وعايزين يسلموا عليكي.

ابتسمت وقلت:

لا يا حبيبي، سلم لي عليهم كتير، وقولهم العفو. هما عملوا الواجب وزيادة من قبل حتى ما يسلموا.

شيل الصينية يا أحمد وانزل، وأنا شقتي مفتوحة لو جوزي جه ولا حاجة.

وقبل ما ينطق بحرف، دخل شال الصينية ونزل وهو بيبصلي بنظرات كلها علامات استفهام، كأنه حاسس إن في حاجة حصلت بس مش عارف تفاصيلها.

قفلت الباب، وقعدت في الصالة، وحطيت رجل على رجل.

مفيش خمس دقايق، ولقيت الباب بيخبط بقوة، وصوت حماتي العالي بيرن في المدخل:

يا نورهان! افتحي يا بنتي الباب.. هو في إيه بالظبط؟

قمت فتحت الباب بهدوء.

لقيت حماتي داخلة وهي متضايقة، وبصتلي من فوق لتحت وقالت:

إيه اللي انتي عملتيه ده يا نورهان؟! العريس نازل بالصينية ووشه متغير وساكت، وانتي غيرتي هدومك وقاعدة هنا ولا على بالك؟!

هو ده الواجب اللي قعدتي تقوليلي عليه الصبح؟ الناس تحت، وأهل العروسة قاعدين ومستنيين مرات الأخ الكبيرة تقعد تصب الشاي وتضايفهم، وانتي حابسة نفسك فوق؟

بصيت لحماتي بعين ثابتة، وكنت بحاول أظبط صوتي عشان ما أزعقش.

قلت لها بهدوء:

أنا عملت واجبي وزيادة يا ماما.

اشتريت، وجهزت، ووقفت في المطبخ، وطبخت لستة وعشرين نفر، وطلعت الأكل سخن وسيرفيس يشرف.

لحد هنا وواجبي انتهى وزيادة.

حماتي اتعصبت وقالت:

ولما انتي ست العارفين والواجب، مالك اتضايقتي كده فجأة؟ في واحدة عاقلة تسيب الضيوف في نص العزومة وتطلع تتزوق وتقعد في شقتها؟

الناس تحت عمالة تبص لبعض ومستغربين، وعمتها بتسأل هي سلفتها اتأخرت ليه؟ كنا عايزين نشكرها، وانتي قاعدة هنا!

ضحكت بمرارة، وقربت منها خطوة وقلت:

عمتها؟ عمتها دي يا ماما اللي قالت لأم العروسة على السلم:

شفتي سلفتها وهي طالعة بالأكل؟ شكلها متعب وريحتهـا بقت بصل وفراخ، كان المفروض تغير هدومها.

وأم العروسة اللي ضحكت وقالت:

اعتبري هديتها في الصباحية إزازة بادي سبلاش وبرفيوم ومزيل عرق عشان نساعدها تغير ريحتها.

هما دول اللي انتي زعلانة عشان منزلتش أصب لهم الشاي؟

حماتي سكتت فجأة.

ملامحها اتغيرت، وبقت مش عارفة تقول إيه.

وبعد لحظات بدأت تحاول تهدي الموقف:

إحم.. يا بنتي، تلاقيكي سمعتي غلط. هما ميعرفوكيش أصلاً عشان يقولوا كده، تلاقيهم كانوا بيتكلموا عن حد تاني وانتي فهمتي الكلام عليكي.

وبعدين انتي مش عارفة إن الناس في العزال بيبقوا تعبانين وبيهزروا أي كلام؟ كبري عقلك وعديها، عشان خاطر أحمد وعشان اليوم يعدي على خير.

قلت لها بصوت ثابت:

أعديها؟ أعدي إهانتي في بيتي وعلى الأكل اللي أنا عملته؟

أنا لا سمعت غلط، ولا هتجاهل الكلام.

الكلام كان عليا، ولو هما شايفين إن خدمتي ليهم مش عاجباهم، يبقى مفيش داعي إني أنزل وأكون موجودة وسط كلام يضايقني.

حماتي حسيت إن مفيش فايدة من الكلام معايا، ونبرة صوتها اتحولت للحدة:

يعني إيه يا نورهان؟ هتفضلي هنا؟! وجوزك لما يرجع من الشغل ويلاقي مراته قاطعة مع أهل عروسة أخوه من أول يوم، تفتكري هيقولك إيه؟ إنتي كده بتعملي مشكلة في البيت من أولها والعروسة لسه مدخلتش!

بصيت لها وابتسمت ابتسامة هادية وقلت:

جوزي لما يرجع، هقوله الحقيقة كلمة بكلمة.

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى