
عنبر:
بت يا حسنة، إنتي يا بت قومي فزي عشان تعجني وتخبزي، ولا عايزة تقعدي نايمة للضهاري وتصحي بعد طلوع الشمس؟
حسنة:
إيوه يا حماتي، إني جاية أهو. إني صاحية من حالي، بس كنت برتب الغرفة وأهويها قبل ما أنزل، عشان لما أعاود لها آخر النهار تكون نضيفة ومتهوية.
عنبر:
هملي الغرفة دلوك وهمي على شغل البيت فلاول، خلصي بدل ما أجي أزعقلك وأخليكي تبطلي الكسل اللي إنتي فيه. دي حريم آخر زمن، عايزة تاكل وتنام ومتعملش حاجة. إني نازلة وأبص ألاقيكي نازلة وراي طوالي.
حسنة هملت اللي في إيدها ونزلت طوالي، وهي بتقول لحالها:
ياربي، يعني كل يوم الواحد يصحى على المشاكل دي؟ مفيش يوم الواحد ياخده إجازة من الهم؟ مفيش غير حسنة في البيت ده. أخواتها بناتها مستريحين، ومرت ولدها التاني بتسيبها تنام براحتها. ولا عشان إني مرت الصغير أشيل البيت كله فوق دماغي؟
عنبر:
همي يلا، مالك قالبة خلقتك إكده عالصبح ليه وبتتكلمي مع روحك؟ ليكون معاجبكيش الحديت؟
حسنة:
وهو إني قلت حاجة يا حماتي؟ ماني نازلة أهه وهعمل اللي عتقولي عليه.
عنبر:
غصب عنك ترضي. روحي يلا اغسلي إديكي وانزلي فماجور العجين، وكَتّري الخبزة عشان بتي ورد بعافية النهارده وباعته عايزالها كام بتاوه طرية لعيالها.
حسنة:
حاضر.
شوية وباب أوضة غنيمة، مرت رضوان الابن الكبير، اتفتح وطلعت منه غنيمة تتاوب.
غنيمة:
إصباح الخير عليكم. إيه يا حماتي الدوشة دي عالصبح؟ وإنتي يا حسنة، متعرفيش تعملي الحاجة من سكات إلا ما تطلعي صوت حماتك وتتعبّيها؟
عنبر:
أهه، إديكم سامعين بودانكم وجع القلب اللي إني فيه، عشان لما ييجي عواد جوزها تحكوله إنها مطلعة صوتي، إني مش هاتحدت!
غنيمة:
ولا نقول ولا نعيد. اللي تقدر عليه تعمله، واللي متقدرش تهمله. دي المروّة متتدبرش، والصحة عتروح، سوا الواحد عمل ولا معملش. إني رايحة بيت أبوي النهارده يا حماتي، أمي عيانة وهاروح أقعد معاها اليوم كله. أصل زي ما إنتي عارفة، حريم الولد معيسدوش مع حماتهم، ومحدش عيشيل الأم غير بناتها.
عنبر:
واجب يا بنيتي، أمال إيه؟ روحي دي أمك، والأم ميتمنعوشي منها.
حسنة كانت ابتدت تعجن وقاعدة تستمع ليهم، وهي بتتعجب في سرها على المعاملة المختلفة، وعلى التفرقة اللي دايمًا عاملاها حماتها بينها وبين سلفتها، وكمان كلمة غنيمة إن محدش عيشيل الوحدة غير بناتها.
طيب فين بنات حماتها وشيلهم لأمهم ولا لنفسهم حتى؟ دول راميين الحمل كله على حسنة، والكل مستت على قفاها.
بصت لحماتها بعتب ومتحدتش، فحماتها فهمت بصتها وردت عليها:
عنبر:
دي مرت الكبير، ويحق لها اللي ميحقش لغيرها. وأصغر القوم خادمهم، والكل عارف الكلام ده. يعني البيت كله عليكي إنتي، عشان إنتي الصغيرة. إنتي الشديدة اللي عضمك ناشف، ومعتخلفيش، ومفيش عيل هد حيلك. سلفتك عيالها، الله أكبر، هدوا حيلها.
وبعدين إنتي غايرة منها عشان رايحة بيت أهلها؟ طيب ما إنتي محدكيش أهل تروحي لهم، مقطوعة من شجرة. ستك اللي ليكي ماتت، ليكي مين تروحيله ولا ييجي عليكي؟
حسنة اتوجعت من الكلام وردت عليها وهي كاتمة دمعتها:
حسنة:
طيب وليه كل الكلام ده يا حماتي؟ هو إني اتكلمت ولا نطقت بحرف؟ ماني ساكتة أهه. ومعروفة إني معخلفش، وعارفة إني يتيمة ومليش حد في الدنيا، وعارفة إني خدامة البيت ده ومليش أي حق فيه كيف باقي سكانه. ملوش لزوم الكلام اللي يوجع القلب كل شوية.
عنبر:
أفكرك عشان متنسيش ولا تفكري تعاندي في غيرك. أفكرك إنك ناقصة، والناقص مليهوش حقوق. وعايزة أفكرك كمان إن بعد ما نبيع محصول القطن هجوز عواد ولدي، عشان يلحق يجيبله ولد يشيل اسمه.
حسنة:
جوزيه يا حماتي، جوزيه وخليه يجيب الواد اللي نفسكم فيه. اللي يرضيكي اعمليه. إني قافلة خشمي أهه ومتحدتش ولا هاتحدت.
عنبر:
ومالك إكده عتقوليها من غير نفس؟ كنك معوزاهاش. دي بدل ما تطلعي إنتي تدوري لجوزك على عروسة حلوة وصغيرة وتنقيها ولادة كيف أمها، وتفرحيه بيها وتخليه يشيلك جميلة.
حسنة اتنهدت ومردتش، وهي عاجزة عن إنها تستوعب تفكير حماتها وكلامها ليها، وعمالة تسأل نفسها: كيف حد تكون جواه القسوة دي، وخصوصي لو كانت مرة زيها؟ والمفروض تكون عارفة زين إن مشاركة الزوج في حياته بتوجع.
لكنها رجعت تفش غلها في العجين، وتخبط فيه وهي متخيلاه حماتها قدامها، لحد ما خلصت.
خلصت الخبيز، وبعدها مسكت المقشة وكنست البيت كله، وعلقت على الطبيخ. وكل ده عملته لوحدها، من غير ما واحدة من أخوات جوزها الاتنين تساعدها في أي حاجة، كيف ما تكون الخدامة بتاعتهم وهما الهوانم.
وكل اللي عملوه إنهم طلعوا من أوضهم على ميعاد الوكل، بعد ما عرفوا إن الأكل طاب، وإن الخبيز اتخبز، والبيت اتكنس وكل الخدمة اتخدمت.
عاود جوز حسنة من الغيط بعد يوم شقى، حضرتله الغدا وقعدت تتغدا معاه.
عواد:
مالك قالبة وشك إكده ليه؟ جرى إيه تاني؟ أمي برضك؟
حسنة:
وهو فيه غيرها يعني يا عواد؟ منغصة عليا عيشتي النهارده. قالتلي تاني إنها هتجوزك بعد بيع المحصول. إلا صوح يا عواد، هتتجوز عليا وتجيبلي زوجة تانية؟
عواد:
متبكيهاش. إني مهتجوزش عليكي واصل، ولا عايز عيال؟ دانتي اللي في القلب يا بت، ومبدلكيش بعيال الدنيا كلها. إنتي بتي ومرتي وحبيبتي وكل حاجة ليا، وعمري ما أفرط فيكي يا بت الأصول.
حسنة بفرحة:
ربنا يخليك ليا يا غالي. إنت عارف إني مليش غيرك في الدنيا دي يا عواد، لا ضهر ولا سند. ولو هملتني ورحت لغيري، تبقى وجعت قلبي وكسرته.
عواد:
ما عاش ولا كان اللي يمس على قلبك بسوء يا لبة قلبي. المهم قومي بينا نطلع أوضتنا ونقعدوا لحالنا شوية، بعيد عن دوشة أمي. ومعوزش كلامها يدايقك ولا تحطيه في بالك واصل.
تسمعي من ودن وتفوتي من التانية، والكلام يعدي في الهوا. ولو جابت قدامك سيرة الجواز، قولي لها: جوزي عيحبني ومهيجوزش عليا واصل.
أما في دوار منصور…
منصور:
يا عزام يا ولدي، اخزي الشيطان وبلاها نشفان دماغ. روح هات مرتك من عند بيت أهلها. البنية بقالها شهر بحاله، وأبوها اشتكى لطوب الأرض منك.
عزام:
له، مهجيبهاش ومعاوزهاش. خليها عند أبوها، عشان يعرف إنه مرباش ولا أدب المرة اللي تطول لسانها على جوزها وتتجاوز في الكلام معاه مرة واتنين. وتعايره بأهلها واللي عندهم ومش عنده.
ملهاش عيش في بيته؟ إيه ناقصني إني؟ عشان كل شوية تقولي: كان نفسي تكون كيف أخوي عسران، وحداك الخير اللي حداه. أرض وبيوت يرمح فيها الخيل، ومعيشها فلوس ودهب، ومغرقها من ساسها لراسها، وملبسها اللي مفيش مرة في النجع لابساه. عايزة إيه مني تاني؟
منصور:
يا ولدي عشان اللي في بطنها. دي مرتك حبلى بعد سنتين بحالهم لفّ على الدكاترة، ومصدقنا إنها حبلت وهتجيبلي الحفيد اللي يفرحني. إنت وحيدي وعايز أشيل عوضك قبل ما أموت. إني خايف من الزعل تجرالها حاجة ونخسر الفرحة اللي مستنينها، وياكلنا الندم.
عزام:
خلي اللي يجرا يجرا يا بوي، وأمر الله نافذ. ولو ليا نصيب فيه هيقعد. إني أصلًا مفارقش معاي عيال. إني كل اللي عايزه مرة تمشي تحت طوعي، وتقولي نعم وحاضر. مرة أعاود من بره ألاقيها عاملالي لقمة بإيدها ومستنياني، وتستقبلني بضحكة وكلمة حلوة، مش واحدة أول ما تشوف وشي كأنها شافت حاجة بتضايقها.
وعمرها ما حطت يدها في الطبخ، وكله على أمي، وياريت عاجبها في الآخر. إني كل ما أسمع صحابي يحكوا على حريمهم واللي بيعملوه ليهم، حتى العمال اللي عيشتغلوا في الغيط حدانا عيقولو كلام حلو في حريمهم، وإني بس اللي ربنا بلاني بوحدة حاطة نفسها في مقارنة دايمة بيني وبين أخوها وأبوها والناس.
وتقولي شوف فلانة مرت فلان، وشوف فلان جوز فلانة، ومشايفانيش إني واصل، وكأني مليش وجود ولا ليا قيمة!
منصور اتنهد بقلة حيلة وسكت.
عزام:
شايفك سكت يا بوي؟
منصور:
هقول إيه يعني يا ولدي؟
عزام:
قول الحق يا بوي. احكم ضميرك وحط حالك موطرحي، وشوف هترضاها على حالك ولا له. إني بشر يا بوي وعندي إحساس، مش لوح خشب.
وافتكر إني قلتلك من الأول: جمالات لها والكل عيقول عليها بت متتعاشرش، وإنت اللي صممت رأيك عليها وقلت بت صاحبي وأبوها راجل زين. عملت إيه بأبوها؟ إني دلوك وبزينه عايش معاي أبوها وواعي عمايل بته.
ربنا يسامحك يا بوي على تصميمك وتمسكك برأيك. إنت دلوك عايش في تعب، ومحدش حاسس بيك، لا أبوها ولا حتى إنت.
خلص حديته وقام وهمل البيت وطلع يبعد عن جمالات والحديت عنها.
منصور بص لمرته جواهر، اللي كانت قاعدة ساكتة ومنطقتش ولا كلمة من أول القعدة، وسألها:
منصور:
إيه رأيك في عمايل ولدك يا أم عزام؟ يرضيكي إنه يخلي بيته في مشاكل بإيده؟
جواهر:
هو مشاكل البيوت مش هينة يا منصور، بس برضك مفيش واحد يقبل على كرامته إن مرته تقل منه وتحسسه إن أبوها وأخوها أحسن منه.
وولدي مفيهوش حاجة عشان جمالات تعمل فيه إكده. وإني مش هاجي مع حد على ولدي واصل. إني ولدي أغلى حد عندي في الدنيا، وعشان عيونه أعمل اللي يريحه.
وعشان تتربى وتعرف قيمة بيتها، إني هجوزه وهجيبله اللي تخليه يرتاح وتشوف بعينها إن ولدي يستاهل الاحترام.
منصور:
متعينيهوش على مشاكل البيت يا جواهر.
جواهر:
إنتصفه من عيني عالخراب يا منصور. إني عايزة ولدي يرتاح، وراحته مش مع جمالات.
منصور:
اعملي اللي يرضيكي إنتي وولدك. هو أصلًا صاحب عمري، وخسرته صعب. صوح النسب عيخرب المعرفة وحتى القرابة. إني مهملكوا وماشي خالص.
في الغيط عند عواد…
نعيم:
أيوه يعني هتعمل إيه دلوك يا عواد؟ هتتجوز ولا مهتتجوزش؟
عواد:
والله ما عارف يا نعيم، ومحتار. من جهة مرتي حسنة، لو لفيت الدنيا كلها مهلاقيش ضفرها. أدب وأخلاق وجمال، وشايلاني على كفوف الراحة، وعتعمل كل جهدها عشان ترضيني وترضي أمي.
وفوق دول ودول يتيمة ومليهاش حد في الدنيا غيري. ومن جهة تانية أمي نفسها تشوفلي عيل، ومكدبش عليك، إني كمان نفسي أجيب اللي يشيل اسمي. ومحتار ومعارفش أرضي مين ولا مين.
نعيم:
ارضي روحك فلاول يا صاحبي قبل أي حد. اتجوز وهات العيل اللي نفسك فيه. وحسنة مرتك، على قولك، مليهاش حد غيرك ولا موطرح تروحه غير بيتك.
وهترضى بالمكتوب وهتسكت، ويبقى معاك مرتين، والدلع يزيد. وبدل ما كفين شايلينك هيبقوا أربع كفوف. وهتبقى كيف هارون الرشيد، دي تقولك نعم ودي تقولك حاضر.
وتخلف الواد اللي نفسك فيه وترضي أمك، وتبقى عملت اللي نفسك فيه كله.
عواد ابتسم، وكيف ما يكون عجبه الكلام، ورد على نعيم:
عواد:
ما أقول إلا قولك يا نعيم.
وابتدا يفكر في كلام نعيم، وطول اليوم يقلبه في راسه، لغاية ما اقتنع. والفكرة ثبتت في دماغه، وقرر إنه يلحق العمر قبل ما ينقضي ويجيبله ولد قبل ما تاخده السنين ويندم.
ولو على حسنة، أهي معاه. هتزعل شوية، بس هتهدى وترضى، ويعرف بعدين يخليها تقبل بالأمر الواقع، وكمان مليهاش حد هيقوله تلت التلاتة كام، ولا حد ياخدها من عنده لو اعترضت على جوازه.
في بيت جمالات…



