قرر هاني إنه جى الوقت اللي لازم يواجه فيه الماضي، وياخد حق أمه اللي ضاع سنين تحت رجل القسوة والجبروت. اقسم هانى انه هيخلى الشخص اللى اتخلى عنه والمفروض انه ابوه يوطى قصاد امه ويبوس رجليها قصاد كل الناس اللى خذلها قدامهم زمان
زى ما زمان أمه وطت على رجل أبوه عشان مايتخلاش عنها ووافقت تبقى على زمته حتى لو خدامه عشان كلام الناس وهو رماها عشان واحده تانيه ليخليه هو يبقى مكانها ويتحايل عليها تسامحه
بس هاني، برغم كل القسوة اللي جفّت في قلبه، لسه جواه حتة واجعاه أوي على أمه.. مش عشان همام، لأ.. عشان الكسرة اللي أمه شافتها قدام خلق الله زمان. كان شايف إن العدل الحقيقي مش بس إنه يشوف همام مكسور في شقته ، العدل بجد إن الست اللي انكسرت وذلت نفسها، يرجع لها اعتبارها في نفس المكان، وعلى إيد نفس البني آدم اللي داس على كرامتها.
وفعلاً، بدأ هاني يرتب لعبته بخطوات تجيب ابوه لحد عنده وبرجله.
وعمل هاني خطته بهدوء وثبات. بدأ يبعت رجاله ويستقصي عن أخبار همام لحد ما جالو الخبر اليقين: همام فضل مع مراته التانية اللي خلاها ملكة زمان وداس على شرف أمى عشانها.. أهو دي بقى اللي طلعت عينه، وخلف منها بنت بقت دلوقتي في الجامعة.
همام طلع على المعاش، ولقى المرتب البسيط مبيعملش أي حاجة قصاد غلاء الايام وإيجار الشقة. والأصعب من كده، مراته وبنته مبقوش راحمينه؛ البنت شايفة بنات الناس في الجامعة بيلبسوا ويركبوا، وعايزة تجيب زيهم وتصرف، ولا على بالها أبوها بيجيب القرش منين ولا مقهور إزاي، ومراته التانية ليل نهار نكد وتأنيب، بتعيره إنه بقا عجوز مفلس ومبقاجهوش عِز ولا قيمة زي الأول، وتقوله: “هو ده الغنى اللي سيبت بيتك عشانه؟!”.
همام لقى نفسه واقف لوحده في وش مدفع الديون والطلبات اللي لا تنتهي، وهو محني الظهر، مكسور العين، ومش عارفين يصرفوا منين.
هاني كان قاعد في مكتبه، ووصله التقرير ده كأنه هدية على طبق من ذهب. ابتسم بابتسامة قاسية، وقال في نفسه:
ـ تمام.. أدي السكينة اللي هتدبح بها نفسها يا همام.. جه الوقت اللي تخبط فيه على كل الببان وما تلاقيش غير بابنا، عشان ترجع لنفس الساحة اللي طردت منها أمه، وتوطي تبوس رجلها قدام الكل.
مسك هاني تليفونه، وبص لـ عم محمود، الراجل القديم اللي بيثق فيه، وقال له بصوت حاسم:
ـ اسمع يا عم محمود.. الشغلانة اللي كلمتك فيها تبدأ من النهاردة. عايزك تزنق همام في الفلوس من غير ما يحس إن ورا الموضوع مدبر.. خليه هو اللي يجيلنا برجله، ويدور على طوق النجاة بنفسه!
عم محمود نفذ الخطة بدقة وذكاء؛ وبدأ يقفلها على همام من كل النواحي. الدين كتر عليه، وإيصالات الأمانة اللي مضاها عشان مصاريف بنته في الجامعة بقت حبل على رقابته، ومراته التانية ليل نهار صوتها واصل لأخر الشارع بتعايره وتطالب بالفلوس ومفيش في جيبه مليم أبيض
وفي وسط الهموم والضيقة دي كلها، جه عم محمود لحد عند همام، وقعد جنبه على القهوة، وبص له بنظرة شفقة ظاهرها الطيبة وباطنها الشغلانة المظبوطة، وقال له بصوت هادي:
ـ مالك يا أبو هاني وشك أصفر كده وشايل هم الدنيا ليه؟ ما تكبر يا راجل، الدنيا لسه فيها ياما!
همام نفخ بعمق، ودموعه كانت قريبة من عينه، وقال بحسرة:
– أقولك إيه ولا إيه يا عم محمود.. البنت في الجامعة ومصاريفها بقت جبل، ومراتي مش راحماني، والمعاش مبيكملش اسبويعن ، والديون هلكتني.. هموت وانا شايل هم بكرة!
عم محمود ابتسم ابتسامة خفيفة، وضرب كف على كف، وقال له:
ـ تصدق إن البخت ساعات بيضحك للواحد وهو في أشد ضيقته؟ اسمع مني.. في باشمهندس كبير ، شغال في المشاريع والعقار، وعنده فيلا فخمة ومحتاج “حارس أمن” شخصي ومسؤول عن الفيلا والبوابة.. بس شغلانة تانية خالص، ومرتبها.. يا سلام! مرتب مغري جداً، خيالي، هيخليك تسدد ديونك كلها وترتاح وتجيب لبنتك اللي هي عايزاه وزيادة، ده غير الإقامة والمأكل.
عينين همام لمعت.. الفقر والقهر بيخلوا البني آدم يتعلق بقشة. بلع ريقه بسرعة وبص لعم محمود بلهفة وقال:
– بجد يا عم محمود؟! مرتب مغري قد إيه؟ وفين دي؟ ده أنا مستعد أعمل أي حاجة، ، المهم أخد الشغلانه دى ومصاريف بنتي تتدفع وديوني تتسد!
عم محمود رد عليه ببرود ظاهري:
– مرتب هيحل كل أزماتك وأكتر بكتير.. بس الباشمهندس ده شديد وله شروط، ولو مهتم، أنا ممكن أكلمهالك وأخدك معايابكرة تقابله بنفسك وتتفق معاه.
همام مكملش تفكير، ووافق من فرحته كأنه لقى طوق نجاة في بحر غرقان، وهو مش عارف أصلاً إن السكة دي هترميه قدام الست اللي داس على كرامتها زمان، وإن الباشمهندس اللي مستنيه مش هيرحمه!
تانى يوم الصبح، وبدري قبل طلوع الشمس، كان همام واقف قدام البيت على اعصابه، لابس أنضف هدومه القديمة، وواقف يستنى عم محمود اللي وصل بالعربية على معادهم بالظبط. ركب همام جنبه، وكان طول الطريق بيدعي ربنا إن المقابلة دي تعدي على خير، وإن صاحب الشغل يقبله عشان يلحق بنته ومصاريف الجامعة اللي مطلعين عينه، وعشان يخلص من نكد مراته اللي مش بيخلص.
العربية مشيت مسافة لحد ما خرجت من زحمة المدينة، ودخلت على منطقة فلل فخمة وهادئة، ووقفت قدام بوابة حديدية ضخمة وعالية لفيلا شكلها مبهر وواسع.
نزل همام وعم محمود، وفتح لهم البواب ودخلوا لحد ما وصلوا لحديقة الفيلا الواسعة. وقف عم محمود مع همام على استراحة برة لحد ما يجي الباشمهندس صاحب الفيلا.
بعد دقايق، اتفتح باب الفيلا الرئيسي، وطلع منه شاب بيمشي بوقار شديد، لابس بدلة شيك جداً، ومظهره ينم عن هيبة وقوة، وعينيه مستخبية ورا نظارة شمسية أنيقة.
همام عدل هدومه بتوتر، ووقف بانتظار الشاب ده، وهو متوقع إنه هيكون راجل كبير في السن أو رجل أعمال ضخم. بس مبصش في وش الشاب كويس بسبب المسافة والنظارة.
قرب الباشمهندس منهم بخطوات ثابتة وثقيلة، ووقف قدام همام مباشرة. وقف همام باحترام وانحنى شوية بضهره المنحني وقال بصوت مرتعش:
– صباح الخير يا باشمهندس.. أنا همام اللي عم محمود كلم حضرتك عنه، وجاي عشان شغلانة حراسة الفيلا، وتحت أمرك في أي شرط تطلبه.. المهم عندي أستر بيتي وبنتي.
البشمهندس فضل واقف باصص له بثبات رهيب من فوق لتحت، من غير ما ينطق بكلمة واحدة. وبعدين، ببطء شديد، مد إيده ورفع النظارة الشمسية من على عينه، وبص له بنظرة قاسية ومليانة ذكريات قديمة.
–.. عم محمود كلمني عن ظروفك، وعموماً أنا مش هقفل باب رزق في وش حد ضاقت بيه الدنيا، بس الشغل هنا ليه قواعد ونظام صارم، لو مش قدها من الأول وفر تعبك.
همام هز راسه بسرعة وقال بلهفة:
– قدها يا باشمهندس والله.. قولي أعمل إيه وتحت أمرك في كل كلمة!




