
قفلت معاها وقومت أغير هدومي، واستأذنت من ماما إني هروح أساعد نسمة في حاجة. وماما وافقت وقالتلي: متتأخريش وخلي بالك على نفسك.
حضنتها ونزلت وأنا متوترة لأني عمري ما اشتغلت في مطعم نهائي.
وصلت بعد وقت للمطعم، وكان مطعم فخم جدًا، من الواضح إن محدش بيدخله غير الناس الغنية والمهمة. دخلت وأنا متوترة، وبلغت واحد من اللي موجودين إني صحبة نسمة، وهو دخل بلغها إني وصلت. ولقيتها كانت جاية وهي مبتسمة، ولكن اتفجأت إنها خست جدًا. حضنتها بفرحة إني شوفتها.
نسمة: وحشاني أوي يا ملك، عاملة إيه؟ وماما عاملة إيه؟
ابتسمت وأنا بقول: احنا كويسين جدًا، بس أنتي خستي كدا ليه يا بنتي؟
ضحكت وقالت: كلو من التفكير يا أختي، علشان الفرح والتوتر دا.
ابتسمت وحضنتها تاني، وهي قالتلي: تعالي بقى يا ملوكه، أما أوريكي الأوضة اللي هتهتمي بيها. وأنا عارفة إنك صحفية قد الدنيا ودا مش كارك، بس عارفة إنك بت جدعة وهتقفي جمب صحبتك!
ابتسمت وهي أخدتني لغرفة تبديل الملابس. كان موجود لبس خاص بالويتر، نسمة أدتني لبس وأنا لبسته، وكنت متفاجئة من شكلي. خرجت لنسمة اللي كانت واقفة مستنياني: إيه القمر دا؟
قعدنا نضحك، وبعدين نسمة أخدتني للمطبخ وعرفتني للشيفات. وكنت معجبة جدًا بشكل المطبخ، وكنت مبهورة بكمية الشيفات اللي موجودة. وكانت ريحة الأكل حلوة، وكان بيتقدم بطريقة شيك جدًا.
نسمة: الضيوف هيوصلوا خلال ساعة، بس علشان تتعودي هتنزلي معايا وتشوفيني بتعامل ازاي.
هزيت راسي، وكان في ناس لسه داخلين. بعدما قعدوا شوية، قربت مع نسمة وهي كانت بتتكلم بأسلوب راقي جدًا، وشافت طلبات الناس دي وكتبتها على اللاب اللي في إيديها. وبعدين دخلنا للمطبخ وبلغت الشيفات بالوجبات المطلوبة. وبعدين دخلت لمكان تاني أخدت منه ماية ومفرش خاص بالمطعم، وخرجت حطتهم قدام الأشخاص، وحطت الماية وبلغتهم إن الأكل هيخلص كلها دقايق.
وبعدين خرجنا، وكان في ناس تاني دخلت. نسمة أدتني اللاب وطلبت مني أروح أشوف طلبهم، وأنا كنت متوترة بس حاولت أتعامل. قربت منهم وقولت باحترام: أهلا وسهلا بيكم يا فندم، تحبوا تطلبوا دلوقت ولا نستنى شوية؟
البنت هزت راسها وقالت: لا، هنطلب.
حطيت قدامهم المنيو، وروحت أجيب ماية ومفارش، واستنيت طلبهم وبدأت أكتبه على اللاب. وقولت: تمام يا فندم، أي حاجة تانية؟
البنت ابتسمت وهزت راسها بلا. أنا اتحركت للمطبخ وبلغت الشيف بالطلب، وخرجت لنسمة اللي سقفت وهي مبتسمة: برافو يا ملك، إيه الحلاوة دي، شاطرة.
ابتسمت واستنيت الشيف بعدما خلصوا الطلب. ووقتها دا كان التوتر كلو لأني مش متعودة أقدم طلبات. بس أنا ونسمة اتجهنا للطرابيزة الأولى، وشوفت نسمة وهي بتقدم الطلب، وكان عادي جدًا!!
رجعنا، وكان الطلب بتاع الطرابيزة التانية خلص. بدأت أشيله وأنا خايفة ليقع حاجة مني، بس نسمة شجعتني. قربت من الطرابيزة وحطيت الأكل، والبنت ابتسمت وهي بتشكرني. وبعدين أنا رجعت لنسمة تاني، ونسمة قالت: كل حاجة تمام، أهم حاجة متتوتريش وأنتي بتقدمي الطلب، اتعاملي عادي جدًا.
هزيت راسي بتمام، ونسمة كانت خلاص لازم تمشي علشان خطيبها مستنيها برا. وأنا دخلت للأوضة الخاصة اللي هيحصل فيها اجتماع، شيكت إن كل حاجة تمام، بس كنت متوترة جدًا!
عدى شوية وقت، وبعدين شوفت دخول الناس دي للمطعم، وكانوا لابسين نفس الزي اللي كان في شركة فارس. كنت متفاجئة، بس قولت يمكن دي شركة تانية، أعتقد إن يونيفورم الشركات متشابه!
استنيت شوية، وبعدين دخلت للأوضة وكنت متوترة جدًا. قربت منهم وأنا بقدم الماية، وهما بدأ كل واحد يطلع اللاب الخاص بيه، وأنا خرجت تاني. وفي نظام متخصص إنهم لما يخلصوا شغل هيضغطوا على جرس هيبلغني على طول، لأني معايا الجهاز دا!
استنيت شوية، وعدا وقت، ولقيت الجهاز بيتحرك، فهمت إن هما خلصوا شغل وهيطلبوا الأكل!
دخلت وأنا ماسكة المنيو وقدمته ليهم، وأنا بدي المنيو لآخر شخص بصيت عليه، واتصدمت لما لقيته فارس. فتحت عيني بصدمة، وهو كان متفاجئ بوجودي. قدمتله المنيو ومشيت، استناهم يطلبوا. وبعد دقايق قربت منهم وأنا في إيدي التابلت، وقربت من كل واحد أخد طلبه. وبعدين قربت من فارس وكنت متوترة جدًا، وهو كان باصصلي، وكانت نظراته غريبة، زي ما يكون متضايق من وجودي.
وقفت قدامه مستنياه يقول طلبه، بس كان باصصلي وساكت. هزيت راسي وقولت: اتفضل يا فندم، قول طلبك.
قالي: عاوز سلطة.
هزيت راسي وكتبت في التابلت: سلطة. وخرجت وكنت واقفة في المطبخ بتوتر. قررت أروح الحمام أغسل وشي علشان أهدأ شوية. وبعدين خرجت لقيت جسم صلب واقف قدامي، اتوترت جدًا وأنا شايفاه واقف باصصلي وعينه بتطلع شرار. وقالي بصوت غاضب: بتعملي إيه هنا؟
لقيت نفسي هعيط من الموقف دا. مش عارفة ليه أنا حسيت كدا. كنت حاسة إني خايفة منه وإني بعمل حاجة مش شغلتي أصلًا. رفعت عيني أبص له، وكانت مليانة دموع، وقولتله: بشتغل.
بصلي وهو مركز مع عيوني: أنتي مش شغالة صحفية؟
هزيت راسي: أيوه، وقولت منا سيبت الشغل.
عينه كانت مركزة مع عيوني، وأنا وطيت وشي ودموعي نزلت وأنا مش عارفة أسيطر عليها. كان متضايق من دموعي، وفجأة لقيتو حضنني. أيوه، أنا أصلًا كنت محتاجة الحضن دا جدًا. غمضت عيني وسمحت لدموعي تنزل. وبعد ما هديت انتبهت إني في حضنه، بعدت وأنا بمسح وشي بإيدي. وبعدين قلتله بتوتر: بعد إذنك اسمحلي أعدي علشان عندي شغل.
كان واقف وكانه مش مصدق اللي بقوله. باصلي كدا وقالي: دا مش شغلك.
بصيت له وقولت: للأسف شغلي.
كنت بتتحرك علشان أعدي، لكنه مسك إيدي وخرجني، وأنا كنت مصدومة من اللي بيحصل دا. وكنت متفاجئة من اللي بيحصل. قالي: ادخلي هاتي حاجتك وتعالي.




