روايات وقصص

فارس وفريده

كنت سامعة كل اللي حصل، وفرحت جدًا لما سمعته بيدافع عني. حسيت إن ليا قيمة، وإن بفضل كلامه كرامتي رجعت ليا أوي. وفعلًا عنده حق، جريدة فريدة متستحقنيش خالص. لقيتو قرب مني وعلى ملامحه الانزعاج من خلال حديثه مع فريدة المرعجة، قالي وهو باصصلي: أنتي كويسة؟

هزيت راسي بأيوه، وقومت. وفعلًا كانت حالتي رجعت زي الأول، وقعدت قدامه وقولت: لو مش حابب اللقاء دا يتم، أنا ممكن أنسحب. وأنت فعلًا عندك حق، أنا لازم أسيب الجريدة دي، لأنهم ميستاهلونيش..

ابتسم لما شاف إني استرديت ثقتي في نفسي وقالي: لا يا آنسة ملك، أنا مستعد جدًا. وأنتي سجلي اللقاء وتقدري تبيعيه لأي جريدة، وهتكوني كسبانة!

هزيت راسي بالموافقة، وبدأت أجهز كاميرتي. واستعدينا للمقابلة، وبدأت أسأل فارس وهو بيجاوب. وكان رده كويس جدًا ومشجع، لدرجة إني اتشجعت جدًا وبفضله أخدت باور، وحسيت إني ممكن أحقق أي حاجة شايفاها مستحيلة، وإن بمجرد ما أقرر وقتها بيبدأ النجاح.

خلصنا كل الأسئلة اللي اتفقنا عليها، وجه عند آخر سؤال. وسألته: فارس الشيخ، ممكن نعرف حضرتك مرتبط؟

باصلي وضحك وقال: حاليًا لا، بس أعتقد إنه قريب جدًا.

كان بيقول الكلمة دي وبيبصلي بابتسامة، وأنا اتكسفت جدًا ومكنتش فاهمة قصده، بس اتكسفت من نظرته. وقفت الكاميرا ولميت حاجاتي، وكنت خلاص خلصت كل حاجة. وقفت ومديت إيدي أسلم عليه.

فارس وهو بيبتسم: تشرفت بمعرفتك يا آنسة ملك.

ابتسمت وقولت: أنا اللي اتشرفت بمعرفتك يا مستر فارس.

بعد إذنك، شيلت شنطتي وخلاص ماشية. وخرجت من مكتبه وركبت المصعد ونزلت، لقيت لينا بصالي وأنا ابتسمتلها وخرجت. ومشيت شوية لحد ما وصلت لطريق عام، وركبت مواصلة واتجهت للجريدة. وبعد وقت مش كبير وصلت ودخلت، وأنا ماشية بثقة. والكل كان باصصلي مستنين إن فريدة تهزقني زي كل يوم ويضحكوا عليا وأبقى حديث اليوم.

بس لا، المرة دي لأ. كنت ماشية وبقول كلام فارس: أنا أستحق الأفضل.

وكانت فريدة خارجة من مكتبها، وأنا وقفت قدامها وأديتها تقرير المقابلة والفلاشة وقلت بكل ثقة، وأنا مش خايفة زي كل مرة: أنا بستقيل.

وسيبتها واتجهت لمكتبي ولميت حاجاتي كلها. والكل كان متفاجئ، وفريدة كانت مصدومة من اللي حصل. هي معتقدة إني هسكت زي كل مرة. كنت خلاص لميت حاجاتي كلها وخرجت وأنا رافعة راسي وباصة للكل اللي كانوا مذهولين. وقبل ما أخرج لقيت صوت فريدة اللي وقفني: ملك استني.

وقفت وبصيتلها، ولقيتها بتقرب مني وبتقول: أنا آسفة يا ملك، عارفة إني زودتها معاكي حبتين، بس أنتي زي أختي الصغيرة ومش قصدي أي حاجة!!

ابتسمت بسخرية وأنا بصالها وقولت: لا يا فريدة، المرة دي مش هقبل إهانتك. أنا هخرج من هنا ومش هدخل تاني، بعد إذنك.

وخرجت، ويدوبك مشيت خطوتين وصرخت بغباء: طب يا فالحة يا جريئة، هتصرفي منين؟

مشيت وأنا بدعي ربنا يصلح حالي وألاقي شغل. ركبت مواصلة واتجهت للبيت، وأنا بحاول أبان طبيعية. أول ما قربت من شقتنا سمعت صوت أشخاص مع ماما. فتحت الباب ودخلت بهدوء، وكان في ست وجمبها بنت في عمري تقريبًا. دخلت وألقيت السلام، وهما ردوا. ولكن الست دي قالت أول ما شافتني: طيب يا أم ملك، هنمشي احنا، وهكون مستنية ردك.

باااس، اهي واضحة زي الشمس. ما دام فيها مستنية ردك يبقى دا عريس.

ماما وقفت تودع الناس وبقت تعزم عليهم يفضلوا شوية، بس هما مشيوا. وأنا استغليت إن ماما مشغولة معاهم وجريت على أوضتي.

دخلت وأنا بدور على حاجة أهرب من العريس دا، بس ماما خبطت على الباب. أخدت نفس طويل جدًا، وماما دخلت.

بصتلي ماما بنص عينيها كدا، وأنا ابتسمت. وهي قربت وقعدت جنبي: عارفة إنك بتعملي كل دا علشان عرفتي إن دا عريس. بس أنا عوزاكي تفكري في الموضوع كويس. أنتي جميلة وتستاهلي كل خير، واللي بيجيلك دول ولاد حلال. ممكن أعرف السبب اللي مخليكي بترفضي كل عريس كدا؟

بصيت لماما وهزيت راسي، وأنا بأخد نفس وبهدأ.

ماما قالت: بصي يا ملك يا حبيبتي، اقعدي معاه واحكمي. لو ملقيتيش إنك مرتاحة معاه ارفضي، إنما رفضك من غير أي سبب دا قلقني.

بصيت لماما وأنا شايفة إن عندها حق، وقولت: خلاص يا ماما، بلغيهم إني موافقة.

ماما حضنتني بفرحة وابتسمت: ماشي يا قلب ماما، هبلغهم بكرة ونتفق على ميعاد يجيوا فيه. بس أنتي بقى مالك؟

احمم، مالي ازاي يعني يا ماما؟

ماما: يعني يا ملك، إيه الكرتونة اللي كنتي شيلاها في إيدك دي؟

بصيت للكرتونة بصدمة وافتكرت اللي حصل، وقولت: أنا سيبت الشغل، بس بإذن الله بكرة هروح أدور على شغل تاني.

ماما هزت راسها وقالت: ماشي يا حبيبتي، ربنا يصلح حالك. يلا غيري هدومك وتعالي ناكل.

هزيت راسي، وماما خرجت. وأنا بصيت على الكرتونة بحزن. أنا كنت بحب شغلي جدًا، وياما حصلت مواقف كتير حلوة، بس للأسف دا مش مكاني. أنا أستحق الأفضل. بس فين بقى؟ مسكت تليفوني وبدأت أشوف الجرايد اللي عرضة شغل، ووقتها ملقيتش أي جريدة عارضة حاجة. اتنهدت، وجه وقتها في بالي فارس. يااه يا فارس، مش عارفة ليه اتشديت ليه أوي كدا. معقولة أكون أعجبت بيه؟ بس لا، مفيش الكلام دا. مينفعش أعجب بحاجة مش ملكي. أفردي، هوا مرتبط بحد، مش من حقي أبدًا أبص لحاجة مش ملكي.

خرجت وقعدت أكل مع ماما، وفضلنا نضحك واحنا بنتفرج على مسرحية. وقعدت أحكي لماما عن اللي حصل من فريدة، وماما قالتلي إني صح ومكنش لازم أوافق على إهانتها دي من البداية!

وع دي يومين، وكنت كل يوم بطلع أدور على شغل ومكنتش بلاقي، وبرجع للبيت محبطة. لحد ما فيوم جاتلي مكالمة من صحبتي نسمة، واستغربت جدًا من مكالمتها لأنها بقالها كتير مكنتش بتتصل. رديت وأنا بهزقها لأنها اختفت فجأة، بس لقيتها بتقولي: ملك، ازيك، عاملة إيه؟

رديت وأنا مبتسمة: الحمد لله، فينك يا نسمة، مختفية كدا ليه؟

نسمة: اسكتي يا ملك على اللي أنا فيه. المطعم اللي شغالة فيه محتاجين عمال، والدنيا زحمة جدًا، وأنا وزمايلي مش ملاحقين. والنهاردة في شركة هيعملوا اجتماع شغل، وطبعًا هماكلوا بعد ما يخلصوا، والمدير طلب مني أخدم الطربيزة دي. بس أنا للأسف لازم أروح مع خطيبي علشان نحجز الفستان والكوافير، ومش هعرف إني أفضل في الشغل لأن الشركة دي هيتأخروا.

كنت مش عارفة أرد أقولها إيه، بس قالتلي: ملك، هو أنتي عندك حاجة النهاردة؟

رديت وقولت: لا.

قالتلي: اعملي معروف في أختك بقى، وتعالي اقفي مكاني. ومتقلقيش، المدير هيظبطك في الفلوس، وأنا هوريكي هتعملي إيه. بس ونبي وافقي.

قعدت أفكر شوية وأنا مش عارفة أرد أقول إيه، بس فكرت في حالي وإني الفلوس اللي معايا قربت تخلص، وإن علاج ماما قرب يخلص ومحتاجة فلوس. قولتلها: خلاص يا نسومة، موافقة.

سمعت صوت نسمة وهي بتضحك: خلاص يا حبيبتي، متحرمش منك طول عمرك، جدعة يا لوكه. يلا أنا هبعتلك العنوان في رسالة، متتأخريش.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى