
الفلوس المطلوبة كانت أكتر من ربعمية ألف جنيه.. وإحنا مكناش نملك ربع المبلغ ده. في اليوم ده، محمود جه البيت عندي وكان زي المجدون، وقالي أنا مش هسيب أخويا يتسجن لو على رقبتي، بس أنا محتار ومش عارف أعمل إيه.. سارة مجمعة دهبها عشان نعمل بيه الحقن المجهري، والدهب ده أملها الوحيد في الدنيا.
أنا هنا حسيت بسكاكين بتقطع في قلبي، وقلت بصوت مرتعش
قام محمود أخد دهبي يدفع بيه أخوه؟ من ورايا؟! من غير ما يرجعلي؟! حرمني من حلمي وباع دهبي عشان يفك ضيقة أخوه وضحك عليا؟!
ريهام مسكت إيدي بسرعة وقالت
لأ يا سارة والله! اسمعي للآخر! محمود رفض في الأول يلمس دهبك، وقال ده حقها وعمرها ومقدرش أكسر قلبها. بس أنا وعماد مكناش لاقيين مليم، وأنا بعت شبكتي وكل حتة صايغة معايا ومكملتش تمانين ألف. محمود وقتها راح للراجل اللي كان واقف على الباب ده.. الحاج فتحي تاجر خردة ومقاول بيدي فلوس بفوايد.. محمود استلف منه فلوس عشان يفك عماد، والراجل مرضاش يديله غير لما رهن نصيب محمود في محل أبوه، وكتبه كمبيالات بربع مليون جنيه بفوايدها!
صړخت فيها أومال دهبي راح فين؟! إنتِ لسه قايلة محمود مخدش الدهب للعملية!
ريهام عيطت بصوت مسموع وقالت
دهبك اتباع يا سارة عشان يتسدد بيه جزء من فوايد الراجل ده عشان ميسجنهمش هما الاتنين! محمود مكنش معاه يسدد القسط الأول، والراجل هدد إنه هياخد المحل ويسجن محمود، فمحمود اضطر ياخد دهبك يبيعه عشان يسكت الراجل ويديله مهلة.. والفلوس اللي اتعمل بيها الحقن المجهري بتاعك، محمود مجابهاش من الدهب، محمود استلفها من البنك بضمان مرتبه، واستلف من طوب الأرض، ودخل في دوامة قروض عشان بس ميكسرش خاطرك ومتعرفيش إن حلمك اتأجل، وعشان متشيليش هم وتفضلي فاكرة إن دهبك هو اللي عمل العملية!
قعدت متنحة، الكلمات كانت بتلف في دماغي زي الإعصار.
يعني الدهب اللي أنا قلعته واديتهوله بابتسامة وفرحة ودموع، راح عشان يسدد فوايد ديون عماد؟ والعملية اتعملت بقروض وسلفيات تانية؟ ومحمود شايل فوق كتافه ديون توديه ورا الشمس، وساكت ومبيقولش كلمة؟!
قلت بصوت ضعيف كأني بكلم نفسي
طب وليه خبيتوا عليا؟ ليه محسستنيش؟ ليه سبتوني أعيش في الوهم ده كله؟
ريهام رفعت وشها وبصتلي بحب حقيقي ممزوج بدموع الندم
عشان خاطرك والله العظيم! محمود حلف عليا على المصحف مقولش نص كلمة. قالي سارة لو عرفت إن دهبها ضاع في ديون أخويا مش هتسامحني، ولو عرفت إني مديون للرقبة هتنهار والعملية هتفشل والدكتور قال حالتها النفسية هي أساس نجاح الحقن. ولما ربنا كرمك وحملتي في توأم، الدكتور قال أي زعلة أو عصبية ممكن تنزل العيال في ثانية.. محمود كان بيموت كل يوم في صمت، بيشتغل شيفتين وتلاتة، يخرج من وظيفته الصبح يشتغل في مخزن بليل، ويرجع يبتسم في وشك ويقولك الحمد لله يا حبيبتي كل حاجة تمام.
كملت ريهام وهي بتشهق
وأنا يا سارة.. أنا كنت بموت من إحساسي بالذنب! أنتي ضحيتي بدهبك اللي كنتي شايلاه لنفسك، ودخلتي في الدوامة دي بسبب جوزي ومصايبه! أنا مكنتش بقدر أحط عيني في عينك.. لما كنت باجي أنضف شقتك وأطبخلك وأغسل رجلك، مكنتش بعمل كده مجاملة، والله العظيم كنت بعمل كده تكفير عن ذنبنا في حقك! كنت حاسة إني خادمة تحت رجلك ومش هوفيكي حقك.. كنت بقول لنفسي البت دي ملاك دخل بيتنا وإحنا غرقناها في همومنا، لو قعدت خدامة تحت رجليها عمري كله مش هردلها ربع اللي محمود ولينا اتسببنا فيه!
غمضت عيني، وحسيت بصداع نصفي رهيب بيهجم على نفوخي. المشاعر جوايا كانت مشقلبة؛ مش عارفة أغضب ولا أتعاطف، مش عارفة أصرخ في وشها وأطردها برة شقتي، ولا أطبطب عليها وأبكي على حالنا كلنا.
محمود غلط.. غلط إنه كدب عليا، غلط إنه ورط نفسه في ديون عشان يشيل طين أخوه من غير ما يصارحني، بس في نفس الوقت.. الراجل استلف من البنك وشال طين فوق طينه عشان ميحرمنيش من حلم الأمومة وميكسرش فرحتي!
مسكت راسي بين إيديا وقلت بجمود
وعماد فين من ده كله؟ عماد اللي خربها وقعد على تلها، فين دوره؟ سايب أخوه الصغير يتبهدل ويتهدد بالحبس وهو قاعد يتفرج؟!
ريهام ردت بكسرة نفس
عماد هربان يا سارة.. عماد من يوم ما الراجل جه هددنا من أسبوعين، وهو سايب البيت وقاعد في بلد تانية بيحاول يستلف من قرايب أمه عشان يجمع المبلغ ويسدد لمحمود، بس مفيش حد راضي يديله مليم، والناس كلها قفلت بيبانها في وشه. ومحمود هو اللي في الوش هنا، المحل باسمه وباسم عماد، والكمبيالات محمود اللي ماضي عليها كضامن ومعاه كمبيالات باسمه هو شخصياً!
سكتت لحظات، وبعدين بصيت في الساعة اللي على الحيطة.. كانت الساعة اتنين بعد الظهر.
الراجل بتاع الصبح قال قدامكم للمغرب يا الفلوس يا البوليس!
قلبي اتقبض برعب حقيقي. المغرب فاضل عليه أقل من أربع ساعات! لو الراجل ده جه ومعاه الشرطة، محمود هيتمسك، وهيتفضح في العمارة والشارع، وهيترمي في الحبس، والولاد اللي في بطني دول هيجوا الدنيا يلاقوا أبوهم مسجون وعيلتنا مفضوحة!
مسحت دموعي بعنف من على وشي، وبصيت لريهام بحدة
المبلغ كام بالظبط يا ريهام؟ الراجل ده عايز كام عشان يمشي ويسيبنا في حالنا وميقربش من محمود؟
ريهام بصتلي باستغراب وخوف عايز ميتين وخمسين ألف جنيه كاش.. ده أصل المبلغ مع فوايده اللي اتأخرت. بس إنتِ بتسألي ليه؟ هتعملي إيه يا سارة؟ أرجوكي بلاش تهوري نفسك!
قمت وقفت، وتجاهلت الدوخة اللي جت في راسي، ودخلت أوضة نومي، وفتحت الدولاب بإيدين بتترعش. طلعت شنطة صغيرة كانت محطوطة في قعر الدولاب ورا الهدوم. شنطة قديمة فيها أوراق ودفاتر.
طلعت منها دفتر توفير البريد.. دفتر توفير كان والدي الله يرحمه فاتحهولي من وأنا في الإعدادي، وكان بيحطلي فيه كل قرش يفيض منه، وققبل ما يموت وصاني وقالي ده قرشك الأبيض ليومك الأسود يا بنتي، اوعي تمدي إيدك عليه إلا لو الدنيا ضاقت بيكي وخلاص هتقفلي في وشك.
فتحت الدفتر.. كان فيه مية وسبعين ألف جنيه. المبلغ ده مكنتش مقربة منه، ولا حتى محمود كان يعرف بوجوده، كنت شايلاه لزمن غدار، أو ليوم ما عيالي يحتاجوا مصاريف دراسة أو مرض مفاجئ.
وقفت في نص الأوضة والدفتر في إيدي، والدموع بتغلي في عيني.
أنا هعمل إيه؟ هدفع كل شقا أبويا اللي سابهولي عشان أسدد مصيبة مش بتاعتي؟ عشان أصلح غباء جوزي وأخوه؟
طب ولو مدفعتش؟ محمود هيتحبس! الراجل اللي شالني في عيونه سنتين، اللي كان بيقعد تحت رجلي لما بطني توجعني يسخنلي كمادات، اللي استلف من طوب الأرض عشان يفرح قلبي بالحقن المجهري، هيتسجن والعيال دول هيتيتموا وأبوهم عايش!
ريهام دخلت ورايا وشافت الدفتر في إيدي، شهقت وحطت إيدها على بؤها
سارة.. إيه ده؟ إنتِ معاكي فلوس؟
بصيتلها بنظرة عمري ما هنساها، نظرة واحدة مكسورة بس واعية
ده ورثي من أبويا يا ريهام.. ده القرش اللي أبويا شقي بيه في الشمس عشان ميجيش يوم وأتمد إيدي لحد.. فيه مية وسبعين ألف جنيه.
ريهام اتراجعت لورا بخجل ودموعها نزلت
لأ يا سارة.. لا والله العظيم ما تاخدي مليم من فلوس أبوكي! محمود يموت ولا ياخد منك قرش من ورثك بعد اللي عمله! إحنا منستاهلش، سيبي الراجل يعمل اللي يعمله، إحنا نتحمل نتيجة غبائنا!
قلت بجمود ومحمود يتحبس؟ والعيال اللي في بطني يجوا على الدنيا يلاقوا أبوهم متكلبش في القسم؟ وعيلتنا تبقى سيرتها على كل لسان؟
سكتت ريهام وعجزت عن الرد.
كملت وأنا بقفل الدفتر بس المية وسبعين ألف مش هيكفوا.. الراجل عايز ميتين وخمسين. باقي تمانين ألف.. التمانين ألف دول هنجيبهم منين قبل المغرب؟!
ريهام بصت في الفراغ ثواني، وفجأة عينيها لمعت كأنها افتكرت حاجة، وضربت على صدرها وقالت
عقد القيراطين اللي في البلد! أرض ورثتها عن أمي في الفيوم.. مأجراها لناس قرايبنا هناك.. العقد معايا هنا في الشقة! هما كانوا عارضين يشتروها من شهرين بمية ألف وأنا اللي كنت رافضة عشان ذكرى أمي!
بصيتلها بصدمة هتبيعي أرض أمك يا ريهام؟




