روايات وقصص

جدعنه سلفتى ٢

حكايات منى السيد

ردت بعزم وبكاء هستيري أبيع هدومي اللي عليا يا سارة ولا أشوفك تبكي وتدفعي من شقا أبوكي لوحدك! عماد خربها وأنا اللي هشيل شيلته، والراجل ده هياخد أرضي مقابل باقي المبلغ، أو أكلم قرايبي في التليفون يحولولي العربون حالا فودافون كاش أو على البنك!

مسكت تليفونها وبدأت تتصل بإيدين بتترعش بأهلها في البلد، وتتوسل ليهم يلموا أي فلوس ويبعتوها في خلال ساعتين مقابل التنازل عن الأرض.

وأنا لبست إسدالي وخرجت من باب الشقة، رجلي مكنتش شيلاني، مشيت في الشارع لحد مكتب البريد اللي في أول المنطقة. كانت الساعة داخلة على تلاتة، والمكتب بيقفل تلاتة ونص. دخلت وسحبت المبلغ كله.. رزم الفلوس كانت تقيلة في الشنطة، بس قلبي كان أتقل بكتير.

رجعت البيت وأنا بسحب رجلي بالعافية، العرق كان مغرق وشي والوجع في ضهري بدأ يزيد، دخلت لقيت ريهام قاعدة على الأرض وماسكة التليفون، رفعت راسها وقالتلي بفرحة ممزوجة بوجع

ابن خالي حول تمانين ألف على حسابي في البنك وسحبهم كاش دلوقتي وجايبهم في الطريق بالموتوسيكل.. الفلوس هتكون هنا قبل أربعة ونص!

اترميت على الكنبة وأنا بنهج، ومسكت بطني اللي كانت متحنطة من القلق. بصيت للساعة.. أربعة وتلت.

وبعد ربع ساعة، الباب خبط خبطة خفيفة، كان قريب ريهام، سلم الفلوس ومشي بسرعة. لمينا الفلوس كلها على الترابيزة.. كومة ورق بتمثل شقا عمري وأرض أم ريهام، محطوطين قصادنا عشان يدفعوا تمن كدبة وطيبة قلب عميا.

وفجأة، اتفتح باب الشقة بالمفتاح!

دخل محمود.. كان قالع جاكت البدلة وراميه على كتفه، هدومه متبهدلة، وشعره منكوش، وشه كان ميت تماماً. أول ما دخل وشاف الفلوس المرصوصة على الترابيزة، وشافني قاعدة بعبايتي وطرحتي وببصله بجمود، وشاف ريهام عينها في الأرض.. اتسمر مكانه.

المفتاح وقع من إيده على البلاط رن رنة خلت اللي في الشقة يتخض.

بصيت لمحمود ولقيت عينيه بتوسع برعب، وصوته طلع مبحوح كأنه بيطلع في الروح

إيه ده؟.. الفلوس دي بتاعة مين؟.. سارة.. أنتي عملتي إيه؟!

قومت وقفت على مهلي، وقفت قدامه وبصيت في عينيه مباشرة.. مكنتش في عيني دموع، كان فيه بس برود. شاورت على الفلوس وقلتله بصوت هادي ومخيف

الفلوس دي تمن سكوت الراجل يا محمود.. تمن ربع مليون جنيه كمبيالات كنت هدخل بيهم السجن وتفضحني وتفضح ولادك قبل ما يتولدوا.

محمود رجع خطوة لورا، وشه اتخطف وبقى لونه أزرق، وبلع ريقه وبص لريهام بصدمة، وبعدين بصلي وقال بتوسل وصوت مخنوق

سارة.. أنتي عرفتي؟ والله العظيم كنت هحلها.. والله العظيم كنت رايح أتصرف..

قاطعته بقسوة

كنت هتحلها إزاي؟ بالاستخبى؟ ولا بالكدب؟ بعت دهبي وسددت بيه ديون أخوك؟ واستلفت من البنك عشان تعملي الحقن المجهري وتوهمني إنك بطل؟ دهبي شقا عمري يروح في مصايب عماد وإنت تفضل ساكت وتستنى لما الراجل يجي يخبط على بابي ويهددني؟!

محمود مقدرش ينطق، دموعه نزلت فجأة، نزل على ركبه قدامي في نص الصالة، مسك إيدي وباسها وهو بيعيط بحرقة راجل مكسور

حقك عليا.. اضربيني، اطرديني، اعملي اللي انتي عايزاه بس متبصليش البصة دي! أنا كنت غبي، شيلت هم أكبر مني، مقدرتش أشوف أخويا بيضيع، ومقدرتش أكسر حلمك وأقولك مش هنعمل العملية.. قولت هشيل كل حاجة لوحدي وهسدد ومش هدخلكم في المشاكل.. والله العظيم مكنتش بنام، كنت بموت في اليوم مية مرة!

سحبت إيدي من بين إيديه ببطء، وقلتله

قوم اقف يا محمود.. الراجل زمانه جاي على المغرب. خد الفلوس دي، وخد الكمبيالات بتاعتك وبتاعة المحل، وخلص الليلة دي النهاردة.. بس اعرف حاجة واحدة كويس أوي.

محمود رفع وشه وبصلي بخوف حاجة إيه يا سارة؟

بصيتله وقلت وأنا بنهج وألم في بطني فجأة شد عليا بطريقة غريبة وعنيفة

الفلوس دي تمن حريتك وتمن اسم عيالي.. بس تمن ثقتي فيك يا محمود، بح خلاص.. ومفتكرش إنه هيرجع تاني أبداً.

وفجأة، وققبل ما محمود يرد، حسيت بوجع فظيع شبّ في ضهري ونزل على بطني كأن حزام نار بيتقفل حواليا، رجلي سابت تحتي، وصړخت صړخة مكتومة

آآآه.. محمود الحقني!!

ريهام ومحمود جريوا عليا، وبصيت تحت رجلي لقيت مية نازلة على السجادة ومخلوطة بنقط دم!

ريهام شهقت برعب وضربت على صدرها

يا مصيبتي! دي ولادة مبكرة! دي في الشهر السابع يا محمود! العيال بينزلوا، اتصل بالإسعاف بسرعة يا محمود!!

محمود اتشتت بين الفلوس اللي على الترابيزة وميعاد الراجل اللي كمان نص ساعة، وبيني وانا بقع على الأرض وبصرخ من الألم والولاد في بطني بيتحركوا بعنف كأنهم بيهربوا من الدنيا!

محمود شالني وهو بيصرخ ويبكي

سارة! متغمضيش عينك! فتحي عينك معايا! يا رب استرها يا رب، متحرمنيش منهم يا رب!!

ريهام لمت الفلوس في الشنطة بسرعة، وبصت للباب اللي فجأة خبط خبطات عنيفة جداً.. خبطات الراجل اللي وصل قبل ميعاده بربع ساعة، وصوته بيهز العمارة

افتح يا محمود! المغرب أذن والوقت خلص! يا الفلوس يا الحكومة واقفة تحت!

يتبع…
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”

3 من 3التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى