روايات وقصص

لكل مريض نفسي حكايه

الكاتب الخفى

بقلم الكاتب الخفي مش كل إنسان بيضحك يبقى سعيد، ومش كل واحد ساكت يبقى مرتاح، ومش كل شخص بيبعد عن الناس يبقى مغرور أو شايف نفسه عليهم… ساعات بيكون جواه وجع أكبر من إنه يتحكي، وذكريات بتطارده حتى وهو نايم، ذكريات بين ضلوعه محدش سامعها غيره.

 

في ناس بتصحى من النوم كل يوم وتحاول تقنع نفسها إنها بخير، تلبس وش القوة، وتخرج تواجه الدنيا، تضحك في وش الناس، وتقول: «الحمد لله، كله تمام»، وهي من جواها بتنهار حتة حتة. ناس بتخاف من الليل عشان الذكريات، وبتخاف من النهار عشان المواجهة، وبتخاف من نفسها لما تفضل لوحدها، لأن الوحدة ساعات بتفتح أبواب مقفولة بالعافية.

لكل إنسان حكاية، ولكل حكاية بداية محدش خد باله منها، ولكل وجع لحظة كان صاحب الوجع فيها محتاج حضن، مش محاضرة، محتاج حد يسمعه، مش حد يحكم عليه، محتاج إيد تتمدله، مش صباع يتشاور عليه.

ودي حكاية آدم…

آدم كان شاب عنده تمانية وعشرين سنة، ملامحه هادية، عينيه فيها حزن غريب، وابتسامته كانت كفيلة إنها تخدع أي حد يشوفه. شغال في شركة كبيرة، محبوب من زمايله، محترم مع الكل، وكل اللي يعرفوه كانوا بيقولوا إنه إنسان ناجح ومحظوظ، عنده شغل كويس، وبيت، وأم بتحبه، وأخ أصغر منه، وحياة أي شاب يتمناها.

لكن محدش كان يعرف إن آدم كل ليلة بيقعد على طرف سريره، ماسك صورة قديمة، ودموعه بتنزل في صمت، كأنه بيعتذر لحد مش موجود.

الصورة كانت لأبوه.

أبوه مات من سبع سنين، لكن موته ماكانش مجرد فراق أب عن ابنه، كان بداية لحكاية طويلة من الخوف والذنب والانكسار.

في اليوم اللي مات فيه أبوه، كان آدم عنده واحد وعشرين سنة. كان لسه في الجامعة، وكان أبوه دايمًا بيحلم يشوفه ناجح، ويقف وسط الناس رافع راسه بيه.

في الليلة دي، حصلت خناقة كبيرة بين آدم وأبوه. آدم كان مضغوط من الامتحانات، وعصبي، وأبوه كان بيحاول ينصحه، لكن الكلام اتحول لجدال، والجدال اتحول لصوت عالي.

قال آدم وقتها جملة عمره ما نسيها:

«يا بابا، أنا تعبت من تدخلك في حياتي! نفسي أعيش من غير ما تحاسبني على كل نفس باخده!»

أبوه سكت.

بص له بنظرة آدم فضل فاكرها طول عمره، نظرة وجع أكتر منها غضب، وبعدها قال بهدوء:

«ربنا يهديك يا ابني، ويكتب لك الخير.»

خرج الأب من الأوضة، وخرج آدم من البيت بعدها بدقايق، من غير ما يعرف إن دي آخر مرة هيسمع فيها صوت أبوه.

في نص الليل، جاله اتصال من أمه. صوتها كان متقطع، وكلامها مش مفهوم من كتر العياط.

«آدم… الحقني يا ابني… أبوك وقع… أبوك مش بيرد!»

جري آدم على المستشفى، وقلبه بيدق كأنه هيخرج من صدره. فضل واقف قدام باب الطوارئ، بيترعش، وكل ثانية كانت بتمر عليه كأنها سنة كاملة.

وبعد شوية، خرج الدكتور.

ماكانش محتاج يقول كتير.

آدم فهم من عينيه إن الدنيا انتهت.

أبوه مات بأزمة قلبية مفاجئة.

ومن يومها، آدم حبس نفسه في سجن ملوش باب.

كان كل ما يغمض عينيه يسمع آخر كلمة قالها لأبوه، وكل ما يفتكر نظرة أبوه يحس إن قلبه بيتعصر. فضل يسأل نفسه: يا ترى لو ماكنتش عليت صوتي؟ يا ترى لو كنت حضنته؟ يا ترى لو كنت قلت له إني بحبه بدل ما أجرحه؟

كان عارف بعقله إنه ماكانش يقدر يتنبأ باللي هحصل، وإن الوفاة مش ذنبه، لكن قلبه كان رافض يصدّق.

والأصعب من الموت كان اللي حصل بعده.

أمه، الست الطيبة اللي كانت بتعتبر آدم سندها، بدأت تنهار هي كمان. بقت كل ما تشوفه تقول له:

«أبوك كان بيحبك أوي يا آدم… كان نفسه يشوفك أحسن واحد في الدنيا.»

كانت بتقولها بحب، لكنها ماكانش تعرف إن الجملة دي كانت بتفتح جرحه كل مرة.

أما عمه، فكان له رأي تاني.

في عزاء أبوه، قرب منه وقال بصوت واطي لكنه مليان لوم:

«أبوك مات وهو زعلان منك. خلي الكلام ده في بالك طول عمرك.»

الجملة دخلت قلب آدم زي السكينة.

ومن ساعتها، بقى مقتنع إنه ما يستحقش الفرح، ولا النجاح، ولا الحب. كان كل ما يضحك يحس إنه بيخون ذكرى أبوه، وكل ما يفرح بحاجة يفتكر إن أبوه مش موجود يشوفها.

عدت السنين، واتخرج آدم، واشتغل، وحقق الحلم اللي أبوه كان بيتمناه. يوم ما استلم أول مرتب، اشترى ساعة غالية وحطها قدام صورة أبوه.

قعد قدام الصورة وقال:

«شايف يا بابا؟ أنا بقيت زي ما كنت بتمنى. بس كنت أتمنى تكون معايا.»

وبكى.

بكى زي طفل صغير ضايع في شارع طويل، ومش عارف يرجع بيته.

لكن آدم ماكانش بيحكي لحد.

لما أمه تسأله: «مالك يا حبيبي؟»

يرد: «مفيش يا أمي، شوية ضغط شغل.»

ولما صاحبه يسأله ليه بقى ساكت ومش بيخرج زي زمان، يقول له: «كبرنا يا عم، وكل واحد بقى عنده مسؤوليات.»

ولما حد يقول له إنه اتغير، يضحك ويقول:

«الدنيا بتغيرنا يا صاحبي.»

السابق1 من 4
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى