روايات وقصص

جدعنه سلفتى ٢

حكايات منى السيد

حكايات مني السيد حصري حبست نفسي، والصالة فجأة بقت شبه المقبرة مفيهاش صوت غير شخير نفسي اللي بيطلع بالعافية، وصوت عياط ريهام المكتوم وهي دافنة وشها في كفوف إيديها. حسيت إن الأرض بتلف بيا، والحيطان بتميل عليا، والتوأم في بطني بيتحركوا بعنف كأنهم حاسين بالنار اللي ولعت في صدري فجأة.

 

نزلت بركبي على الأرض قصادها، مكنتش حاسة بوجع الحمل ولا بتحذيرات الدكتور؛ كل اللي كان شاغلني هو كلمة واحدة دهبي اتباع وخلاص؟

مسكت إيديها الاتنين وشديتهم عن وشها بقوة عمري ما تخيلت إنها عندي في حالتي دي، وبصيت في عينيها المتورمة وصړخت بصوت مخنوق ومبحوح

عشان إيه يا ريهام؟! انطقي متسكتيش! دهبي اللي قلعته من رقبتي وإيدي، الدهب اللي شقا أبويا كان فيه وفرحة عمري، اتباع عشان إيه ومحمود وداه فين؟! والراجل اللي كان على الباب ده عايز فلوس ليه؟! اتكلمي قبل ما أموت في جلدي هنا!

ريهام كانت بتترعش زي الورقة في مهب الريح، شفايفها كانت بتتحرك بس مفيش صوت طالع، ولما شافت الاهنيار اللي أنا فيه، اتخضت أكتر وخافت عليا، رمت دراعاتها حوالين كتفي وحضنتني جامد وهي بتعيط

وتقول

اهدي يا سارة، عشان خاطر اللي في بطنك اهدي يا بنتي، والله العظيم محمود بيحبك ومقصدش يئذيكي، اسمعيني بس ومتحكميش عليه بالإعدام، القصة مش زي ما إنتِ فاكرة خالص!

زقيتها بعيد عني بإيدي الاتنين وقومت وقفت بالعافية وأنا سانة ضهري على الحيطة، وقلت بصوت بيقطع من البكا

مش ههدى! محدش يقولي اهدي! أنتوا عيشتوني في تمثيلية.. أنتي طالعة نازلة تخدميني وتعمليلي الأكل وتطبطبي عليا، ومحمود يدخل يبوس راسي ويقولي إنتِ عيني اللي بشوف بيها، وانتوا من ورا ضهري عاملين مصيبة! دهبي راح فين؟! ومصاريف الحقن المجهري والمستشفيات دي كانت منين طالما الدهب مراحش ليها؟!

ريهام مسحت دموعها بطرحتها وقامت وقفت قدامي، سندتني بالعافية وقعدتني على الكنبة، وقعدت على ركبها تحت رجلي ومسكت إيدي بتوسل

هحكيلك.. هحكيلك كل حاجة من طقطق لسلامو عليكم، بس توعديني تفضلي قاعدة مكانك ومتعمليش في نفسك حاجة. محمود أخو جوزي وأنا عارفة معدنه، وعارفة إنه غلط غلطة عمره بس كان غصب عنه.

خدت نفس عميق وبلعت ريقها وبدأت تتكلم، وكل كلمة كانت بتنزل على دماغي زي المرزبة

فاكرة يا سارة من تسع شهور،

لما جه عماد جوزي وقالك إن المحل فيه مشكلة بضاعة وإنه محتاج يسافر بورسعيد أسبوعين يخلص ورق؟ ساعتها إنتِ ومحمود كنتوا لسه بتلفوا على مراكز الحقن المجهري، ومكنتوستوش لسه استقريتوا هتعملوا العملية فين.

هزيت راسي بذهول أيوة فاكرة.. وعماد سافر ورجع وقال إن الدنيا اتسلكت.. إيه علاقة ده بدهبي؟

ريهام عينيها دمعت تاني وقالت بصوت واطي

عماد مكنش في بورسعيد يا سارة.. عماد كان محبوس في قسم الهرم! عماد كان دخل في صفقة أجهزة كهربائية مع ناس، ومضى شيكات على بياض، والبضاعة طلعت مش مضبوطة، وأصحاب الشيكات رفعوا قضايا وخدوا عليه حكم حبس تلات سنين واجب النفاذ. يومها عماد كان هيروح في الرجلين، والبيت كان هيتخرب، وعيالي كانوا هيتشردوا في الشارع وأبوهم في السجن.

بصيتلها وتنحت، وعقلي بدأ يربط الخيوط ببعض، وسألتها برعب

ومحمود عمل إيه؟

ريهام وطت راسها في الأرض وقالت بقهر

محمود أول ما عرف اتجنن.. عماد أخوه الكبير وسنده وأبوه بعد ما عمي مات. محمود مقدرش يشوف أخوه مكلبش وفي القفص وعياله بيعيطوا. المحامي قال مفيش حل غير إننا نسدد للناس فلوسهم كاش عشان يتنازلوا قبل ما الحكم يتثبت.

السابق1 من 3
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى