عام

ست الحسن ل ريناد يوسف

جمالات:
يمه، قولتلك إني مهعاودش لبيت أبو عزام ده مرة تانية. ده مفيش غير الكلام العالي والزعل، وعامل حاله شديد ومفيش منه فايدة، وإني بصراحة مبقتش متحملاه. خلوني أقعد حداكم.

الأم:
هوسي واكتمي خالص. إيه الكلام ده؟ إحنا وبعدين تتطلقي كيف؟ واللي في بطنك ده هتعملي فيه إيه؟

جمالات:
أولده وأهديهوله. إني لا عايزاه ولا عايزة حاجة من عنده.

كارم، الأب، دخل الأوضة فجأة بعد ما سمع كلام بته، وقال لها:

كارم:
إيه اللي سمعته ده يا جمالات؟ إحنا حدانا بنته تتطلق برضك؟ شكلي صوح على قول عزام جوزك، معرفتش أربيكي.

دلوك همي لمي خلجاتك، هوديكي على بيت جوزك، وتلمي روحك وتقعدي هناك تحت مسؤوليته، وتربي ولدك في دار أبوه.

يا كده يا إما أفضل محتار في أمرك ومش عارف أعمل إيه.

جمالات:
له يا بوي، مرايحةش. ولو غصبتوني أعاودله، إني مش هكون مرتاحة. إني هقعد حداكم هنا، أساعدكم في البيت، ولا إني أعاودله.

كارم:
يا بتي فهميني بس، الراجل عمل إيه لكل ده؟ حتى عمره ما تجاوز عليكي، ولا يوم قالك كلمة في أهلك. يبقى إيه اللي خلاكي تكرهيه كده؟

جمالات:
أقل منينا، ومش عنده حاجات زي أخويا. عيالي اللي هخلفهم دول هيكون عندهم إيه لما يكبروا؟ هيكونوا كيف عيال أخوي عسران ومعاهم زيهم؟

الأم:
وإنتي مالك ومال عيال غيرك؟ كل واحد ورزقه. ويمكن جوزك ربنا يكرمه من وسع، ويبقى معاه أكتر من أخوكي. ده لسه شباب والعمر قدامه.

كارم:
ما هي دي قلة الرضا والجوع اللي عمره ما يخلي صاحبه يشوف الخير اللي عنده.

اسمعي يا جمالات، جوزك مراضيش ييجي ياخدك ولا عايزك. يمين بالله أخليكي حداي لغاية ما تولدي، وبعدها أخليه ياخد ولده، وأشوفلك حل يريح الجميع. وخليكي فاكرة كلامي ده زين.

بعد مرور ٣ شهور…

أم عواد دخلت البيت تزغرد، واتلموا اللي في البيت كلهم وطلعوا من أوضهم على حس الزغاريد، ووقفوا قبالها يسألوها عن السبب.

بصت لحسنة وقالتلهم:

عنبر:
عزغرد عشان عواد ولدي سمع كلامي، والنهارده كتب كتابه على نعمة بت الخياط، نقاوة عيني وأم عياله بعون الله. زغردي يا بت منك ليها، وافرحوا لأخوكم.

وبصت لحسنة وكملت بكلام فيه شماتة:

من النهارده جاية ست الدار اللي هتخلف الواد وتاخد القلب وتملك وتتحكم. واللي كان مسنود على حيط المحبة، هتتهد فوق دماغه. عرفتوا دلوك إن ولدي مهيطلعش عن طوعي، واللي عايزاه عنبر هو اللي عيكون.

حسنة سمعت كلامها وحست إن الدنيا لفت بيها مرة واحدة، ومحستش إلا وهي بتقع على الأرض وتغيب عن الوعي، بعد ما اتصدمت أكبر صدمة في عمرها وسمعت آخر حاجة كانت متوقعة تسمعها.

ست الحسن

فاقت حسنة على صوت عواد وهو بيطبطب على خدها ويقول:

عواد:
قومي يا حسنة، قومي يا بت. متخوفيش قلبي عليكي. افهمي مني الأول قبل ما تتعبي.

زحت يده عنها وقالت بوجع:

حسنة:
شيل إيدك عني يا عواد. إيدك دي اللي هتتمد على وحدة تانية من اليوم وطالع. متلمسنيش.

قولتلي مش هتهوني، وهونت. قولتلي مهعملهاش، وعملتها. إنت وجعتني في نص قلبي يا عواد، قلبي اللي حبك واعتبرك كل أهله وناسه، وأمنتك على روحي، وإنت خيبت أماني.

عواد:
وه يا حسنة، إيه كل الحديت الكبير ده؟ وإني عيملت إيه؟ كل ده عشان هتجوز بحلال ربنا؟ طمع في الواد اللي يشيل اسمي، مش في أي حاجة تانية.

الجواز شرع ربنا يا حسنة، ومن حقي، وإني لا ظلمتك ولا جورت عليكي بجوازي. بالعكس، هتفضلي كيف ما إنتي، الغالية المتربعة في القلب، واللي هتاجي هتكون أم عيالي.

حسنة ردت عليه بحزن:

حسنة:
إيوه، إيوه، ماني عارفة كل اللي هيتقال ده.

وأول ما تجيبلك الواد هترمي حسنة للناس وتنسيها. حسنة اللي تحملت عشان خاطرك اللي مفيش وحدة تتحمله. حسنة اللي جابت سنينها معاك صبر وتعب من الكل، وكانت تقول: يكفيني عواد، عوض ليا وجبر لقلبي.

ودلوك حتى عواد جه عليها مع الناس والدنيا والزمن.

على العموم، إمبارك عليك العروسة. ربنا يجعلها وش خير عليك، وتجيبلك ولد واتنين وعشرة. وإني ليا رب اسمه كريم، واللي خلقني مش هينساني.

عواد:
تقصدي إيه بكلامك ده يا حسنة؟

حسنة:
أقصد إني مهتحملش مرة تانية تشاركني فيك قدام عيني يا عواد. تقوم دلوك في التو واللحظة تجيب المأذون اللي عقدلك عشان يطلقنا.

عواد:
إنتي تعبانة من الصدمة يا حسنة ولا إيه؟ كيف يعني عايزة تتطلقي؟

حسنة:
كيف الناس ما بتتطلق يا عواد؟

عواد:
وتهوني عليكي تهمليني؟

حسنة:
ماني هنت عليك، ولا هو حلو ليك وعفش ليا.

عواد:
طيب هتروحي فين؟ إنتي ليكيش موطرح غير إهنه.

حسنة:
أرض الله واسعة. وقلتلك قبل سابق، اللي خلقني مش هينساني.

عواد:
ولو قولتلك إني مش هطلق يا حسنة؟

حسنة:
يبقى تطلق عروستك الجديدة. مليهاش حل تالت يا عواد، يا أنا يا هي.

عواد:
اعقلي يا بت، الناس متتجنيش.

حسنة:
له، إني اتجنيت يا عواد، ومعادش فيا عقل.

أمه بصتله وشاورتله، وخدته على جنب وقالتله:

عنبر:
اسمع كلامي يا عواد. لو صممت، طلقها، وبعد ما تهدى الأمور تشوفوا اللي فيه الخير. وهي لما تبعد شوية تهدى وتعرف قيمة بيتها.

عواد:
بس يمه…

عنبر:
مفيش بس. اسمع كلامي وامشي وراي، وانت تكسب رضاي وراحة بالك كمان.

سكت عواد يفكر شوية، وبعدها قال لأمه:

عواد:
بس إني خايف عليها قوي يا يمه، لتجرالها حاجة من الزعل والقهر.

عنبر:
متخافش، الحريم أقوى مما إنت فاكر. اعمل اللي بقولك عليه، وهات أم عيالك وخليك تلحق طريق الخلف، إنت معدتش صغير.

هز عواد دماغه بموافقة، وراح لحسنة ووقف قدامها وقالها:

عواد:
يعني إنتي آخر كلام حداكي إيه يا حسنة؟

حسنة:
يا تلغي جوازتك يا تطلقني يا عواد.

عواد:
إنتي طالق.

بصتله بصدمة وهي مش مصدقة اللي سمعته، وقامت جري دخلت أوضتها، وابتدت تلم في خلجاتها وحاجتها.

واتلفتت حواليها وهي مش عارفة تاخد ذكرياتها اللي عاشتها في الأوضة ومعاه. كانت ذكريات كتير قوي، وعايزين عمر كامل عشان تقدر تحملهم معاها.

نزلت السلم وكان عواد قاعد مستنيها.

عواد:
هتروحي فين دلوك؟

طلعت من البيت ومردتش. وقفت في الشارع وهي مش عارفة تروح فين، وفي الآخر راحت على بيت صاحبتها بهانة وخبطت عليه.

بهانة:
مين اللي عالباب؟

حسنة:
إني حسنة يا بهانة، افتحيلي.

بهانة:
وه مالك يا حسنة؟ عتبكي ليه وإيه الحاجات اللي معاكي دي؟

حسنة:
عواد طلقني يا بهانة واتجوز عليا.

بهانة:
يا ساتر! إزاي؟ وإيه اللي حصل؟

حسنة:
بس دخليني الأول. إني مليش موطرح أروحه دلوك، وخابرة إن جوزك مسافر ومهيعاودش غير بعد شهرين تلاتة. خليني أقعد حداكي لحد ما أشوفلي موطرح.

بهانة:
خشي يا حسنة، البيت بيتك. أدي أخرة اللي يعمل المعروف في غير أهله. دانتي حتى البيت اللي ورثتيه من جدتك بعتيه وعالجتيه بيه لما كان تعبان، أهو رماكي في أول محطة.

حسنة:
بزياداكي من الكلام ده يا بهانة. إني مناقصاشي، وقلبي تعبان لحاله.

دخلت وقعدت لحالها تفكر هتعمل إيه في اللي جاي. وبعد ما صفيت لحالها، أول شيء قررته إنها تنزل تشتغل عشان تقدر تصرف على روحها ومتمدش إيدها لحد.

وكلمت بهانة تشوفلها شغل، حتى من قبل ما تخلص عدتها، لأنها محتاجة. وقالت: ربنا غفور رحيم.

وكمان قررت إنها تغطي وشها ومتظهرهوش لحد طول فترة العدة.

وبعد يومين كانت بهانة جايبالها شغل مع البنات في غيط الحج منصور، كبير الناحية، وقالتلها:

بهانة:
هتطلعي الغيط تجمعي القطن.

وحسنة وافقت.

وفنفس الليلة سمعوا فرحة وعرفت حسنة إن عواد عيتجوز، والليلة فرحه. وفضلت تبكي على الود والعِشرة اللي هانوا، وعلى سنين العمر اللي راحت.

قامت الصبح بدري ونزلت الغيط مع البنات.

وهناك…

عزام:
يلا شدوا الهمة منكم لها. مش هتتدلّعوا، عايزين ننجزوا.

واحدة من البنات:
ما إحنا شغالين أهه يا سي عزام، ولا لازمن الكلمتين دول؟

عزام:
اتحدتي عن حالك يا عظيمة. إني شايف إن فيه ناس مبتشتغلش وإيدها وانية.

وكان بيبص على حسنة وهو بيتكلم.

عظيمة:
دي حسنة، وهي جديدة. أول نوبة تطلع وتشتغل في الغيط يوم ولا تنين، وإيدها تاخد وتبقى أشطر وحدة فينا.

عزام بصلها، لقاها مش معاهم ولا كأن الكلام عليها، وعمالة تخلص هدومها من فروع شجر القطن وتجمع في القطن، وتشتغل بهدوء.

ابتسم على اجتهادها وسأل عظيمة:

عزام:
بت مين هي يا عظيمة؟ وليه مغطية وشها؟ شكلها مش من نواحينا.

عظيمة:
له من نواحينا. وبعدين دي مش بت، دي مرت عواد الأجير، قصدي طليقته، ومغطية وشها عشان لسه في العدة.

عزام:
عواد اللي كان فرحه عشيه على بت الخياط؟

عظيمة:
أيوه هو.

بص عزام لحسنة بتركيز، وهي رفعت عيونها عليه. وهمس لما شافها:

عزام:
يااا بوي، البهيم يهمل عيون الغزلان دي ويروح ياخد نعمة الحولة؟

فضل طول الوقت مراقبها وهي عتشتغل، وشكلها باين عليها إنها مش متعودة على شغل الغيطان قبل سابق.

وطول الوقت البنات تضحك وتهزر وتغني أغاني جمع المحصول، وهي ساكتة وهادية، تبص بعيونها بس وتسمع، لغاية ما خلص اليوم وجيه وقت قبض الأجرة.

قبض عزام الكل، وهي خلاها للآخر. وجه عندها ومدلها الأجرة وهو بيقول:

عزام:
خدي يا… مع إنك مشتغلتيش زين النهارده، والمفروض تاخدي نص يومية بس.

هي سمعت الكلام، ومسكت الفلوس اللي عطهالها، وقسمتها على اتنين، ومدتله نصهم وقالتله:

حسنة:
وإني معاخدش زيادة عن حقي واللي استحقه.

عزام:
وه، إنتي زعلتي ولا إيه؟ إني بهزر معاكي، متحدتش بجد. بس إنتي باين عليكي طبعك حامي ومبتحمليش.

خدي يا بنتي فلوسك، ربنا يباركلك فيهم. إنتي تعبتي، ودي حقك. ومش ذنبك إنك أول مرة متعرفيش تشتغلي.

حسنة:
له، ما عاوزاش. إني قلت مش هاخد غير حقي وخلاص. ولما أبقى أتعلم الشغل زين، أبقى آخد أجرتي كاملة.

خلصت كلامها ومشيت طوالي من قدامه، وهو فضل مراقبها وهي عتمشي، وبيقول في عقل باله:

إيه عزة النفس دي اللي عمري ما شفتها على وحدة قبل سابق؟

وراح البيت، وهو طول الوقت عيفكر في حسنة وموقفها وكلامها.

ولما أمه شافته شارد، سألته:

جواهر:
مالك يا عزام؟ عتفكر في إيه؟

عزام:
لا يا يمه، مرتي إيه بس؟ هي جمالات حد يتوحشها؟ إني عفكر في شي تاني.

جواهر:
عتفكر في إيه يا ولدي؟ قولي.

عزام:
أقولك يمه، إني عايز أسألك سؤال. هو عواد طلق مرته ليه؟

جواهر:
ما أعرفش يا ولدي، بس من زمان أمه عتقول إنها مش هتخلف. يمكن عشان إكده اتجوز عليها وطلقها.

عزام:
أيوه يا يمه، بس هو اللي يتجوز عشان الخلف، يطلق مرته ليه؟ وخصوصي وهي اللي مش هتخلف؟ مكان خلاها معاه ويقعد الاثنين مع بعض في بيت واحد.

جواهر:
الله أعلم يا ولدي، ظروف الناس إيه. وبعدين إحنا مالناش صالح بحد. خلينا في حالنا، البيوت مليانة أسرار.

عزام:
طيب يا يمه، وغلاوتي عندك، تعرفي ليه هو طلقها؟

جواهر:
مالك يا عزام حاطط الموضوع في بالك قوي كده ليه؟

عزام:
مفيش يا يمه، بس اسأليلي ورضي فضولي.

جواهر:
ماشي يا ولدي، هبقى أسألك بكرة.

وثاني يوم راحت حسنة الغيط، وفضل عزام برضه مراقبها، وسأل عليها واحد من الرجالة الشغالين في الأرض معاه:

عزام:
ليه عواد طلقها؟

فقال له إنها هي اللي طلبت الطلاق ومارضيِتش تقعد معاه على زوجة أخرى، وخيرته وقالتله: يا مرتك الجديدة يا إما إني.

وهو اختار مرته الجديدة عشان يخلف. وبصراحة هو شايف إن ده حقه، وهي اتطلقت بدل ما كانت في بيتها مرتاحة. أهي طلعت تشقى في الأرض وتشتغل بلقمتها.

عزام:
طيب وهي قاعده فين دلوك؟ إني أسمع إنها مليهاش حد ويتيمة.

الرجل:
قاعدة حدا صاحبتها بهانة. جوزها مسافر، وراحت تقعد حداها لحد ما ييجي جوزها.

وهي هتتنقل دلوك من مكان لمكان لغاية ما ييجيها واحد يكون عايزلها بيت تستقر فيه. مالها لو قعدت خدمت جوزها وأهله، واللي تعرفه أحسن من اللي متعرفهوش.

عزام:
إلا هي حلوة ياد يا خميس؟

الرجل:
إلا حلوة يا سي عزام، دي ست الحسن كله.

عاود الأجير لشغله، وفضل عزام متابع حسنة، اللي شغلها اتحسن قوي النهارده عن امبارح، وبرضك على نفس هدوئها وتقلها ورزانتها.

ولما جه وقت القبض، اداها أجرتها وبزيادة، وقاللها:

عزام:
عشان النهارده اشتغلتي زين، إني عايلك.

وهي خدت منه الفلوس من سكات ورجعت عالبيت.

بهانة:
هاه يا حسنة، مقولتليش مرتاحة لشغلك ومرمطتك؟

حسنة:
الشغل والتعب أهون من المذلة وكسرة النفس يا بهانة. وبعدين إني مرتاحة وزينة، وعن قريب هشوفلي موطرح غير إهنه أقعد فيه. عارفة إني تقلت عليكي.

بهانة:
أخص عليكي يا حسنة! وهو إني عشان أطمن عليكي تفكري إني كليت منك ومن قعدتك حداي؟ لا والله. دانتي تقعدي وتتربعي، وعين فرش وعين غطا.

حسنة:
ربنا يخليكي ليا يا بهانة. إني معارفاشي من غيرك كنت رحت فين ولا جيت منين.

بهانة:
متقوليش إكده. إحنا أهل وخوات، وبيتي مفتوحلك دايمًا.

مرت الأيام والشهور، وعدت حسنة، وخلاص النهارده آخر يوم.

واتفاجأت بعواد جاي يخبط على باب بهانة ويقولها إنه عايز حسنة.

طلعتله حسنة:

حسنة:
عاوز إيه يا عواد مني؟

عواد:
مش بزياداكي إكده. إني سبتك على راحتك، والنهارده جاي أخدك لبيتك وأردك.

وتطلق نعمة.

حسنة:
أطلقها كيف بس؟ دي حبلى.

سكتت حسنة شوية وهي حاسة إن الخبر خنقها، وبعدها قالتله:

حسنة:
يبقى تكتفي بالواد اللي جاي لك ومرتك الجديدة، وتهمل حسنة وتنساها.

خلصت كلامها وقفلت الباب في وشه، وعاودت للدار تبكي على حظها وقلة حيلتها.

وطلبت من ربها الصبر على الوجع اللي هي فيه، وقررت إنها تدورلها على سكن تاني، وخصوصي إن جوز بهانة خلاص قرب يعاود.

وتاني يوم نزلت الشغل في غيط منصور، وكانت كاشفة وشها.

وبمجرد ما شافها عزام لأول مرة من غير غطا، وقف قدامها مذهول من جمالها، وعرف إن عدتها خلصت.

عاود لأمه جري، وأول ما شافها قالها:

عزام:
يمه، إني عايز أتجوز. عايزك تخطبيلي النهارده.

جواهر:
وه أخطبلك النهارده مين يا ولدي؟ اللي جابك رامح على ملا وشك؟

عزام:
حسنة يا يمه، طليقة عواد. النهارده خلصت عدتها وشفتها. والله يا يمه شايلة من الحسن والحلا اللي مفيش مرة شايلاه.

جواهر:
هتاخد مطلقة يا عزام؟

عزام:
ومالها المطلقة يمه؟ هي ناقصة؟

جواهر:
طيب ومرتك؟

عزام:
هي فين مرتي؟ مرتي هتولد، وآخد ولدي منها، وكل حي يروح لحاله.

جواهر:
بس يا ولدي، مرتك على وش ولادة، والزعل يمكن يأثر على اللي في بطنها.

عزام:
مهتزعلش يا يمه، ولا إني في بالها من الأساس. روحي بس إنتي لحسنة واخطبيهالي قبل ما حد يخطفها وتروح عليا.

جواهر:
بس مبتخلفش يا عزام، ومش هترضى إنك تتجوز عليها لأجل الخلف. دي مرضيتهاش مع جوزها الأولاني.

عزام:
وإني معوزش خلفه. إني عايز مرة تريحني وأرتاح معاها. والخلفه رزق وربك اللي عيقسم الأرزاق.

جواهر:
ونعم بالله يا ولدي. خلاص، بكرة هروحلها وأخطبهالك، بس قول لأبوك فلاول.

عزام:
له يمه، النهارده وأبوي إني هقوله. متشغليش بالك.

وراحت أم عزام خطبت حسنة، اللي في الأول كانت هترفض. وبعد ما فكرت فيها، شافت إنها فرصتها الوحيدة إنها تستر نفسها في بيت، وكمان عزام ولد منصور من كبار أهل الناحية، وراجل معروف بالهيبة والاستقرار.

فوافقت عليه، وخصوصي بعد ما أمه عرفتها إنها هتربي ولده اللي مستني مرته تولده، وياخده منها بعدين.

ودي أكتر حاجة فرحتها في الموضوع، إنها هيكونلها ولد تربيه ويعوضها الحرمان، وكأن ربنا قرر يعوضها عن كل حاجة بحاجات أحسن منها.

وتم الجواز، وده خلى عواد وأمه يندموا، بعد ما كانت أمه فاكرة إن حسنة هتتعب بعد فراقه، أهي هتتجوز سيد البلد.

وعواد فضل يلوم أمه، لأنه بسبب كلامها خسر حسنة اللي كانت مريحاه، وجاب نعمة اللي من يوم ما دخلت الدار ومشاكلها مبتخلصش، ومش بتعمل حاجات كتير من شغل البيت، ومقضياها راحة.

وخلص عواد وأمه وأخواته البنات نصيبهم من الندم، وحتى مرت أخوه مسلمة منه، وكان كل ما يقارن بينها وبين حسنة، الندم والحسرة يملوا قلبه.

أما حسنة فاتجوزت عزام وصارت ست الدار ومرت البيه، وبدل ما كانت شايلة كل الشغل لوحدها، بقى حداها اللي يساعدها في البيت.

بس الطبيخ وكل حاجة تخص عزام جوزها هي اللي كانت بتعملهاله بإيدها.

وبعد ما عاشرته وشافت معاملته وحنّيته، اكتشفت إنها كانت راضية بحياة صعبة مع عواد، لكنها الآن وجدت راحة واهتمام كانت تتمناهم.

أما عزام، فمع حسنة حس إن ربنا عوضه بيها. لقى فيها كل اللي كان يتمناه: تقل ورزانة ونضافة واهتمام واحترام.

كانت طول الوقت محسساه إنه سيدها وتاج راسها، مش حد أقل منها، ومش بتعايره بجوازها منه زي ما كانت جمالات بتعمل.

وحتى أمه وأبوه لما شافوا الفرق بين حسنة وبين جمالات، زادت محبتها في قلوبهم، واعتبروها بنتهم اللي مخلفوهاش.

عدت الأيام وولدت جمالات وجابت بنت، ومن أول يوم راحت البنت لأبوها، وبقت بعيدة عن جمالات.

ولما شافتها حسنة، حضنتها وفضلت تبكي وتحمد ربها، واتحركت جواها كل مشاعر الأمومة، وحست إنها بنتها من قلبها.

وربتها لغاية ما تمت سنتين، كانتلها فيهم ونعم الأم.

وفجأة والكل قاعد في قعدة سمر ومبسوطين وبيضحكوا، حست حسنة بتعب ومعدتها قلبت، وقامت ترجع.

عزام بقلق:
مالك يا حسنة؟ فيكي إيه؟

حسنة:
معارفاش يا عزام، كني خدت برد في معدتي.

عزام:
طيب قومي معاي، هوديكي للحكيمة.

حسنة:
له، ما مستاهلاش. إني هشرب حاجة دافية وأبقى زينة دلوك.

عزام:
له، إني قولت قومي يعني قومي.

وخدها وراح بيها على الوحدة الصحية، وكشفلها هناك.

وسمعوا الخبر اللي خلاهم مش مصدقين نفسهم: حسنة حامل!

طلعوا من الوحدة وراحوا لدكتورة تانية وتالتة، والكل أكد لهم الخبر.

وعاودوا يومها وهما طايرين من الفرحة، وبشروا منصور ومرته، اللي ندروا لله نذر بس تقوم حسنة بالسلامة وتجيبلهم الحفيد.

وبعد سبعة شهور كانت حسنة شايلة منصور الصغير على دراعها، ودموع الفرحة مغرقة وشها.

حمدت ربها ألف حمد على عوضه وجبره اللي فاق خيالها.

وبعد ما كانت فاكرة إن حياتها انتهت ببعدها عن عواد وتخليه عنها، اكتشفت إن اللي حصل كان خطوة لحياة جديدة أحسن وأهدى.

وعرفت إن مش كل حاجة بنخسرها معناها إن حياتنا انتهت، وإن اللي عند ربنا أبواب خير وجبر مبتخلصش، ومتجهزة مخصوص للحامدين الصابرين.

تمت

2 من 2التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى