
أنا كنت فى البلكونه بطمن على ولادى وهما بيلعبوا فى الشارع، لما شوفت البنى آدم الغريب ده وهو واقف مدارى ورا شجره وبيبص على الولاد. معرفش إيه اللى خلانى أقف وأركز فيه وفى نظراته، يمكن عشان شكله الغريب أو عشان بيبص على العيال، فخفت لا يضايقهم.
بس فجأه لقيت عينه راحت على البلكونه اللى أنا فيها، وعينه جات عليا. خوفت وعملت نفسى بلم الغسيل، وأنا قلبى بيدق بسرعه. عايزه أرفع راسى مش قادره.
خلصت لم الغسيل اللى مكانش لسه نشف أساساً ودخلت بيه، قعدت أفرده على كنب الصالون عشان ينشف، ورحت أبص تانى فى البلكونه. لقيته واقف مع عيل من اللى كانوا بيلعبوا وبيكلمه.
أنا وقفت وأنا مركزه، وهو بيتكلم مع الولد. ولأن عماراتنا أكبر عماره فى المنطقه وأنا ساكنه فى آخر دور، بقيت شيفاه كويس أوى وهو بيرجع بالولد وبيدخل بيه فى الزرعات.
أنا خفت لا يكون واخد الولد لمكان بعيد ويضايقه. حاولت أصرخ، خوفت أنادى أى حد فى الشارع، وخوفت محدش يصدقنى، وأنا مخى بيروح ويجى فى ألف فكره.
عايزه أعرف إيه الحكايه. روحت ندهت جارتى سعاد، اللى أول ما شافتنى اتفزعت وأنا بقولها:
– البسى عبايتك وتعالى معايا بسرعه.
سعاد: إيه؟ فى إيه؟
روحت قلتلها بسرعه وباختصار:
– فى راجل شكله غريب دخل بابن الحاج هارون الزراعات اللى قبالنا وأنا خايفه يضايقه.
صرخت سعاد وهى بتجرى تلبس العبايه:
– أنا جايه معاكى يا أختى. دى أمه سميره جابته على تلت بنات، يارب استر يارب وميطلعش شخص مش كويس ويضايقه.
نزلت معايا بسرعه، وإحنا الاتنين بخطوتنا سريعه تقريباً بنجرى، لدرجة بنتى شافتنى ندهت عليا وملحقتش تحصلنى. وأنا بمشى بسرعه نفسى ألحق الواد.
بس فجأه سعاد وقفت وقالتلى:
– إحنا ماينفعش نروح لوحدنا، إحنا اتنين ستات. عايزين راجل يروح معانا.
أنا وافقتها فى الرأى، وروحنا عدينا على عم حمزه صاحب القهوه، اللى خاف لما قولناله هو كمان، وقال لراجلين تانين يجوا معاه.
وفعلاً بالخطوه السريعه دخلنا الزراعات وإحنا بندور على الراجل الغريب والولد. مخدناش وقت كتير لما سمعنا صوت جاى من عشه معموله من الجريد. بسرعه الرجاله قربوا من العشه.
وإحنا بخطوتنا المتواضعه على ما وصلنا، أنا وجارتى والراجل الكبير، لقينا الوضع كالتالى: الرجاله واقفين وهما بيبصولنا بضيق وزهق، والراجل أبو شكل غريب قاعد على الأرض وماسك سبحه وهو بيحرك رقبته وبيتكلم بأصوات غريبه، وابن الحاج هارون ماسك كيس كبير مليان منجه.
وقفت أنا وسعاد مبلمين، مش فاهمين حاجه، لكن عم حمزه بدأ على طول واتكلم:
– إيه يا رجاله؟ ماتفهمونى.
رد واحد من الرجاله وهو بيبص علينا بغيظ:
– مافيش يا عم حمزه. الراجل زى ما أنت شايفه على باب الله، والولد جه معاه برضاه لما الراجل قال له: تعالى معايا هانزلك منجه من الشجره ووزعها على صحابك. واسأله بنفسك. الستات هما اللى كبروا الموضوع.
قال جملته الأخيره وهو بيضغط على أسنانه من الغيظ.
عم حمزه ماكدبش خبر، سأل الولد على طول:
– الراجل ده عملك حاجه يا أيمن؟
رد الولد:
– لا يا عم حمزه. ده راجل غلبان. ده امبارح مدى مهران صاحبى كيس حلويات كبير ووزعه علينا برضوا.
روحت أنا مدخله:
– يعنى إيه بقى؟ بياخد الولد فى الخلا عشان يديله منجه بدل ما يوزعها بنفسه؟
فجأه راسه بطلت هز، وهو بيبصلى وبيتكلم بهدوء:
– وأنا هضايق ولاد الناس ليه؟ ده أنا راجل فى حالى يا بنتى، وأديكم شوفتوا بنفسكوا، الولد كويس وسليم.
دخل الراجل التانى فى الكلام:
– ده مسعود راجل طيب، مبيعملش حاجه لحد، وهو بيحب العيال الصغيره وأى حاجه فى إيده بيديها للعيال.
هاتكلم تانى قطع عليا عم حمزه:
– خلاص يا جماعه حصل خير. يلا يا بنى تعالى معانا.
أنا مقتنعتش بالكلام ده، خصوصاً لما شوفت نظرة الراجل اللى مريحتنيش، بس عشان كلام الرجاله مشيت معاهم.
لكن برضو بقيت أراقبه وأنا واقفه فى البلكونه. لما ألاقيه واقف مع عيل من العيال، نفسى أعرف حكايته إيه.
وهو دايماً كان بياخد باله، لحد ما كنت فى مره راجعه من السوق مع بنت أخويا اللى قرب فرحها، ولقيته بيتكلم مع ابن جارتى حسنيه.
وقفت مكانى أبص عليهم، ولما لقيته لمحنى حاولت أبعد عن عينه، لقيته فجأه بقى قدامى وبيوقفنى.
روحت هابه فيه وأنا بقوله:
– أنت اتجننت يا عمنا؟ أنت بتوقفنى وأنا ماشيه؟
لقيت الراجل الغلبان فجأه بقى واحد تانى، وهو بيقولى بكل جفاء:
– بقولك إيه؟ إنتى خليكى فى حالك، وملكيش دعوه باللى بعمله، وبطلى تقفى تراقبينى، بدل ما أضايقك.
مالكيش لقيت قلبى وقف لما شوفته بيرمى عينه على بنت أخويا اللى كانت سابقانى فى المشى وقربت توصل.
.. يتبع
قلبى وقع فى رجلى، وأنا عينى بتروح على بنت أخويا اللى ماشيه قدام، وعلى البنى آدم الغريب ده اللى بيتكلم وهو بيظهرلى وشه الحقيقى قدامى، اللى الناس مخدوعه فيه.
روحت متشجعه وأنا بقول له:
– أنت بتهددنى يا جدع؟ إنت اللى عاملى فيها شيخ!
بصلى وهو عينه فيها غضب وقالى:
– بقولك إيه؟ أنا نبهتك. ابعدى عن طريقى أحسن. إنتى متعرفنيش. سلام بقى عشان أنا زهقت.
أنا ريقى نشف وأنا ببص عليه وهو ماشى. ساعتها اتأكدت إن الراجل ده وراه حاجه كبيره قوى، وتصرفاته مع الأطفال فيها سر، بس ده حاول يخوفنى بأعز ما عندى.
وصلت البيت معرفش إزاى، لقيت “نور” بنت أخويا بتقولى:
– فيه إيه يا “رحومتى”؟ إنتى كنت واقفه مع عم “مسعود” ليه؟
روحت قايلالها وأنا مرعوبه:
– إنتى تعرفيه؟ أوعى تكونى بتكلميه ولا تديله أمان. أوعى.
بصتلى باستغراب وهى بتكلمنى:
– ماله يا عمتى؟ بس الراجل ده الناس كلها بتشكر فيه وبتقول عليه مبروك.
اتعصبت عليها وأنا بقولها:
– اسمعى منى وخلاص. ثم إنتى قاعده هنا لحد دلوقتى ليه؟ قومى روحى على أمك وأبوكى قبل الدنيا ما تليل.
حاولت “نور” تقلبها هزار، بس أنا كنت جاده وناشفه معاها، لحد ما زهقت ومشيت.
وفضلت أنا دماغى مقلوبه وهاتجنن من البعيد اللى خوّفنى. واضح كده إنه عارفنى كويس ومراقبنى، بدليل عرف بمعزة “نور” بنت أخويا عندى، واللى بعتبرها أكتر من صاحبه وأكتر من أخت.
وقعدت أندب حظى بعد ما كنت بتباهى بأنى ساكنه فى أعلى دور وشايفه البلد كلها، فى العماره اللى بناها جوزى بفلوس شقاه وتعبه فى الغربه.
بس قررت بينى وبين نفسى إن مافيش داعى أدخل نفسى فى مشاكل مع الراجل ده، وخلينى فى حالى وحال نفسى. هو عارف إن جوزى مسافر، عشان كده حاول يخوفنى.
بقيت أغصب ولادى على اللعب فى البيت وأمنعهم من إنهم يلعبوا فى الشارع، وأنا منعت نفسى أقف فى البلكونه غير فى الضروره أو لما أكون بنشر الغسيل.
ولو لمحته، بدخل على طول.
لغاية الليله دى، كنت بتكلم مع جوزى فى التليفون، والوقت كان متأخر، تقريباً الساعه كانت ٢ بالليل، لما وقفت بالتليفون فى البلكونه وأنا بتكلم.
ساعتها شوفت البنى آدم ده، اللى اسمه “مسعود”، داخل بيت “رضوان” الحلاق.
أنا كنت هاتجنن. إيه اللى يخلى واحد زى “رضوان” يدخل غريب زى ده بيته الساعه دى؟ هو راجل عازب عشان يدخله بالليل كده؟ ده راجل معاه مراته ومخلف ولاد وبنات.
روحت راجعت نفسى تانى وقولت: خلينى فى حالى وماليش دعوه بحد. كل واحد يعمل اللى هو عايزه. أنا عايزه أحافظ على ولادى.
تانى يوم وأنا راجعه بعد ما وصلت ولادى المدرسه، لقيت الحاجه أم زاهر واقفه بتتكلم مع النسوان. قولت أسلم عليها، لقيتها بتشدنى من إيدى وتقولى:
– شوفتى يا “رحمه” اللى جرالنا؟ ولا اللى حصل مع زاهر ابنى؟
بقولها:
– إيه اللى حصل لزاهر؟ أنا مشفتهوش النهارده خالص.
لقيتها بتقولى:
– اسكتى يا بنتى. دى البهايم الليله اللى فاتت عملت لنا ليله فى حياتنا ماشوفنا زيها. أول مره أشوف البهايم تتحرك فى الحوش كده لوحدها، كأن حاجه بتخليها تجرى.
ولا العجل والبقره! تصدقى بإيه؟ ست مرات يفكوا المربط ويتحركوا فى الحوش بشكل غريب، وابنى يجرى وراهم عشان يسيطر عليهم بالعافيه ويربطهم تانى.
لحد ما فى مره العجل كان قرب يعمل له إصابه، ومهديّوش غير بعد أذان الفجر، كأن حاجه كانت بتحركهم علينا.
ده ابنى نايم لحد دلوقتى، ولا صوت الدب اللى طول الليل بنسمعه بقالنا أسبوع، وكأن حد بيخبط على الحيطه.
مش عارفه يا بنتى، الظاهر كده بيتنا بقى فيه حاجه غريبه.
أنا الست وهى بتكلمنى، مش عارفه لقيت نفسى بربط حكايتها بالراجل اللى اسمه “مسعود”، اللى دخل بيت “رضوان” بالليل، واللى بيته لازق فى بيت أم زاهر.
روحت سألتها على طول:
– الكلام ده كان الساعه كام يا أم زاهر؟
لقيتها بتقولى:
– يا بنتى ده كان بعد ما نام بوقت طويل، يمكن واحده ولا اتنين.
ساعتها لقيتنى بقول بينى وبين نفسى: ربنا يستر وميكونش اللى فى بالى.
.. يتبع
كلام أم زاهر دخل الفكر فى دماغى، روحت سألتها:
– طيب ماسألتيش ليه “رضوان” ولا مراته عن الصوت اللى بتسمعيه؟ يمكن يعرفوا.
ردت عليا:
– سألتهم يا بنتى، وقالولى إنهم بيسمعوا نفس الصوت بالليل.
مش عارفه ليه الكلام مادخلش عقلى، وحاسه إن الموضوع ده وراه حكايه.
بعد ما سبت أم “زاهر”، يدوب بخطوات بسيطه لقيت “رضوان” فى وشى.
طبعاً شاورلى بإيده وقالى:
– صباح الخير أم كريم.
رديت عليه الصباح، والفضول خلانى روحت مواقفاه وسألته:
– إنت رايح لزاهر؟ هو إنت عرفت اللى جراله؟
رد هو:
– أيوه. ما أنا الوليه قالتلى. قولت أجى أطمن عليه، الله يكون فى عونه.
هزيت رقبتى وأنا مواقفاه:
– أيوه فعلاً، الله يكون فى عونه. أمه صعبت عليا أوى وهى بتحكيلى دلوقتى، خصوصاً كمان موضوع الدب اللى بتسمعه بالليل وكأن حد بيخبط فى الحيط. إنت ماتعرفش الصوت ده بييجى من إيه؟
رد عليه بمراوغه:
– وأنا هاعرف منين؟ بس إحنا بنسمع زَيها ومنعرفش برضوا.
استغربت أنا من كلامه، روحت سألاه:
– إزاى بس؟ إنتوا الاتنين بتشتكوا من نفس الصوت وهى حيطه واحده ما بينكو. ماهو يا إما الصوت عندك يا عندها، ولا يعنى هايكون تحت فى الأساس؟ ده كده يبقى حد بيحفر.
ودى كانت غلطتى اللى حسيت بيها وقتها، على وشه اللى اتغير وجاب مية لون، فسألنى وهو بيبلع ريقه:
– إنتى قصدك إيه يعنى بكلامك ده؟
رجعت لعقلى وعرفت إن الفكره اللى خطرت عليا غريبه، باين إنها حقيقه، وحسيت إنى بتسرع ممكن أعرّض ولادى لمشكله، لأن الموضوع ده أكيد وراه الزفت اللى اسمه “مسعود”.
روحت رديت عليه بهزار مالوش طعم، وأنا متوتره:
– هه، أنا بهزر يا “رضوان”. أصلى كلام أم “زاهر” مدخلش عقلى. هى مراتك عامله إيه هى والولاد؟ مش برضوا كويسين؟
رد عليا وهو متغير:
– كويسين يا أم كريم. روحى شوفيها لو عايزه.
رديت عليه:
– وقت تانى أبقى أروح أشوفها. عن إذنك بقى أشوف اللى ورايا.
روحت بيتى ودماغى بقت هاتنفجر من التفكير، وأنا خايفه أكون دخلت فى حاجه كبيره، وكل ما أفتكر كلام “مسعود” قلبى يقلق على “ولادى” ولا “نور” اللى خوّفنى بسببها.
بصراحه ندمت إنى اتكلمت أساساً مع “رضوان”.
شويه ولقيت “نور” داخله عليا وهى بتهزر وتحكى زى عادتها، وأنا برضوا مش معاها أساساً، عينى فى عينها لكن دماغى مشغوله بالتفكير.
لاحظتنى هى، راحت قايلالى وهى متعصبه:
– فى إيه عمتى؟ إنتى مش معايا نهائى. إنتى بتفكرى فى إيه بالظبط وشاغل بالك؟
رديت عليها:
– يعنى هاتفيدنى لو حكتلك؟
ردت هى:
– يعنى فى موضوع؟ طيب احكى ونشوف. خرجى اللى جواكى، ويمكن نلاقي له حل.
روحت حكيالها كل حاجه، لأن بصراحه كان نفسى أخرج اللى جوايا واللى بشك فيه وحد يسمعنى، يمكن يفيدنى.
لقيتها بتسألنى:
– وإنتى إيه اللى جاب الفكره دى فى دماغك؟ مش يمكن اللى بتقوليه يطلع أوهام؟
رديت أنا:
– شوفى يا “نور”، أنا هاقولك إيه اللى خلانى أفكر فى كده. التفاصيل دى اللى قالتها أم “زاهر”، كانت بتحكيهالى صاحبتى “يمنى”، اللى كانت زميلتى فى السكن لما كنت فى الجامعه.
“يمنى” دى تبقى من الصعيد، وهما عندهم هناك موضوع الحفر على الآثار ده كتير، والتفاصيل دى بتحصل عندهم لما يكون اللى بيحفر بيستعين بحكايات عن الجن فى الحفر، واللى أحياناً بتوصل لأحداث كبيره، خصوصاً لما مايعرفوش يسيطروا على الموقف.
أنا بقالى ٨ سنين من ساعة ما سبت الجامعه، لكن عمرى مانسيت خوف “يمنى” ولا أى حاجه حاكتها.
… يتبع
لقيت نور بتقولى:
– أنا مش عارفه أصدقك ولا أكذبك. إنتى كلامك معقول وكل حاجه، بس إنتى ليه مصممه إن عم مسعود ورا الموضوع ده؟ راجل طيب وإحنا ماشوفناش من وراه غير كل خير.
رديت أنا:
– يا “نور” افهمى. ده دخل عند “رضوان” الساعه ٢ بالليل، وده الوقت اللى قالت عليه خالتى أم “زاهر” لما البهايم كانت بتتحرك بشكل غريب. ثم إنتى ماشوفتيهوش وهو بيخوّفنى. ده بنى آدم باين عليه مش سهل، وأكيد وراه حاجه.
ردت “نور”:
– طيب لو أنا معاكى فى كلامك، فأنا عايزه أعرف إنتى هاتعملى إيه وإنتى مفيش فى إيدك دليل على أى كلمه من كلامك؟
أنا ساعتها سكت شويه وأنا موافقاها فى كلامها، قبل ما أقول:
– عندك حق. أنا معنديش دليل ومش عارفه هاعمل إيه، بس ربنا يسترها معانا إن شاء الله ويحلها من عنده.
بعد ما مشيت “نور”، قررت أفوق شويه وأبطل تفكير وأسيب الأمور لربنا.
كنت راجعت للولاد دروسهم وعاشيتهم، وبعدين سيبت “مروان” يتفرج على التليفزيون و”رودى” اديتها تليفونى تلعب بيه، وأنا دخلت أروق المطبخ.
شويه ولقيت النور طفى والولاد قعدوا يصرخوا. سيبت الحوض والمواعين وجريت عليهم عشان أطمنهم وأحضنهم.
على ما وصلت عندهم، لقيت الدنيا معتمه. لولا شباك الأوضه المفتوح اللى كان جايب ضى القمر والنجوم، كانت الدنيا بقت كحل.
أول ما شوفتهم لقيتهم ماسكين فى بعض، روحت على طول واخداهم فى حضنى عشان أطمنهم.
بعدها على طول النور وصل. فرحوا وقعدوا يتنططوا من الفرحه. أنا عجبنى منظرهم، روحت قايلالهم:
– يعنى فرحتوا أهو بالنور لما وصل يا جبنا؟
قعدوا يضحكوا ويهيصوا، وأنا ضحكت معاهم على ضحكهم.
بعدها اتكلمت جد وقلتلهم:
– طيب النور قطع، يبقى تشغلوا عقلكوا وتنوروا كشاف التليفون بدل ما تصرخوا كده وتسرعونى.
رد “مروان”:
– يا ماما، التليفون على المكتب وأنا هنا والدنيا ضلمه. هاتحرك إزاى بقى؟
ضحكت أنا وأخته وأنا بقول له:
– يا راجل! طيب وإنتى يا ست رودى، ده التليفون كان فى إيدك.
ردت رودى:
– يا ماما، ماهو لما النور طفى التليفون طفى كمان، وأنا حاولت فيه بس بينو فصل شحن.
– فصل شحن إزاى؟ ده أنا شحناه من ساعتين. هو فين التليفون؟
قولتها وأنا بقلب فى الكنب، وأدور أنا والولاد على التليفون، اللى فجأه سمعت رنته من برا الأوضه.
لقيت الولاد كلهم بصوت عالى:
– الصوت بره الأوضه يا ماما!
أنا اتحركت أشوف الصوت جاى منين، مع إنى كنت مستغربه جداً وبحاول أفتكر إمتى حد خرج بالتليفون بره الأوضه.
وإحنا ماشيين ورا الصوت لقيناه جاى من المطبخ.
فجأه لقيت الولاد بصوت عالى:
– التليفون أهو يا ماما على الرخامه عالمطبخ!
أنا اتسمرت وأنا شايفه التليفون اللى بيرن قدامى على الرخامه. مش قادره أفهم إمتى وصل هنا.
ده أنا كنت من ربع ساعه بروق المواعين على الحوض وسايباه مع “رودى”، اللى بتقول عليه فصل شحن.
ثم إن رقم مين الغريب ده؟
قلت أرد وأشوف التليفون اللى بيرن الأول وأسيب التفكير لبعدين.
برد بقول:
– ألو، السلام عليكم، مين معايا؟
لقيت صوت غريب بيقول:
– إيه يا مدام؟ إنتى معرفتيش صوتى؟ لا أنا كده أزعل.
عرفت صاحب الصوت، “مسعود”.
روحت رديت وأنا متعصبه:
– إنت اتجننت؟ هى وصلت لكده؟ ثم مين اللى اداك نمرة تليفونى؟
ماكملتش الكلمه لما قاطعنى وقال:
– اسمعينى كويس. أنا بحذرك تانى، مالكيش دعوه بأى مشوار أنا ماشى فيه، وإياكى تتكلمى قدام مخلوق عن “رضوان” ولا بيت “رضوان”. أديكى شوفتى أنا أقدر أوصلك بسهوله إزاى.
وبعدين قال:
– أسيبك تكملى مواعينك بقى. وآه، متنسيش تقولى لرودى ماتزعلش عشان مكملتش اللعبه. وإنتى كفايه عليكى كده النهارده.
وبعدها قفل السكه، بعد ماوترلى أعصابى وخلى شعر راسى يقف من الخوف.
ماقدرتش أنزل بالتليفون من على ودنى، وأنا حاسه بإيدى متخشبه، وجمله واحده بتتردد جوايا:
أنا إيه اللى وقعت نفسى فيه؟ أنا إيه اللى دخلت نفسى فيه؟
.. يتبع
باصه على الولاد وهما بيكلمونى ويندهونى:
– يا ماما، يا ماما… مالك يا ماما؟ إنتى عامله كده ليه؟
وأنا فى دنيا تانيه، بالعافيه حاولت أمسك نفسى عشانهم، لما لقيتهم مخضوضين.
خرجتهم من المطبخ، وجريت أقفل الشبابيك كلها وأفتش فى أى ركن فى البيت، وبعدها شغلت القرآن بصوت عالى.
الخوف كان مسيطر عليا، وأنا شايفه الولاد مرعوبين وبيسألوا:
– هو فى إيه يا ماما؟
وأنا بحاول أطمنهم وأقولهم:
– مفيش حاجه. تعالوا عشان تذاكروا، ولا تتفرجوا على التليفزيون، ولا أقولكم تعالوا ناموا أحسن. يلا على أوضة النوم.
الولاد من الخضه مااعترضوش، وراحوا معايا على أوضتى، لأنى مقدرتش أخليهم يباتوا بعيد عنى.
روحت خدتهم ونايمتهم فى حضنى، لأن أنا كمان كنت خايفه وعايزاهم قريبى عشان أطمن.
– الصوت بره الأوضه يا ماما.
أنا اتحركت أشوف الصوت جاى منين، مع إنى كنت مستغربه جداً وبحاول أفتكر إمتى حد خرج بالتليفون بره الأوضه.
وإحنا ماشيين ورا الصوت لقيناه جاى من المطبخ.
فجأه لقيت الولاد بصوت عالى:
– التليفون أهو يا ماما على الرخامه عالمطبخ!
أنا اتسمرت وأنا شايفه التليفون اللى بيرن قدامى على الرخامه، مش قادره أفهم إمتى وصل هنا.
ده أنا كنت من ربع ساعه بروق المواعين على الحوض وسايباه مع “رودى”، اللى بتقول عليه فصل شحن.
ثم إن رقم مين الغريب ده؟ قلت أرد وأشوف التليفون اللى بيرن الأول وأسيب التفكير لبعدين.
برد بقول:
– ألو، السلام عليكم، مين معايا؟
لقيت صوت غريب بيقول:
– إيه يا مدام؟ إنتى معرفتيش صوتى؟ لا أنا كده أزعل.
عرفت صاحب الصوت، “مسعود”.
روحت رديت وأنا متعصبه:
– إنت اتجننت؟ هى وصلت لكده؟ ثم مين اللى اداك نمرة تليفونى؟
ماكملتش الكلمه لما قاطعنى وقال:
– اسمعينى كويس. أنا بحذرك تانى، مالكيش دعوه بأى مشوار أنا ماشى فيه، وإياكى تتكلمى قدام مخلوق عن “رضوان” ولا بيت “رضوان”. أديكى شوفتى أنا أقدر أوصلك بسهوله إزاى.
وبعدين قال:
– أسيبك تكملى مواعينك بقى. وآه، متنسيش تقولى لرودى ماتزعلش عشان مكملتش اللعبه. وإنتى كفايه عليكى كده النهارده.
وبعدها قفل السكه، بعد ماوترلى أعصابى وخلى شعر راسى يقف من الخوف.
ماقدرتش أنزل بالتليفون من على ودنى، وأنا حاسه بإيدى متخشبه، وجمله واحده بتتردد جوايا:
أنا إيه اللى وقعت نفسى فيه؟ أنا إيه اللى دخلت نفسى فيه؟
.. يتبع
باصه على الولاد وهما بيكلمونى ويندهونى:
– يا ماما، يا ماما… مالك يا ماما؟ إنتى عامله كده ليه؟
وأنا فى دنيا تانيه، بالعافيه حاولت أمسك نفسى عشانهم، لما لقيتهم مخضوضين.
خرجتهم من المطبخ، وجريت أقفل الشبابيك كلها وأفتش فى أى ركن فى البيت، وبعدها شغلت القرآن بصوت عالى.
الخوف كان مسيطر عليا، وأنا شايفه الولاد مرعوبين وبيسألوا:
– هو فى إيه يا ماما؟
وأنا بحاول أطمنهم وأقولهم:
– مفيش حاجه. تعالوا عشان تذاكروا، ولا تتفرجوا على التليفزيون، ولا أقولكم تعالوا ناموا أحسن. يلا على أوضة النوم.
الولاد من الخضه مااعترضوش، وراحوا معايا على أوضتى، لأنى مقدرتش أخليهم يباتوا بعيد عنى.
روحت خدتهم ونايمتهم فى حضنى، لأن أنا كمان كنت خايفه وعايزاهم قريبى عشان أطمن.
تانى يوم بعد ما وصلت الولاد المدرسه، رجلى خدتنى على بيت أخويا عشان أروح لـ”نور”.
رسمت على وشى ابتسامه بايخه لأخويا ومرات أخويا، وأنا برد عليهم. مكنتش عايزه أتكلم مع حد تانى غير “نور”.
أول ما شافتنى وأنا داخله عليها أوضتها بشكلى ده، اتخضت منى فسألتنى على طول:
– مالك يا “رحومتى”؟ فى حاجه حصلت؟
رديت الباب وقفلته من سكات، فراحت اتخضت أكتر لما لقتنى قعدت على سريرها وأنا متعبه من العياط.
راحت واخدانى فى حضنها، وسبتنى لما أهدى شويه.
بعد كده سألتنى بعد ما رفعت راسى وبدأت أمسح دموعى:
– ممكن بقى أفهم إنتى مالك وإيه اللى حصل لك ده كله؟
روحت قايلالها على كل حاجه من أول النور اللى قطع لحد الاتصال المقلق.
فلاقتها وقفت وهى بتقول:
– إنتى بتتكلمى جد؟ طيب لما هو كده تعالى معايا نقول لبابا نتعامل مع الموضوع، أو نبلغ الجهات المختصه.
روحت هابه فيها:
– بس يا “نور”، أنا شوفت أخويا قبل ما أدخلك. ولو عايزه أقول له كنت قولت، مكنتش استنيتك تقولى.
راحت قايلالى:
– يعنى إيه؟ إنتى هاتسكتى للشخص ده وتنفذى رغبته بسكوتك؟
رديت عليها وقلت:
– أيوه هاسكت. أنا عايزه أحافظ على ولادى. خليهم يكملوا موضوع الآثار بتاعهم، أنا مالى ومالهم. هما مش أول ناس. وإنتى إياكى تدخلى، أنا بقولك أهو، فاهمانى؟ إياكى تدخلى.
هزت راسها وهى بتقولى:
– ماشى يا عمتى. إنتى حره، اعملى اللى عايزاه.
خدت بالى من لبسها، روحت سألتها:
– وإنتى لبسه ومتشيكه كده رايحه فين؟
ردت عليا وقالتلى:
– “منذر” هايعدى عليا ياخدنى فى سكته للجامعه. إنتى هاتيجى معانا نوصلك. ده “منذر” هايتبسط أوى لما يشوفك. إنتى عارفه بيعزك قد إيه.
كنت هاعترض، لكن هى أصرت عليا.
ركبت معاها عربية خطيبها “منذر”، اللى خد باله إنى متغيره، راح سألنى:
– إيه يا أم كريم؟ ولا أقولك يا أم مروان عشان متزعليش؟ إنتى فى حاجه مزعلاكى؟ مابتهزريش زى عادتك يعنى.
رديت أنا:
– لا مفيش زعل ولا حاجه. مين قال بس إنى زعلانه؟
رد وقالى:
– محدش قال، بس شكلك متغير وكأنك معيطه. على العموم أنا هاسيبك براحتك، بس بقولك أهو إنتى أختى ولو فى أى حاجه، أنا موجود.
أنا و”نور” بصينا لبعض قبل ما أرد عليه وأقول:
– تشكر يا سيادة المحامى. ده العشم برضوا. عارفاك قد القول. ربنا يتمم جوازكم على خير يارب، إنت و”نور”.
وبعدها خدناها ضحك وهزار، لحد ما وقف بعربيته قدام بيتى.
نزلت من العربيه، ويدوبك حطيت رجلى على الأرض، ببص لقيت أم “فاطمه” مرات زاهر بتمشى بسرعه، ولا كأنها مستعجله.
ندهت عليها، مردتش.
“نور” خدت بالها، راحت سألنى:
– هو فيه إيه؟




