روايات وقصص

سر جوازه الاب ل منال علي

بصيت للشاشة وأول ما شفت الصورة اللي عليها، حسيت إن رجلي ما بقتش شيلاني، والدنيا كلها لفت بيا في ثانية واحدة. لأن الصورة ما كانتش لراجل غريب الصورة كانت لأخويا طارق! واقف في مدخل عمارة مرات عمي بالليل، لابس جاكت أسود وكاب مغطي نصه، وفي إيده ماسك ظرف بني كبير وتحت الصورة كان فيه ريكورد مبعوت من نفس الرقم اللي طارق استعمله للرسايل، بس متسجل من أسبوعين فاتوا! يعني قبل ما بابا يفتح موضوع الجواز أصلاً!

صوت بابا كان طالع زي فحيح الحية، واطي بس بيقطع في الأعصاب
افتحي الريكورد يا نادية اسمعي أخوكي اللي كان بيتحامى فيكي وفي أمه.
إيدي كانت بتترعش بطريقة هستيرية. دوست على علامة التشغيل، وطلع صوت طارق وهو بيهمس بنبرة عمري ما سمعتها منه نبرة تخوّف
لو الورق اللي سابه عمي ما طلعش يا نهال، قسماً بالله ما هسيب فيكم حد عايش لا إنتِ ولا عيالك. متفتكريش إن موته هيعدي بالساهل. الورق يرجع، بدل ما أفرّج الحارة كلها على صورك القديمة!
بصيت لطارق وأنا مبرقة ومصدمة لساني اتشل. بقلم منال علي
طارق كان واقف مسنود على الحيطة، وشه أصفر زي الليمونة، وعينيه تايهة في الأرض، وعرقه نازل على جبينه كأنه واقف تحت مطرة.
أمي قامت من مكانها وصرخت فجأة بصوت خرم وداني
إيه ده؟! إيه اللي بنسمعه ده يا طارق؟! ورق إيه وصور إيه لمرات عمك يا فاجر؟!
طارق ما نطقش كان بيبلع ريقه بصعوبة، وصصدره بيعلى ويهبط.
بابا قام وقف، وبطوله وهيبته قرب خطوتين من طارق. الصالة كلها كانت بتغلي. بابا ما ضربهوش نظرته بس كانت ألعن من مية قلم
فاكرني عجزت وخرفت يا طارق؟ فاكرني لما قلت هتجوزها كنت واقع على وداني وبجري ورا واحدة أصغر مني زي ما وسوست لأختك وأمك؟
بابا لف وبص لأمي، ودموعه اتحبست في عينيه بحرقة راجل اتهانت كرامته في بيته
أنا كنت بستر على بيتي وبستر على ابنك اللي كان هيودينا كلنا في داهية!
أنا لقيت نفسي بنهار، الصوت طالع مني بالعافية
بابا ورق إيه؟ وطارق ماله بمرات عمي وبموت عمي؟! فهّمنا بالله عليك!
بابا أخد نفس عميق، وطلع سيجارة ولعها بإيد بتترعش، وقعد على الكرسي وقال بصوت موجوع
عمكم الله يرحمه ما ماتش سكتة قلبية زي ما التقرير الطبي طلع عمكم مات مسموم.
الكلمة نزلت على الصالة زي قنبلة دمرت كل ذرة عقل فينا.
أمي حطت إيدها على بؤها ووقعت على الكنبة وهي بتشهق
مسموم؟! يا مصيبتي السودة مين اللي سماه؟!
بابا بص لطارق بعينين مليانة غضب وقهر
اسألي ابنك الباشا اللي كان شغال مع عمه في المعرض ولقى دفاتر تانية تحت البلاطة دفاتر غسيل أموال لشبكة تقيلة عمك كان تورط معاها قبل ما يموت، وحاول يخرج منها فصفوه!
طارق فجأة رفع راسه وصرخ بهستيريا
لا يا بابا! متصدقهاش! الحية دي بتكذب عليك! نهال هي اللي متفقة معاهم نهال هي اللي حطت السم لعمه عشان تاخد الورق والفلوس وتبيعنا ليهم! والظرف اللي في إيدي ده ما كانش تهديد دي كانت أمانة عمي سايبهالي عشان أحميكم!
بابا ضرب بالترابيزة برجله كسر إزازها في ثانية، والصوت زلزل البيت
أخرسسسس! أخرس يا كداب! نهال جاتلي برجليها وهي بتترعش، وجابتلي تليفونها، وقالتلي يا أبو نادية، ابنك طارق طالب مني خمسة مليون جنيه تمن السكوت، ومهددني يخطف ابني مالك لو ما مضيتش على تنازل عن البيت والمخزن!
أنا كنت واقفة في النص، راسي هتنفجر.
مين الصادق ومين الكداب؟
أخويا اللي عشت معاه عمري كله وبيدافع عن أمي وعني؟ ولا بابا اللي عمره ما كذب في حرف؟
ولا مرات عمي الست الهادية الوديعة اللي فجأة بقت محور الموت والفلوس والتهديد؟
وفجأة وسط الزعيق وتكسير الإزاز
تليفون بابا اللي على الترابيزة رن.
حصري علي روايات واقتباسات
الاسم اللي ظهر على الشاشة خلّى الصالة تسكت تماماً، حتى طارق اتكتم صوته واتسعت عينيه برعب.
المتصل كان نهال مرات عمي.
بابا مسك التليفون، وفتح السبيكر بكل هدوء وقال
ألو يا نهال أنا في البيت وعرفتهم كل حاجة.
بس الصوت اللي رد من الناحية التانية ما كانش صوت نهال خالص!
كان صوت راجل خشن، غريب، ونبرته باردة زي الثلج، وخلفية المكالمة فيها صوت عياط أطفال مكتوم وصوت ست بتستغيث
مساء الخير يا حاج مرات المرحوم وعيالها شرفونا في ضيافتنا شوية. ومعاهم نص الورق. بس الباشا الصغير ابنك طارق معاه النص التاني والفلاشة. قدامكم ساعتين بالدقيقة الفلاشة توصل لينا عند الملاحات القديمة، يا إما هتبعتوا تستلموا جثث عيال أخوك وأمهم في شكاير ونبدأ بعدهم بدور بنتك نادية.
الخط قفل والصالة غرقِت في صمت مميت.
كل العيون لفت وبصت لطارق اللي وشه اتحول للون الرماد، وحط إيده في جيبه ببطء وهو بيرجع لورا ناحية باب الشقة!
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى