
والحقيقة إن الدنيا ما كانتش بس بتغيره، كانت بتسحب منه حتة كل يوم، لحد ما بقى مش عارف هو مين.
بدأ ينام بصعوبة، ويصحى مفزوع، ويخاف من التجمعات، ويتجنب أي مناسبة فيها آباء وأبناء. كان بيغير الطريق لو شاف أب بيمشي مع ابنه، مش لأنه بيكرههم، لكن لأنه كان بيشوف فيهم الحياة اللي اتحرمت عليه.
وفي يوم، زميلته مريم لاحظت إنه قاعد في مكتبه، باصص للشاشة من غير ما يكتب حرف.
مريم كانت بنت بسيطة، عندها قدرة غريبة إنها تلاحظ الوجع اللي الناس بتحاول تخبيه.
قربت منه وقالت:
«آدم، إنت كويس؟»
رد من غير ما يبصلها:
«أيوه.»
قالت:
«إنت بتقول أيوه، بس عينيك بتقول حاجة تانية.»
ابتسم ابتسامة باهتة وقال:
«العين ساعات بتبالغ.»
ردت بهدوء:
«والقلب ساعات بيتعب من كتر ما صاحبه بيكتم.»
بص لها لأول مرة، وحس إن فيه حد شايفه فعلًا.
لكن بدل ما يتكلم، قام من مكانه وقال إنه عنده اجتماع.
هرب.
كان آدم خايف يحكي، لأن الحكاية لما بتتقال بصوت عالي بتبقى حقيقية أكتر، ولأنه كان متعود يسمع من الناس إن الإنسان لازم يكون قوي، وإن البكاء ضعف، وإن اللي بيشتكي من نفسه يبقى فاضي أو ناكر للنعمة.
كان خايف يقول إنه مش قادر، فيردوا عليه: «إنت ناقصك إيه؟»
وكان خايف يقول إنه موجوع، فيقولوا له: «كلنا عندنا مشاكل.»
وكأن وجود وجع عند الآخرين يلغي وجعه هو.
وفي مساء يوم شتوي، رجع آدم البيت متأخر. كانت أمه مستنياه، وعلى السفرة طبق أكل غطته عشان يفضل دافي.
قالت له:
«تعالى يا حبيبي، كل لقمتين. إنت بقالك يومين مش بتاكل كويس.»
قعد قدامها، وبص للطبق، لكنه ماقدرش ياكل.
سألته بحنان:
«إنت تعبان؟»
هز راسه وقال:
«شوية يا أمي.»
مدت إيدها ومسحت على شعره زي ما كانت بتعمل وهو صغير.
«طب ما ترتاح يا حبيبي. الشغل مش هيطير.»
وفجأة، آدم انفجر في العياط.
حط إيده على وشه، وفضل يبكي من غير ما يعرف يتكلم. أمه اتخضت، وقامت من مكانها وقعدت جنبه.
«مالك يا قلب أمك؟ إيه اللي واجعك؟»
قال بصوت متقطع:
«أنا تعبت يا أمي… تعبت أوي.»
ضمتّه لصدرها، وفضلت تربت على ضهره، وهو بيقول وسط دموعه:
«أنا مش عارف أعيش. كل يوم بصحى وأنا حاسس إني مذنب. كل يوم بفتكر آخر كلام قلته لبابا. أنا السبب يا أمي… أنا السبب إنه مات زعلان مني.»
شهقت أمه، ودموعها نزلت.
«إنت مش السبب يا آدم.»
هز راسه بعنف.
«لأ! لو كنت سكت، لو كنت حضنته، لو كنت قلت له إني بحبه… كان زمانه لسه معانا!»
أمه مسكت وشه بين إيديها وقالت:
«اسمعني يا ابني. أبوك كان بيحبك أكتر من نفسه. وإنت عارف ده. أبوك عمره ما كان يتمنى لك تعيش العمر كله تعاقب نفسك عشانه.»
لكن آدم كان غرقان في إحساسه بالذنب، ومش قادر يسمع الحقيقة مهما كانت واضحة.
في الليلة دي، أمه ما سابتوش لوحده. قعدت جنبه لحد ما نام، وبعدها فضلت تبص له وهو نايم وتبكي بصمت.
كانت فاكرة إنها عارفة ابنها، لكنها اكتشفت إنها ماكنتش تعرف حجم الحرب اللي جواه.
وفي الصبح، قررت تاخده لحد يستمع له ويساعده.
لما قالت له، اتوتر ورفض.
«أنا مش مجنون يا أمي!»
قالت بسرعة:
«وأنا ما قلتش إنك مجنون يا حبيبي. إنت تعبان، والتعب ليه علاج. لما جسمك يوجعك بتروح للطكتور، ولما روحك تتعب، ليه تحرم نفسك من المساعدة؟»
سكت آدم.
ماكانش مقتنع تمامًا، لكنه كان مرهق لدرجة إنه ما بقاش قادر يحارب حتى فكرة المساعدة.
راح معاها.
كانت العيادة هادية، فيها شباك كبير وستارة بيضا، ونبات أخضر في ركن الأوضة. قعد آدم قدام المختص، وحاطط إيده فوق بعض، وعينيه في الأرض.
سأله المختص:
«إيه اللي جابك النهارده يا آدم؟»
رد:
«أمي شايفة إني محتاج أتكلم مع حد.»
ابتسم وقال:
«وإنت شايف إيه؟»
سكت شوية، وبعدها قال:
«أنا شايف إني فشلت أعيش حياة طبيعية.»
المختص ما قاطعوش، وما استعجلش عليه، وما قالوش إنه بيبقالغ.
قال له:
«احكي لي عن الحياة اللي شايف إنك فشلت تعيشها.»
وهنا بدأت الحكاية تخرج من قلب آدم لأول مرة، مش على هيئة دموع بس، لكن على هيئة كلمات. حكى عن أبوه، وعن آخر خناقة، وعن العزاء، وعن كلام عمه، وعن السنين اللي قضاها وهو بيعاقب نفسه.
ولما خلص، سأله المختص:
«لو صاحبك المقرب حكى لك نفس الحكاية، وإنه كان اتخانق مع أبوه قبل ما أبوه يموت فجأة، هل كنت هتقوله إنه يستحق يتعذب طول عمره؟»
آدم رد بسرعة:
«طبعًا لأ.»
«طب ليه بتحكم على نفسك بحكم عمرك ما كنت هتحكم بيه على حد بتحبه؟»
ما عرفش يرد.
قال المختص:
«إنت بتخلط بين الندم والمسؤولية. ممكن تندم على كلمة قلتها، وتتمنى لو كنت تصرفت بطريقة مختلفة، لكن ده مش معناه إنك مسؤول عن وفاة والدك. الإنسان مش بيملك معرفة المستقبل، ومش كل حدث بيحصل بعد موقف معين بيكون نتيجة للموقف ده.»
آدم حس إن الكلام بيلمس حاجة جواه، لكنه ما قدرش يقتنع بيه بالكامل.
قال:
«بس أنا كنت آخر واحد زعله.»
رد المختص:
«إنت ما تعرفش كان حاسس بإيه في اللحظة الأخيرة، لكنك تعرف إنه كان بيحبك، وإن علاقتكم كانت أكبر بكتير من خناقة واحدة. الحب مش بيموت بسبب كلمة، والذكريات كلها مش بتتمسح بسبب موقف.»
خرج آدم من المكان وهو مش حاسس إنه اتعافى، لكنه لأول مرة حس إن فيه احتمال يكون مش مذنب بالشكل اللي عاش عمره مقتنع بيه.
بدأ جلسات منتظمة، واتعلم يواجه مشاعره بدل ما يهرب منها. كانت فيه أيام بيتحسن فيها، وأيام بيرجع فيها لنفس الحزن، لكن المختص وضح له إن التعافي مش طريق مستقيم، وإن الرجوع خطوة مش معناه إن كل الخطوات اللي مشيها ضاعت.
وفي وسط رحلته، مريم فضلت قريبة منه.
عرفت من زميلة مشتركة إنه بيمر بوقت صعب، لكنها ما ضغطتش عليه يحكي، وما حاولتش تلعب دور المنقذة.
كانت كل فترة تبعت له رسالة بسيطة:
«صباح الخير، أتمنى يومك يكون أهدى.»
أو:



