روايات وقصص

شمس وقمري ل زهرة الربيع

فادية بصت لها بصدمة وقالت: انتي بتقولي إيه يا بت؟ امشي معايا، متخافيش منه، ولا هو ولا الجبان التاني بقدرو يعملو حاجة. أنا لو هشحت في الشوارع هطلقك منه، امشي معايا.

شمس نزلت دموعها وقالت: سامحيني يا ماما، مش هقدر، أنا مبسوطة هنا، كل حاجة عندي، ومش عايزة أرجع للفقر تاني. صدقيني أنا مبسوطة قوي و…

بس فادية شدتها عليها وضربتها قلم قوي وقالت: انتي فاكرة إني هصدق العبط ده؟ قولتلك امشي معايا من سكات.

هنا راغب شد شمس عليه وقال بغضب: أظن سمعتي ردها، هي حابة تقعد معايا، يعني حتى المحكمة مش هتنفعك. أظن مفيش داعي ندايق بعض أكتر من كده.

فادية بصت لشمس بدموع وقالت: يا خسارة تربيتي فيكي، يا خسارة عمري اللي ضيعته عليكي يا بنت مرزوق.

فادية خرجت بغضب رهيب، ومنيرة كانت بتنادي عليها وعايزة تهديها، بس مشيت من غير ما ترد عليها.

شمس نزلت دموعها بحسرة وبقت تبكي بشدة.

راغب اتنهد وقال: اهدي، بكرة لما تسمعي كلامي ويبقى عندك مبلغ محترم باسمك، وقتها أمك هتعرف إنك على حق وهترجعلك.

شمس بصت له بذهول وقالت: انت مش طبيعي بجد. وقالت بغضب وزعيق: روح اتعالج بقا، بلاش قرف. وطلعت على الأوضة بسرعة.

راغب اتنرفز ولسه هيطلع لها، منيرة مسكته وقالت: وانبي يا ابني، سبها في حالها السعادي، ابوس إيدك.

راغب اتنهد وقال: حاضر يا ماما، هطلع الجنينة هكلم عمر. عن إذنك. وطلع يكلم صاحبه.

في شقة عم شمس كان مصطفى قاعد في أوضته ودموعه على خده وماسك صورة شمس وبيفكر في كل الوقت اللي قضوه سوا.

جات ست في الخمسينات ودخلت، دي وفاء أم مصطفى، قالت بسخرية: لما انت بتحبها قوي كده وقاعد قعدت الحزانا دي، عملت فيها كده ليه؟ وطاوعت شيطانك وشيطان أبوك.

محسن سمعها من بره قال: هو أبوه جيه جنبكم يا وليه؟ ابنك اللي وافق من نفسه ومعاه حق. ده مليون جنيه، هو كان ادانا ألفين.

وفاء اتنهدت وقالت: تقوم تبيع بنت أخوك اللي موصيك عليها؟ وبصت لمصطفى وقالت: وانت يا خيبة أملي، دي البت كانت تتمنالك الرضا، ترضى تبعها كده زي ما تكون علبة مخلل يا ابن وفاء. دانتو حتى أمها يدوبك عرفت، جات مرتين تسأل عليها، انت وأبوك تضحكو عليها تقلولها عروسة ونايمة. جاتكم عرسة تقطم وسطكو انتو الاتنين.

مصطفى وقف ونزلت دموعه وقال بزعيق: ما كفياكي يا أما، كفياكي بقى، أنا مش مستحمل، أنا حاسس بنار في قلبي، مش قادر، ارحميني.

وفاء اتنهدت وقالت: أنا هخرس خالص يا مصطفى ومش هفتح السيرة، بس يا رب لما أنا أسكت النار اللي جواك تطفى يا ابن بطني.

في القصر، شمس كانت في الأوضة وبتبكي، وحست إنها هتفرقع من الغيظ من كلام راغب، وحزن والدتها كان معذبها. قررت تنزل تحاول معاه يمكن يسبها ترجع لوالدتها.

شمس نزلت وبصت عليه لقتو قاعد مضايق جدًا، راحت تكلمو، بس وقفت مكانها لما إيناس حطت إيدها على كتفو وقالت: انت كويس يا راغب؟

راغب نزل إيدها بضيق وقال: جدًا، وكل ما بتكوني بعيدة بكون أحسن. ولسه هيمشي، بس وقف مكانه لما قالت: ليه؟ مش قادر تنساني؟ مش متستحمل أكون قريبة منك؟ مش كده؟

راغب غمض عنيه بتعب وبص لها وقال: طبعًا انتي بتتمني أقولك أيوه، بس للأسف مش هقدر أكدب عليكي، لأن الحقيقة إني بضيق من وجودك جنبي، مبقتش أطيق أشوفك. فلو تتكرمي عليا وتبيعي نصيبك في القصر أكون شاكر جدًا، أو حتى تسافري لأهلك إيطاليا وترحميني من وجودك اللي مضطر أشوفه كل يوم.

إيناس قالت بعصبية: القصر ده قصر جدي زي ما هو قصر جدك، ومش هبيع نصيبي فيه لا ليك ولا لغيرك. وبعدين وانت بتعمل معايا كده ليه؟ هو احنا ولاد اتنين يتخطبو وينفصلو يا راغب؟ أنا لسه بحبك، حتى بعد ما اتجوزت ماجد مقدرتش أنساك، واتطلقت منه لأني بحبك و…

بس قاطعها راغب لما ضحك بشدة وقال: والله بجد؟ انتي اتطلقتي منه لأنك بتحبيني؟ مكنتش أعرف والله. واتحولت ملامحه لغضب رهيب وقال: ماجد طلقك لأنه أخد اللي عايزه منك، هو اتجوزك علشان يكسرني، وانتي مخدتيش في إيده غلوه. برافو عليكي. أول ما عرض عليكي نص أسهم الشركة وافقتي، وافقتي لأني وقتها مكانش عندي اللي عند ماجد وكان أغنى مني. قولتيلي إيه وانتي بتقلعي دبلتي قدامه؟ قولتيلي عندي طموح مش هتقدر توفرهالي. ونزلت دمعة غصب عنو وقال بغضب: قولتيلي هتجوزو، انساني، كل شيء نصيب.

بس شوفي ربك كبير ازاي، دلوقتي هو اللي جيه يترجاني أسبله مناقصة هيموت عليها. يا عيني، أنا وعدتكم انتو الاتنين إني هكبر وهوصل لدرجات متقدروش تشوفوها بعيونكم، وابتديت، ولسه هوريه قدره. أوعدك.

راغب لسه هيمشي، إيناس جريت عليه وحضنتو من ورا وقالت بدموع: متعملش فيا كده يا راغب، أنا بحبك والله، والله بحبك، انت كمان بتحبني، متكدبش على نفسك.

راغب ابتسم بدموع وبعدها عنو وقال: معاكي حق، حبيتك، ويمكن لسه بحبك، ويمكن أفضل أحبك طول عمري.

إيناس ابتسمت بفرحة، بس اختفت ابتسامتها بسرعة لما قال: بس قلبي ده لو هحرقو مش هيكون ليكي. أنا وانتي مبقاش فيه خطوة نمشيها سوا. أنا لو همت مش هرجعلك. انسيني، كل شيء نصيب.

راغب مشي وسابها بتبكي بحزن وندم. كل الحوار ده كان تحت أنظار شمس اللي نزلت دموعها بحزن عليه لما شافت الوجع في عيونه. دخلت وراه وقالت: راغب، استنى.

راغب وقف ومسح دموعه بسرعة وقال: عايزة إيه؟ انتي كمان.

شمس كانت حاسة بوجعو قوي، إحساس صعب جدًا لما تحب شخص ويبيعك بسهولة. قالت: انت كويس؟

راغب بص لها باستغراب وقال: أنا اللي المفروض أسألك السؤال ده.

شمس قالت: أنا بخير الحمد لله.

راغب قال: أمال نزلتي تاني ليه؟ وبعدين انتي جايه من الجنينة لحظة بس، انتي كنتي بتصنتي علينا بره.

شمس بلعت ريقها بتوتر قالت: احم، أنا، أنا…

بقلمي زهرة الربيع

راغب غمض عيونه وفتحهم وقال: يعني كنتي بتتصنتي؟

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى