
شمس قالت: بص، هو مش بالظبط، أنا جيت علشان أطلب منك تسبني أروح، لقيتكم بتتكلموا بالصدفة.
راغب قال: امم، بالصدفة، ووقفتي تسمعي بالصدفة برده. على العموم أنا مش قادر أتناقش معاكي حاليًا. ولسه هيمشي، شمس قالت: لسه بتحبها؟
راغب قال بغضب: وانتي مالك؟ يخصك في إيه؟
شمس قالت بحزن: كنت عايزة أعرف الوقت بيداوي ولا لا.
راغب هدي لما قالت كده، وبص لها بدموع وابتسم وقال: لسه بتحبيه بعد اللي عرفتيه؟
شمس اتجمعت الدموع في عنيها وقالت: انت كمان لسه بتحبها بعد اللي عملتو معاك؟
راغب اتنهد وقال: مش شرط كل حاجة نحبها تبقى لينا. في حاجات بنحبها قوي بنضطر نبعد عنها علشان حاجة أهم.
شمس قالت باستفهام: حاجة إيه دي اللي أهم من الحب؟
راغب قال: الكرامة، كرامتك أولًا وأخيرًا. ده أول درس تتعلميه مني، علشان كده مش هاخد منك مقابل.
شمس ضحكت وقالت: هو أنا كل ما هحب أعرف منك حاجة هدفع مقابل؟
راغب قال: طبعًا، كل حاجة في الدنيا لها مقابل، ولازم تدفعي علشان ميبقاش حد بيمن عليكي.
شمس ضحكت وقالت: طيب انت عندك فلوس تدفع منها، أنا عندي إيه يا حسرة؟
راغب قرب منها وقال: انتي عندك كتير كتير أوي. وقرب أكتر وقال: يعني مثلًا عنيكي، أنا مستعد أفضل أشرح وأكتب أشعار كمان مقابل النظرة دي. من أول يوم سحرتني. كمان شعرك، حتى الحجاب اللي بتلبسيه يشهد على جمالو. ولما بتتكلمي بتحركي قلوب بحركة شفايفك. كل حاجة فيكي تبهر. انتي جمالك ثروتك وسلاحك كمان.
راغب كان قريب منها جامد، وشمس بقت تبص له بتركيز في كل كلمة، وكلامه عجبها جدًا، وشخصيته بتعجبها أكتر. ازاي بيقدر يخفي ألم قلبه في ثواني ويسيطر عليه؟
راغب كان غرقان في عيونها، بس فاق لنفسه وبعد وقال بارتباك: احم، أنا، أنا هطلع أنام، تعبان جدًا. عن إذنك.
راغب طلع، وشمس ابتسمت، ولسه هتمشي، إيناس قالت: استني عندك.
شمس وقفت وبصت لها باستغراب وقالت: نعم؟ عايزة حاجة؟
إيناس قالت بغرور: تاخدي كام وتبعدي عنه ومشوفش وشك تاني و…
الخامس والسادس
5
إيناس قالت بغرور: تاخدي كام وتبعدي عنه ومشوفش وشك تاني.
شمس بصت لها باستغراب وذهول وقالت: نعم؟ قولتي إيه؟
إيناس بصت لها بغضب وقالت: عايزاكي تطلقي من راغب، وأنا مستعدة لأي مبلغ تطلبيه. كده وضحت ولا محتاجة شرح أكتر؟
شمس فضلت مبرقة بدهشة، وبعدها ضحكت جامد وقالت: اممم، تدفعيلي؟ الظاهر إن كلكم هنا عندكم عقدة الدفع دي. على العموم يا شاطرة، أنا راغب ده مش بطيق أسمع اسمه حتى، ولو عليا عايزة أطلق منه انهارده قبل بكرة. فلو عندك فكرة تنفع ياريت تقوليلي، أحسن ما تبعتري فلوسك على الفاضي.
شمس لسه هتمشي، إيناس قالت: طبعًا عندي. هو حل واحد: اديلو اللي عايزه وهيسيبك زي ما ساب غيرك.
شمس بصت لها بغضب وقالت: نجوم السما أقربلو. انسي، لو حصل المستحيل مش هيلمسني.
إيناس قالت بغضب: انتي فاكرة نفسك مين يا بت؟ انتي كنتي هتتجوزي البواب بتاعنا ده. آخرك راغب اتجوزك ينبسط معاكي ليلتين، فمتحلميش بأكتر من كده. لو فضلتي عمرك كله تدوري وراه مش هتستفيدي، لأن راغب لسه بيحبني ومستحيل يحب غيري أبدًا.
شمس ابتسمت وقالت ببرود: طيب، مدام كده بالتوفيق. عن إذنك بقى.
شمس مشيت، وإيناس اتحولت ملامحها لغضب رهيب وقالت: اصبري عليا، أنا هعرف ازاي أوقفك عند حدك. ودخلت أوضتها ومسكت التليفون بعصبية هتتصل على حد.
في فيلا جميلة على البحر، ماجد كان قاعد بيحط تلج على عينه بسبب البوكس اللي أخده من راغب، وجات ست في أواخر الأربعينات بملابس شيك جدًا وغالية جدًا جدًا، دي عليه هانم والدة ماجد، وقفت قدامو.




