روايات وقصص

شمس وقمري ل زهرة الربيع

شمس قعدت على السرير بضيق وقالت: انت بتضيع وقتك، عمري ما هوافق إنك تشتريني. أنا الفلوس مبتهمنيش أبدًا، وانت اللي هتزهق وهتمشيني بنفسك، وبكرة تشوف.

راغب ابتسم وقال: مفيش حد الفلوس مبتهمهوش، بس أنا عجبني إصرارك. وبكرة نشوف. ودلوقتي مش عايز أسمع صوتك معايا، شغل لازم أكمله.

راغب قعد وبقى يشتغل على اللاب، وشمس قعدت على السرير بضيق شديد وبقت تفكر كتير، وبعدين قالت: بقولك إيه، ممكن أسألك سؤال؟

راغب قال من غير ما يبص لها: انجزي واسألي.

شمس قالت: هو هو انت بجد دفعت لمصطفى، ولا ممكن تكون هددته زي ما هددتني بأمي كده؟ أرجوك قولي الحقيقة.

راغب قفل اللاب واتنهد وراح قعد جنبها على السرير وقال بحزن: شوفي، أنا عارف إن الحاجة الوحيدة اللي هتريحك دلوقتي إنك تعرفي إنه كان مجبور يعمل كده، وإني هددته. بس أنا مش هقدر أقولك غير الحقيقة، والحقيقة إنه قبض يا شمس. عرضت عليه مليون جنيه ووافق على طول، حتى مقالش إنه قليل.

شمس كانت بتتقطع حرفيًا ومش قادرة تصدق، وبتجاهد علشان متبكيش.

راغب خد باله وقال: أنا عارف إن كلامي ده بيدمرك من جوه، بس بكرة هتفهمي الدنيا وهتعرفي إن ده أحسن ليكي، وإن كان المفروض تعرفي إنه بايع من زمان. ده أحسن ليكي، صدقيني. ده أصلًا ميستهلش دمعة منك. كل اللي هو سمعته، كنت هاخدك من غير ما أكتب عليكي، وهو اللي أصر إني أتجوزك علشان انتي بنت عمه وشرفو. ده كل اللي حصل.

هنا شمس نزلت دموعها بوجع شديد، بس مسحتهم بسرعة وقامت اخدت هدوم ودخلت الحمام تاخد دش، تحت أنظار راغب اللي كان الحزن في عيونه. وأول ما دخلت الحمام قال: ياريت كل اللي بنتمناه بيحصل، بس محدش بياخد قد ما بيدي أبدًا. واتنهد وقعد يكمل شغل.

بعد شوية شمس خرجت وبقت تنشف شعرها وتمشطه، وراغب كان بيتابعها وبيص لها بإعجاب واضح. شمس خدت بالها وقالت: هو احنا هنفضل محشورين في أوضة واحدة كتير؟ ما تشوفلك أوضة تانية تقعد فيها.

راغب بص لها بذهول وقال: محشورين؟ دي الأوضة دي أكبر من شقتكم يا كحيانة. انتي بقولك إيه، متتكلميش كلامك بينرفزني.

شمس نفخت وقالت: طيب أنا جوعت، أنا مفطرتش.

راغب قال: هنا الأكل له مواعيد، يعني كلها نص ساعة ويجهز الغد. من هنا ورايح لازم تتعودي على ضبط مواعيدك.

شمس اتنهدت وقالت: ربنا يصبرني. وقعدت تلعب في التليفون بتاعها.

راغب ابتسم وفضل يكمل شغله لحد معاد الغدا، ونزل هو وشمس وقعدوا على طاولة الغدا هما وإيناس ومنيرة.

منيرة قالت: بقيتي أحسن دلوقتي، مش كده؟

شمس قالت: الحمد لله يا طنط، شكرًا.

إيناس كانت بتبص لهم بغيظ شديد، وراغب كان بياكل من غير اهتمام.

شمس بصت للأكل ولقتهم بياكلوا بالشوكة والسكينة، قالت: هو مفيش عيش هنا ولا إيه؟

راغب بص لها وقال: إيه؟ مش بتعرفي تاكلي بالشوكة ولا إيه؟

شمس قالت: لا، بس أنا…

بس إيناس قاطعتها وقالت: عيش؟ عايزة عيش؟ هههه، لا اسمحلي أقولك زوقك المرادي بلدي قوي يا راغب.

راغب بص لها بضيق ولسه هيرد، شمس قالت: البلدي يوكل يا قلبي. وحطت إيدها على إيد راغب وابتسمت بدلال وقالت: مش كده ولا إيه؟

بقلمي زهرة الربيع

راغب حس بإحساس يجنن لما لمست إيده، لدرجة إنه استغرب قوي، ونظراتها الجريئة كانت أروع. قال بابتسامة: كده ونص.

شمس ضحكت قاصدة تغيظها، وميلت عليه وقالت بهمس: البت دي صفرا قوي.

راغب بص لإيناس ورجع بص لها وقال بهمس: صفرا يعني إيه؟ سمرا قصدك؟ مش قوي يعني؟

شمس قالت بهمس: سمرا إيه بس؟ صفرا صفر، قصدي بتغير.

راغب ضحك وقال: آه، وهتغير من مين بقى؟ منك مثلًا؟

شمس ابتسمت بغرور وقالت: طبعًا مني، الفرق شاسع

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى