روايات وقصص

لست ل امنيه الريحاني

سيف: هو … هو المحاضرة الساعة كام ؟

بدأت رحمة في إخفاق كتم ضحكتها ، فوكزتها غادة قائلة: محاضرة إيه حضرتك؟

سيف: محاضرة التكاليف

غادة: المفروض دلوقتى

سيف: شكراً

غادرهم سيف وعيناه متعلقة على غادة ، وحين غادرهم لم تستطع رحمة كتمان ضحكاتها فأنفجرت ضاحكة في غيظ من غادة ، تركتها غادة وذهبت ، فظلت تنادى عليها حتى وصلا إلى المدرج

رحمة: خلاص بقى يا غادة ، متزعليش

غادة: قولتلك يا رحمة بطلى طريقتك دى

رحمة: خلاص بقى يا غدغد ، أصل الواد صعب عليا ، كان تايه يا عين أمه

نظرت لها غادة في غيظ وما لبثت أن تحولت نظراتها إلى إبتسامة ضاحكة

رحمة: اهو شفتى ، مش أنا لوحدى يعنى

غادة: طب قدامى يا أختى على المدرج

تمر الأيام ويحاول سيف خلق الحجج للتقرب من غادة والحديث معها ، فهو وإن لم يقدر على الحديث معها تحاوطها نظراته في كل مكان ، حتى شعرت أن عينيه تحدثها بكلام يحبسه قلبه بداخله ، لم تستطع غادة أن تفي بوعدها لقلبها ألَّاتملكه لحد آخر بعد ما عاناه في جرح أحمد ، ولكن مشاعر سيف القوية التي كان يحاوطها بها كانت أقوى من أى وعود .

نجح سيف في التقرب إليها وجعلها تشعر به ، ولأن قلب المراءة يعشق أكثر بكثير من قلب الرجل، تحول الحب في قلب سيف لأضعافه في قلب غادة، أصبحت لا ترى غيره، ولا تسمع غير صوته حتى من غير أن يتحدث ،كانت تفهم ما يريده بمجرد نظرة لها ،و كانت تحترم غيرته الشديدة عليها فق قامت بقطع جميع علاقاتها من زمايلها الرجال حتى وإن كانت تتعامل معهم في حدود الزمالة ، كان كل ما يهمها إرضائه ، فهو ملك قلبها وعقلها بحبه لها

وفي يوم من الأيام جاءت غادة إلى الجامعة تبحث عنه كعادتها حتى وجدته، وكأنها وجدت ضالتها وبر أمانها ، ذهبت إليه لتجده غاضب ويبدو على ملامحه الضيق

غادة: صباح الخير يا سيف

نظر لها سيف ولم يجبها

غادة: إيه ده مالك ؟

سيف في غضب: ممكن أعرف إيه اللي إنتى لابساه ده، أنا قلت كام مرة البلوزة دى متتلبسش تانى

غادة: غصب عنى ، ماما كانت غاسلة لبسى كله ، ودى اللي لقيتها ، وبعدين مالها البلوزة يعنى؟

سيف: ضيقة ، وإنتى عارفة كده كويس، وبعدين حجتك واهية، أبقى تممى هتلبسى إيه قبل ما تنامى

غادة: حاضر يا سيف ، أوعدك مش هلبسها تانى ، خلاص إفرد وشك بقى

سيف: ما إنتى متعصبنيش وتقوليلى أفرد وشك

غادة: خلاص بقى يا عم الحمش

سيف: إيه مش عجبك إنى حمش ، بكرة لما نتجوز هوريكى الحمش ده هيعمل فيكى إيه

غادة: أنت قولت لما إيه؟

سيف: إيه لما نتجوز ، هو أنا قولت حاجة غريبة ، ولا فاكرة إنى هسمحلك تتجوزى غيرى أصلاً

أحمر وجه غادة من الخجل ولم تستطع أن تنظر إليه

سيف:يااااااه كل ده عشان قولتلك نتجوز، أمال لو قولتلك إنى بحبك

رفعت غادة عينيها ناظرة إليه في صدمة ، فهو وبرغم كل المشاعر التي تربطهم لأول مرة يبوح لها بحبه

سيف: أيوا يا غادة ، بحبك ، من أول يوم شوفتك فيه وأنا بحبك ، وكل منايا إنك تبقى معايا مراتى وشايلة أسمى

غادة في خجل : سيف ، أنا….

سيف: أيوا ، إنتى إيه بقى، أنطقيها الله يسترك

غادة في توتر: أنا أتاخرت على المحاضرة، يالا بينا

وفي يوم من الأيام كان سيف غائب عن الكلية بسبب مرض والده فأضطر أن يجلس بجانبه ، ذهبت غادة إلى الكلية وجلست حزينة لفقدانها من يكملها وبجانبها رحمة

رحمة: إيه كل النكد دا يا بنتى، كل ده عشان سى سيف بتاعك مجاش

غادة: وحشنى أوى يا رحمة

رحمة: يا حبيبتى دا هو يوم واحد اللي غابه

غادة: إنتى متعرفيش اليوم دا فارق معايا إزاى، أنا أتعودت على وجود سيف في حياتى ، اليوم اللي بيعدى عليا من غير ما أشوفه بحس إنى ميتة مش عايشة، سيف بقى هو النفس اللي بتنفسه

رحمة: اللي يشوفك دلوقتى ، ميشوفكيش من سنتين لما كنتى بتتجاهليه ، وتقوليلى مش هقدر أحب تانى يا رحمة

غادة: حبه ملك قلبى يا رحمة، خلانى مش قادرة أقاوم محبوش ، أنا حبيت سيف على قد كل الجرح اللي مريت بيه ، حبيت سيف على قد كل لحظة أتوجعت فيها سواء من قسوة أبويا أو خيانة أحمد ليا، هو قدملى حب وميعرفش إن حبه ولد جوايا أضعاف أضعاف الحب ده ليه

رحمة: يااه ، للدرجة دى يا غادة؟

غادة: وأكتر يا رحمة ، صدقينى، أنا وصلت بحبى لسيف لدرجة محدش يتصورها

رحمة: بس أنا خايفة عليكى يا حبيبتى ، الحب بالشكل ده خطر عليكى، إنتى مسلماله كل أمورك يمشيها ، يقولك يمين تمشى يمين ، شمال تمشى شمال، والحب مش كده يا غاجة ، لازم تحكمى عقلك

غادة: بحبه يا رحمة ، وخايفة أخسره ، خايفة اوى في يوم نزعل من بعد يمشى ويسيبنى ، وأنا لو سيف سابنى ممكن أموت

رحمة: بعد الشر عليكى يا حبيبتى

غادة: لازم أعمله كل اللي هو عايزه ، وهو أكيد هيقدر ده ويتمسك بيا زى ما أنا متمسكة بيه

تمر السنوات ومازال الحب بين سيف وغادة يتزايد ، وكل مرة يؤكد سيف لغادة على حبه وتمسكه بها ، إلي أن أنقضت الأربع سنوات ، وفي يوم تقابل سيف مع غادة في الجامعة بعد أن طلب منها أن تقابله

غادة: خير يا سيف ، قلقتنى ، أنت كويس

سيف: أنا كويس يا غادة ، متقلقيش

غادة: أمال مالك ، وطلبتنى أنزل أقابلك ليه، أنت مش قولت أنت اللي هتيجى تقابل ماما

سيف في تردد: غادة ، أنا طلبت أقابلك عشان أقولك ، إن إحنا ….

غادة: إحنا إيه يا سيف؟

سيف: إحنا لازم نسيب بعض

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى