
وقفت في وسط الزحمة وأنا ماسكة الكاميرا بتاعتي، وبحاول أعدي علشان ألحق أعمل مقابلة مع فارس الشيخ، وهو أشهر رجل أعمال في الشرق الأوسط، لسه محقق نجاحات كتير في إيطاليا وراجع مصر بعد غياب 15 سنة. كل الإعلام موجود: صحافة وموزعين. أنا كنت واقفة في وسطهم، وعايزة أعمل مقابلة علشان مديرة الجريدة؛ لو رجعت من غير أي خبر هترفدني، أيوه هترفدني.
قعدت أقاوم بكل قوتي، وبعد معاناة وصلت أخيرًا ووقفت قدام الحراس اللي واقفين بيحموه. كان مشغول جدًا وبيرد على كل الأسئلة بسرعة علشان يخلص منهم. كنت شايفة انزعاجه من أسئلة الزملاء السخيفة، زي واحدة بتقوله: هو حضرتك مرتبط؟ رديت وأنا متعصبة من كمية السماجة دي:
وأنتي مالك أنتي يا آنسة؟ ركزي في شغلك، دي حياته الشخصية مش من حقك تتدخلي فيها.
وبدوبك أنا قلت الكلمتين دول، وكان صوتي عالي شوية. خلاص، حبيبتين تلاتة، لقيت الكل عينه عليا، والبنت اللي أنا حرجتها بصالي بعصبية، وهو كان واقف يبصلي. أيوه هو اللي تاعب ومجنن قلوب البنات كلها بوسامته وكاريزمته. بصيت له وأنا بترجاه يساعدني من الموقف ده. وكانت كلها دقايق والبنت قربت مني وكانت عايزة تعترضني، محستش بنفسي غير وهو بيشدني ويخرجني من وسطهم. جريت وهو ورايا والحراس بيحمونا.
وأول ما خرجنا كانت في عربية فخمة جدًا واقفة مستنية خروجه، كانت مفتوحة. لا إراديًا لقيت نفسي ركبت العربية، ركب هو كمان، والحراس ورانا في عربية تانية، وانطلقوا. كنت ببص من قزاز العربية الخلفي وأنا حاطة إيدي على قلبي من الموقف المرعب ده. أخدت نفسي ورجعت لقيتو باصصلي. أيوه يا جماعة، ده فارس الشيخ، اسم على مسمى: رجل أعمال، ذكاء ووقار وكاريزما. إيه بصراحة؟ عيني كانت بتطلع قلوب.
بصيت له وقولت: شكرًا إنك ساعدتني.
قال: دا أنا اللي متشكر إنك خلصتيني من زن الصحفيين دول.
لما قال زن صحفيين اتكسفت وقلت: احمم.
قالي: أنتي كنتي بتعملي إيه في وسط الزحمة دي؟
أخدت نفس عميق وخرجت الكاميرا من جنبي وحطيتها قدامه وقلت بكل فخر: أنا صحفية.
اتصدم وبصلي بدهشة.
وأنا قولت: يعني حضرتك هكون بعمل إيه في وسط الإعلام؟ أكيد مش معجبة يعني.
بصلي برفع حاجب، وأنا حسيت إني عكيت. لا حسيت إيه؟ دانا اتأكدت إني عكيت.
رجعت بصيت له تاني وبحاول ألطف الجو، بس لقيت فارس مطلع كارت من جيب البدلة وبيقولي: لو عايزة تعملي لقاء خاص، تعالي العنوان ده.
اندهشت وبصيت بعيون مفتوحة، وبعدين ضحكت وأنا بقول: بجد؟
هز راسه، والعربية راحت وقفت، والباب اتفتح وقالي وهو بيبص للشباك: يلا انزلي!
بصيت للمكان اللي هنزل فيه، لقيت إنه طريق سريع، يعني مش هعرف أنزل ولا هلاقي أي مواصلة. قولت له: برجاء لو سمحت، أنا لو نزلت هنا مش بعيد مرجعش بيتي. حضرتك، أنا عذرًا إنك منزلتش مصر من 15 سنة، بس دا طريق سريع يعني مفيش حد بيمشي فيه.
بصلي بتفكير كده، وبعدين شاور للسواق يمشي، وقالوا ينزلني في أي طريق عام.
ابتسمت ورجعت بضهري لورا، ووقتها لقيت اتصال من فريدة، واللي هي مديرة الجريدة.
فريدة: عملتي إيه في مقابلة فارس الشيخ؟
أنا: أنا في الطريق، لما أوصل هشرحلك.
فريدة: تشرحيلي إيه يا ملك؟ عارفة لو طلعتي بتحوري ومعملتيش المقابلة، هعمل فيكي إيه!
بلعت ريقي وهمست: إيه يا فريدة؟
فريدة بصريخ: مشوفش وشك في الجريدة تاني.
قفلت فريدة في وشي، وأنا عيني اتملت دموع. بصيت عليه ولقيته كان مركز معايا وسامع صوت فريدة. بصيت له بترجي لتاني مرة ينقذني، بس حسيت إنه مرهق، وقررت أستنى بكرة وأروح لشركته وأسيبها لربنا يدبرها بقى.
وقفت العربية في طريق عام، نزلت وأنا بتنهد بخيبة أمل. وأول ما خرجت العربية انطلقت بسرعة، وأنا فضلت واقفة أبص ليها وبستوعب أنا فين.
قررت أتمشى شوية أغير جو، ومشيت في طرق أول مرة أشوفها. حسيت الوقت بيتأخر وأنا طريق بيتي طويل. سألت واحدة عن الطريق العمومي لتاني مرة، وبعدين خرجت وركبت مواصلة، وأنا حاليًا في الطريق.
وأنا قاعدة بحط إيدي في شنطتي اتفجأت إن الكاميرا مش موجودة. شهقت بخضة وقعدت أدور عليها، ولقيت إني نسيتها في عربيته!
غمضت عيني بحاول أفتكر كل اللي حصل، واتأكدت إني نسيتها معاه. ضربت بإيدي على جبيني بصدمة، وكنت عايزة أصرخ من الغباء اللي أنا فيه. وقولت: شاطرة يا ملك.
بتوصل عربية فارس لفيلا كبيرة في مكان راقي، وهو نازل بيلامح الكاميرا بتاعت ملك بيتفاجأ بوجودها وبياخدها معاه. أول ما ينزل بيلاقي أهله واقفين يرحبوا بيه.
حضن والدته بكل حب، وهي قالت: حبيبي وحشتني، يااه يا فارس، 15 سنة بعيد عني يا حبيبي.
قال: معلش مش بإيدي يا حبيبتي والله.
مامته: زمانك يا حبيبي تعبان من السفر، تعال معايا ترتاح.
وهم داخلين بيلاقي بنت جميلة واقفة وباصة للأرض بخجل. بيبصلها فارس وبيسأل مامته باستغراب: مين دي يا ماما؟
مامته بتقرب من البنت وبتقول بفرحة: دي حنين بنت خالتك يا حبيبي، إيه، مش فاكرها؟
بتخجل حنين جدًا من نظرات فارس، وهو بيبصلها وبيضحك بعد ما بيفتكرها. حنين، ما شاء الله، كبرت واحلوت والله. دنا حاسس إني أجنبي عن البلد دي ومعدتش فاكر حاجة.
ضحكت مامته وطبطبت على ضهره، وحنين قالت بخجل: ازيك يا فارس.
فارس وهو بيضحك: بخير يا حنين، أنتي اللي عاملة إيه؟ متزعليش مني بس احنا كلنا ملامحنا اتغيرت.
ابتسمت حنين وقالت: مش زعلانة ولا يهمك يا فارس.
بصت حنين لخالتها وقالت: بعد إذنك بقى يا خالتو، أنا همشي علشان خطيبي جاي عندنا النهاردة.
فارس بصلها وهز راسه: مبروك يا حنين.
ابتسمت حنين: الله يبارك فيك يا فارس.




