منوعات

ضراير تحت سقف واحد

ندى الجمل

كنت نفسي أواجهه وأسأله، لكن خوفت لو اتكلمت من غير دليل، سعاد تقلب الموضوع عليا وتظهر قدامه في صورة الست المظلومة اللي أنا بغير منها. مسحت دموعي وقلت لنفسي: ـ لأ يا منال، مش هديهم الفرصة دي.

طول ما هما مخططين من ورايا، أنا كمان هعرف كل حاجة من غير ما يحسوا. تاني يوم الصبح، نزلت المطبخ أجهز الفطار، ولقيت نجلاء قاعدة مع سعاد وبيضحكوا كأن مفيش بينهم أي مشاكل. أول ما شافوني، سعاد قالت بابتسامة: ـ صباح الخير يا منال، تعالي اقعدي معانا.

بصيت لها وابتسمت: ـ صباح النور. قعدت معاهم، وفضلت أراقب كلامهم وتصرفاتهم. نجلاء قالت لسعاد: ـ إنتِ شكلك مرتاحة النهارده، أهو حسن بقى أحسن معاكي؟سعاد بصت لها بسرعة وقالت: ـ الحمد لله، ربنا يهديه.

الأكثر قراءة الان
خطبة ابنى 1حكايات زهره
منذ أسبوع

سلفتى استلفت منى حكاوى شيمو
منذ يومين

خطبة ابنى 2 حكايات زهره
منذ أسبوع

وبعدين بصت لي وسألتني: ـ قولي لي يا منال، هو محمود بيحبك أوي كده زي ما إنتِ بتقولي؟السؤال جه فجأة، لدرجة إني استغربت. رديت بهدوء: ـ الحمد لله، إحنا عايشين كويس. ضحكت وقالت: ـ ربنا يخليكم لبعض يا حبيبتي، أصل الراجل مهما حب مراته، ساعات بيحتاج حد تاني يفهمه ويسمعه.

بصيت لها مباشرة وقلت: ـ أكيد، بس الراجل المتجوز المفروض يحافظ على بيته، والست المحترمة تعرف حدودها مع جوز غيرها. اتغيرت ملامحها للحظة، لكن سرعان ما ضحكت وقالت: ـ إنتِ فهمتي كلامي غلط يا منال، أنا قصدي على المشاكل العائلية بس.

نجلاء تدخلت بسرعة: ـ طيب يا جماعة، صباح الفل! هو إحنا هنبدأ اليوم بخناقة من دلوقتي؟قمت من مكاني وقلت: ـ لا يا حبيبتي، خناقات إيه بس؟ أنا عندي شغل في شقتي. طلعت وأنا متأكدة إن كلامي وصل لسعاد، وإنها بدأت تحس إني مش غافلة عن تصرفاتها زي الأول.

لكن أنا كنت لسه في بداية الطريق. بعد الضهر، وأنا قاعدة في شقتي، سمعت صوت سعاد بتنادي على محمود من فوق، بنفس الطريقة اللي اتعودت عليها:ـ يا محمود، ممكن تطلع لي شوية؟ عايزاك في موضوع مهم!قلبي دق بسرعة.

المرة دي قررت إني مش هطلع وراه، ومش هعمل خناقة، لكن هفضل مستنية وأشوف إيه اللي هيحصل. وبعد شوية، نزل محمود، وكان شكله متضايق. استنيت لحد ما دخل الشقة، وبعدين سألته بهدوء: ـ خير يا حبيبي؟ سعاد كانت عايزاك في إيه؟

بص لي وقال: ـ موضوع يخص حسن والعيال، مفيش حاجة مهمة. هزيت راسي، لكن جوايا كنت بسأل نفسي:هو فعلًا الموضوع يخص حسن والعيال، ولا سعاد بدأت تنفذ خطتها؟قررت إني مش هضغط عليه دلوقتي، لكن لازم أعرف الحقيقة بنفسي.

وفي نفس الوقت، كانت سعاد قاعدة مع نجلاء فوق، وبتقول لها: ـ منال بدأت تشك فيا، ولازم نتصرف بسرعة قبل ما تبوظ كل حاجة!نجلاء ردت عليها بقلق: ـ أهو أنا قلت لك بلاش تستعجلي، دلوقتي لو منال فتحت بقها، ممكن كل خطتنا تبوظ.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى