عام

حكايه تخوف ل امل نصر ج١

كنت هاتكلم، بس لمحت أخت “فاطمه” الصغيره، فندهت عليها.

أول ما قربت سألتها عن أمها مستعجله كده ليه.

ردت عليا وقالتلى:

– أصلى “فاطمه” عماله تتعب من الصبح فى بيت جوزها، وبيقولوا عليها حصل لها حاجه غريبه.

أنا سمعت كده قلبى وقع فى رجلى، روحت قايله لـ”نور” وخطيبها:

– خلاص امشوا إنتوا وكملوا طريقكم عشان متتأخروش.

بصلى “منذر” وقالى:

– فى حاجه يا أم مروان؟

رديت وأنا على أعصابى:

– لا ولا حاجه. عادى يعنى. سلام إنتوا بقى.

أول ما تحركت العربيه، مشيت أنا بسرعه على بيت زاهر، اللى أول ما وصلتله لقيت النسوان والعيال مالين البيت.

دخلت أبص على “فاطمه”، فلمحتها فاقده الوعى، و”مسعود” حاطط إيده على دماغها وبيقول إنه بيحاول يساعدها عشان تفوق.

روحت صارخه بصوت عالى عليه:

– شيل إيدك منها!

.. يتبع

بنت الجنوب ❤

محسيتش بنفسى وأنا بصرخ عليه.

بصراحه دمى كان بيغلى وأنا شايفه “فاطمه” على الأرض، راسها على حجر أم “زاهر”، وأمها جمبها بتبص بقلب مكسور على بنتها، وأختها متأثره عليها.

و”زاهر” قاعد عالكنبه حاطط إيده على راسه، بيبص بحزن على عروسته اللى مكملتش ٦ شهور معاه، والستات متأثرين والعيال بيتفرجوا.

وهو قاعد حاطط إيده على راس “فاطمه” وراسم الزهد والورع، وبيحاول يساعدها، قبل ما يتوقف من صرختى والستات كلها تبص عليا.

أما “زاهر” فرفع لى راسه مستغرب قبل ما يسألنى:

– فى حاجه يا أم “مروان”؟

أنا كنت بحاول أمسك أعصابى وأنا بقول له:

– لأ مفيش حاجه. بس أنا اللى هافوق “فاطمه”. إنت عارفنى، أنا حافظه أجزاء من القرآن، يعنى ماتتعبش نفسك يا عم الشيخ. قوم من جمبها عشان أشوفها.

قولت الجمله الأخيره وأنا عينى فى عينه، قبل ما أتخض من كلام النسوان اللى بتلومنى.

واحده تقولى:

– عيب عليكى. خلى الراجل يساعدها.

والتانيه:

– حرام عليكى. ده عم “مسعود” مابيقصرش مع حد فينا.

وأنا ساكته، مش راضيه أرد على واحده فيهم.

قام هو فجأه من مطرحه وقال:

– أنا ماشى يا “زاهر”. لو عوزتنى هاتلاقينى فى مطرحى.

مردش عليه “زاهر” بكلمه، كمل بسكوته حتى مع اعتراض الستات اللى معجبهمش خروجه.

لكن فاجأنى “زاهر” لما قال بضيق وهو بيكلمهم:

– ما خلاص بقى. خليها تجرب معاها، ولو معرفتش تساعدها هاروح أنا أناديه.

سكتت الستات، وأنا استغربت، بس أنا كان هامنى أساعد “فاطمه”.

روحت قعدت جمبها، وقعدت أقرأ لها قرآن وبأزازة الريحه أحاول أفوقها، لحد ما فاقت.

حمدت ربنا اللى قدرنى أساعدها، عشان متشمتش فيا الستات اللى كانت بتتكلم عن عم الشيخ.

أنا مش فاهمه إزاى قدر يأثر على الناس دى كلها بالشكل الغريب ده.

لما فاقت “فاطمه” كويس ودريت بنفسها، قعدت تعيط وتحكيلنا اللى حصل معاها:

– أنا اللى شوفته المره دى مش شويه يا أمه. أنا كنت هافقد صوابى من الخضه يا “زاهر”.

أنا المره دى شفت خيال وهو واقف قدامى. أنا كنت هاتعب من الخوف. ربنا نجّدنى لما وقعت من طولى ومدريتش بنفسى.

أنا سألتها:

– خيال إيه يا “فاطمه” اللى شوفتيه؟

ردت عليا “فاطمه” وهى متعبه من العياط:

– معرفش. أنا بقالى مده بحلم أحلام غريبه وأسمع أصوات تخوف، بس دى المره الأولى اللى أشوف الكابوس اللى بحلمه وأنا صاحيه.

أنا خايفه جداً. أنا عايزه أروح بيت أبويا، والنبى يا “زاهر” متزعلش منى، بس أنا مش قادره أقعد هنا تانى.

قالتها وقعدت تبكى وهى فى حضن أمها، وأم “زاهر” بتضرب كف على كف على اللى حاصل معاهم.

و”زاهر” قاعد مش عارف يقول حاجه.

أنا قعدت أهدى فيها وأحاول أطمنها، وأقول لها تقرأ الآيات القرآنيه اللى تعرفها وتحافظ على هدوئها.

وبعدها سبتهم وأنا رجلى بتجرها جر من التعب والهم.

لما خرجت من بيت “زاهر”، عينى على طول جات على بيت “رضوان”، اللى كنت شاكه إنه هو و”مسعود” ليهم علاقه بالموضوع ده.

لكن “رضوان” كمان ماجاش يطمن على “زاهر”، ولا حتى بعت مراته تشوف البنيه.

لقيت رجلى واخدانى لبيتهم عشان أتكلم مع مراته وألومها.

كنت هخبط، لقيت الباب مفتوح.

روحت زقيت الباب وأنا بنادى:

– يا أم مصطفى، إنتى فين يا “حمديه”؟

مكملتش خطوتين ولقيت “رضوان” قاعد فى المدخل مربع رجله وقدامه صنية الأكل وبياكل.

رد عليا والأكل فى بقه:

– اتفضلى يا أم “كريم”. “حمديه” مش موجوده.

رديت وأنا متضايقه من الراجل اللى بياكل بهدوء وجيرانه عايشين فى قلق، وكمان بينادينى بأم “كريم”:

– اتفضل فين؟ هو فى حد ليه نفس ياكل وسط القلق ده؟

نفض الخسايه مع لقمه كبيره، وبصلى ولا هاموا حاجه وما نطقش كلمه.

دمى غلى، روحت متعصبه وأنا بقول له:

– يا “رضوان”، كفايه بقى التصرفات اللى مفيش منها فايده غير إنها بتسبب القلق لجيرانك. عيب عليك. ده “زاهر” ابن عمك، واللى بيحصل معاه هو ومراته مايرضيش ربنا.

رد عليا بحدة:

– طبعاً. وإنتى هاتحسى بالناس الغلابه إزاى وإنتى جوزك بيشتغل بره ومرتاحين؟

حاولت أمسك نفسى وأنا بتكلم:

– يا رضوان، ارجع لعقلك وبلاش الأسلوب ده. ماتخليش الغرباء يملوا دماغك بالكلام الفارغ.

– مين هما الغرباء يا مدام؟

سمعتها واتنفضت لما شوفت “مسعود” وهو طالع من جوا البيت.

حاولت مابيبنش خوفى وأنا بقول له:

– اسمع يا جدع إنت. ماتحاولش تخوفنى. فاكرنى مش فاهمه إنك بتحاول تخلّص موضوعك؟ عشان كده الموضوع طول.

رد “رضوان” عليا:

– يعنى هايعمل إيه؟ ما الحكايات اللى بيحكوها عن الجن اللى بيحرسوها بتقول إنهم صعبين، وإن شاء الله هايقدروا يخلصوها.

وقبل ما أرد، اتكلم “مسعود”:

– طب لما إنتى بتفهمى أوى كده فى شغلنا، ماتيجى تشتغلى معانا.

رديت عليه بعصبيه:

– احترم نفسك يا جدع إنت، واختار كلامك كويس.

لقيته بيحاول يخوفنى ويقول:

– بقولك إيه؟ أنا لحد اللحظه دى محافظ على هدوئى معاكى، لكن الأفضل تبعدى عن الموضوع، وإلا هاتشوفى إن المسأله مش هاتكون سهله.

– يعنى هاتعمل إيه؟

كلنا اتخضينا لما شوفنا اللى دخل علينا بغضبه بعد ما قالها!

.. يتبع

أهو حاولت أطول الجزء على قد ما أقدر.

التفاعل القوى منكم هو اللى هايثبتلى إنها عجبتكم.

بنت الجنوب ❤

2 من 2التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى