منوعات

هبه

أمانى سيد

وفى الآخر الأيام هى اللى بتعرف كل واحد قيمته الحقيقية.

اختفت ابتسامة منال للحظة.

أما هو…

فحس لأول مرة إن فى حاجة اتغيرت.

حاجة مش قادر يفهمها.

لأن هبه اللى كانت زمان بتعيط وتترجاه وتخاف من زعله…

بدأت تبقى هادئة بشكل مخيف.

والهدوء ده…

كان أول حاجة تخوف فعلًا.

مرت شهور وهبه على نفس الحال. لا خناقات، ولا اعتراضات، ولا حتى نظرة عتاب. كانت بتصحى قبل الكل، تجهز الفطار، تتابع الأولاد، ترتب البيت، وتعمل كل حاجة كأنها مقتنعة بالدور اللى حطوهولها. لدرجة إن منال بدأت تعتبر وجودها أمر مسلم بيه، وبقت تتعامل على أساس إنها صاحبة البيت الفعلية، بينما هبه مجرد شخص موجود عشان يريحها.

لكن اللى محدش كان يعرفه إن هبه كانت بتحسب كل خطوة بهدوء. كانت عارفة إن اللحظة اللى هتمشى فيها لازم تكون محسوبة كويس. لا بعصبية ولا بانفعال، لكن بطريقة تخليهم لأول مرة يحسوا بحجم الفراغ اللى كانت ماليّاه.

وفى يوم، خرجت من البيت كعادتها الصبح. محدش استغرب. منال كانت نايمة، وهو كان مشغول فى شغله، والأولاد فى مدارسهم. لكن المرة دى هبه ما كانتش رايحة تشترى حاجات للبيت ولا تخلص مشوار. كانت رايحة تبدأ أول خطوة فى طريق جديد.

قدمت دعوى طلاق للضرر بعد ما جمعت كل اللى تقدر عليه من إثباتات وشهود على المعاملة اللى عاشتها. وبعد ما خلصت، رجعت البيت بشكل طبيعى جدًا، وكأن شيئًا لم يحدث.

أيام قليلة، ووصلته أول ورقة رسمية.

كان قاعد مع منال وقتها، وما إن فتح الظرف حتى اختفت ابتسامته فجأة.

ـ إيه ده؟

سألته منال باستغراب.

فضل يقرأ الورقة مرة واتنين وتلاتة كأنه مش مستوعب.

ـ مستحيل… هبه رافعة قضية طلاق؟

ضحكت منال فى الأول على أساس إنه بيهزر.

لكن لما شافت وشه شاحب بالشكل ده، خطفت الورقة من إيده وقرتها.

ولأول مرة، الاتنين سكتوا.

رجع البيت يجرى وهو متوقع يلاقى هبه قاعدة فى مكانها زى كل يوم.

لكن لما دخل، اكتشف إن أوضتها فاضية.

الدولاب نصه خالى.

وحاجات كتير اختفت.

وقف فى نص الأوضة وهو مش مستوعب.

أما الصدمة الحقيقية فجت بعدها بساعات.

لما رجع الأولاد من المدرسة.

البنت دخلت تسأل:

ـ فين طنط هبه؟

والولد قال:

ـ هى مش قالت إنها هتراجع لى الامتحان النهاردة؟

بص لبعضهم فى حيرة.

لأن أول مرة يكتشفوا إنهم حتى مش عارفين يعملوا أبسط تفاصيل يومهم من غيرها.

وفى اليوم التانى، اتأخروا عن المدرسة.

واليوم اللى بعده، نسوا واجباتهم.

وبعد أسبوع واحد بس، البيت اللى كانوا فاكرين إنه ماشى لوحده بدأ يتقلب رأسًا على عقب.

وساعتها فقط…

بدأوا يفهموا إن الشخص اللى كانوا بيعتبرونه أقل واحد فى البيت، كان فى الحقيقة العمود اللى شايل البيت كله.

فى البداية حاول قدام منال يتظاهر إن الموضوع بسيط. كان بيقول بثقة إن هبه هترجع لوحدها بعد يومين تلاتة، وإنها بتضغط عليه مش أكتر. لكن الأيام كانت بتمشى وهبه لا اتصلت ولا سألت ولا حتى بعتت رسالة.

ومع كل يوم كان التوتر بيزيد فى البيت.

منال اللى كانت متخيلة إنها داخلة تعيش ملكة، اكتشفت فجأة إن مفيش حد بيصحى يحضر الفطار، ومفيش حد بيرتب البيت، ومفيش حد بيجرى ورا الأولاد.

فى أول أسبوع حاولوا يعتمدوا على نفسهم.

فى تانى أسبوع بدأت الخناقات.

كل يوم الصبح صوتهم يعلى بسبب حاجة جديدة.

مرة الولد نسى كتابه.

ومرة البنت اتأخرت على المدرسة.

ومرة المدرسين اشتكوا من تراجع مستوى الأولاد.

ومرة البيت كله اتقلب فوق دماغهم لأن مفيش حد منظم أى حاجة.

وفى يوم من الأيام رجع من بره متوتر بشكل واضح.

أول ما دخل قالتله منال:

ـ مالك؟

رمى المفاتيح على الترابيزة بعصبية وقال:

ـ الشغل جابوا غيرى.

ـ يعنى إيه؟

ـ يعنى زى ما بقولك. أنا لما قدمت استقالتى عشان السفر وافقوا عليها وجابوا واحد مكانى. النهاردة كلمتهم عشان أرجع قالولى الوظيفة اتملت خلاص.

سكتت منال ثوانى وهى بتحاول تستوعب.

ـ طب والسفر؟

ضحك ضحكة كلها قهر.

ـ سفر إيه؟ انتى شايفة إحنا فى وضع يسمح بالسفر؟

ـ يعنى إيه؟

ـ يعنى معنديش شغل دلوقتى. وعندى قضية طلاق. وعندى مصاريف محامين. وعندى بيت وأولاد.

اتغير وش منال فجأة.

ـ يعنى الأسبوع الجاى مش هنسافر؟

ـ لأ.

ـ إزاى لأ؟ ده أنا محضرة كل حاجة!

ـ أعمل إيه يعنى؟ أبيع نفسى؟

ـ وأنا ذنبى إيه؟

بصلها للحظة وقال بسخرية:

ـ أول مرة أسألك نفس السؤال.

ـ قصدك إيه؟

ـ ولا حاجة.

لكن الحقيقة إنه كان يقصد حاجات كتير.

يقصد إنه ضحى بشغله عشان يجرى ورا حلم قديم.

ويقصد إنه كان فاكر إن الدنيا هتفضل ماشية زى ما هو عايز.

ويقصد إنه لأول مرة يحس إن كل حاجة بتقع من إيده واحدة واحدة.

أما منال…

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى