
وكان أحياناً بيصاحب الجدة عشان تشربه لبن الإبل الطازج اللي بقا بيعشقه. وفي يوم من الأيام، وهي واقفة قدام خيمتها بتبص على ياسين وهو بيجري ويلهو، لاحظت انه جاي حصان عربي أصيل لونه أبيض، راكبه راجل شماغه وعقاله الأسود فوق راسه، وبهيبته وطوله الرهيب؛
ده “الشيخ”. الحصان وقف بهدوء قريب من الساحة اللي العيال بتلعب فيها. قلبها خاف على ابنها، وهمت تجري عليه، بس وقفت فجأة متسمرة مكانها أول ما شافت حاجة ما كانتش متوقعاها خالص من الراجل القاسي الناشف ده.
الشيخ نزل من على الحصان بخفة، ووقف يراقب الصغير ياسين وهو بيقرب منه من غير أي خوف أو رعب، وباصص للحصان بعيون منبهرة وبتلمع. الشيخ انحنى بطوله على ركبتيه عشان تكون عينه في مستوى راس الصغير، ومد إيده الكبيرة اللي شايلة حتة حلوة بدوية مسكرة، وقال بصوت خشن بس هادي وخالي من أي قسوة: — كيف حالك يا بطل؟
عساك مبسوط بوسط هالديرة؟ ياسين خد الحلوة بابتسامة بريئة وواسعة، وقال ببراءة العيال وبلفظه المصري الواضح: — أنا مبسوط قوي هنا يا عمو.. وفي حصان أبيض حلو خالص! ظهرت على جنب شـ,ـفايفه ابتسامة خفيفة وقليلة الحدوث، ما لمستش عينيه الحادتين، بس غيرت ملامحه الناشفة لحاجة تانية أكتر دفى.
الشيخ مسح برقة على راس الصغير وقال بصوته الخشن: — هذا الحصان يصير لك لو كبرت وبقيت راچل ينشد فيه الظهر.. دير بالك على أمك زين، وما تخليها تحزن. وهي كانت واقفة من بعيد بتتفرج على المشهد الصغير ده، فدخل جوه صدرها إحساس غريب وعكس بعضه؛
خلطة عجيبة من الرهبة، والإعجاب اللي مخبياه، والامتنان اللي متلخبط بالغضب؛ إزاي راجل بالقسوة والسيطرة دي يلين كده قدام طفل صغير ما يخصوش غير إنه ابن ابن عمه اللي مـ,ـات؟ بس السر الحقيقي ما كانش في قسـ,ـوة الشيخ ولا عطفه المفاجئ، ده كان في أسرار الليل اللي بدأت تبان قدامها حبة حبة.
في ليلة من الليالي المتأخرة، وبعد ما كل حاجة هديت في القبيلة والكل نام، صحت على صوت حركة خفيفة ورا بعضها بره خيمتها. طلعت بحذر شديد، وطلعت راسها من فتحة الخيمة عشان تشوف في إيه.
الدنيا كانت ضلمة خالص، ومكانش منور المكان غير ضوء القمر الباهت النار الصغيرة اللي لسه متبقية في كام موقد. شافت مجموعة من رجالة القبيلة، لابسين لثام أو عبايات غامقة، بيتحركوا بحذر شديد وبسكات تام ناحية أطراف المنطقة الجبلية البعيدة.
كان فيه عربيات دفع رباعي ضخمة وطفيين نورها واقفين بين الصخور، والرجالة كانوا بينزلوا صناديق خشبية تقيلة وكبيرة بعناية شديدة. سمعت أصوات واطية بتتنقل بلهجة بدوية تقيلة، كلمات مش واضحة قوي تخص (الشحنة وصلت زين)، (تأمين الطريق البحري والجبلي)، (سـ,ـلاح الحماية والعتاد الجديد).
قلبها اتقبض رعب وهي بتتفرج على المنظر ده. فهمت في اللحظة دي إن المكان ده مش مجرد قبيلة بدوية بسيطة عايشة على الرعي والتجارة العادية، ده مركز عمليات كبير ومعقد، وإن الشيخ مش مجرد شيخ قبيلة بيحل مشاكل العائلات، ده رئيس شبكة تجارة سـ,ـلاح واسعة جداً في سيناء واللي حواليها!
السر الخطير ده اللي شافته بعينها خلي نفسها يتزنق جوه صدرها، وفهمت ليه مانعها خالص من الخروج أو تسيب الديرة؛ مش بس عشان يحميها من الديون، ده عشان هي بقت عارفة أسرار أضخم بكتير من اللي عقلها البسيط ممكن يستوعبه.
وبينما كانت واقفة بتسمع وهي مذهولة ومرعبة، ودمها اتجمد من الخوف، فيه حد حس بوجودها ورا الصخور. وقف لثواني، وقبل ما تلحق تتحرك وتهرب، ظهر قدامها فجأة زي الجبل الواقف في الضلمة؛ ده الشيخ نفسه.
عينه الغامقة كانت بتلمع بحدة تمـ,ـوت تحت ضوء القمر، وقرب منها بخطوات بطيئة وتخوف لحد ما بقت أنفاسه القريبة متخلوطة بأنفاسها السريعة. قال بصوت خشن واطي، كأنه بيقطع ظلمة الليل بسيف حاد: — ايش منزلك هالوقت يا بنت الناس؟ النوم ما زارك، والا عيونك تحب تدور على أشياء ما تخصها؟
بلعت ريقها بصعوبة كبيرة، وجمعت كل شجاعتها اللي باقية عشان ترد بصوت بيترجف غصب عنها: — أنا.. أنا كنت عطشانة وطلعت أدور على ماء.. وبعدين، إيه اللي بيحصل هناك ده؟ إيه الصناديق والرجالة دي؟! ضيق عينه أكتر، وقرب خطوة تانية خلت جسمها يلزق في ستر الخيمة من ورا، وقال بنبرة تحذيرية خطيرة جداً: — اللي يدور على شي ما يعنيه، يلقى ما لا يسره يا أم ياسين.
. وعينك اللي شافته الليلة، لازم تتنسى فوراً وتتسكر بالچيد. هالديرة فيها أسرار ما تهم حرمة مثلك، وتجاوزك لحدود خيمتك بالليل يعرضك لخطر ما تقدرين تتحملينه. ردت بغضب مستدار تحت طبقات من الخوف الحقيقي: — خطر إيه؟! انا فهمت دلوقتي ليه حابسني هنا ومش عايز تخليني أرجع مصر!
إنت خايف لا أبلغ عنك وعن تجارة السـ,ـلاح اللي بتعملوها في الصحراء دي! إنت إنسان مجـ,ـرم.. وقبل ما تكمل كلامها، مد إيده القوية وسد بوقها برقة صارمة وحازمة، ومنع أي صوت تاني يطلع، وقرب بوشه لحد ما بقا قريب جداً منها، وقال بنبرة مليانة تهديد وسيطرة كاملة: — إياكِ.
ياكِ تعيدي هالكلام مرة ثانية، ولا تنطقي بحرف واحد برا دارك عما شفتيه. أني ما أجرمت، أني أحمي أرضي وربعي وناسي. وإن كنتِ خايفة على نفسك وعلى هالوِلد الصغير، فاسمعي زين؛ مكانك هِنا محفوظ، وحمايتي لكِ واقعة لا محالة، بس لسانك الطويل هذا.
. يبيله قص لجل ما يجيب لكِ الموـ,ـت! بعد عنها ببطء شديد، وسابها واقفة مكانها في الضلمة، بتنهج بقوة وقلبها بيترجف بين الخوف والذهول، وهي عارفة كويس إنها بقت محبوسة عند راجل ما بيلنش قلبه، في عالم ضلمة وخطير ما فيهوش رحمة للضعفاء أبداً. يتبع…..




