روايات وقصص

لم يبقي لنا الا الوداع ل مني حافظ ج١

فوقفت هالة تحدق به بدهشة، وأسرعت إلى الأسفل حين رمقها أمجد بنظرة تحذيرية أخيرة، وتابعها حتى اختفت.

وزفر بقوة وتطلع نحو شُهدي بحرج، فهو لم يضع في حسبانه أن تكون المواجهة بينهما هكذا.

وخشى أن يتعنت معه ويثأر لكرامته ويرفض طلبه، فَزم شفتيه وأردف:

– أنا عارف إن حضرتك شايفني أسوأ بني آدم عرفته، وناكر للجميل، وفاكرني بتسلى بمنار.

رفع شُهدي عينه ونظر إلى وجهه، وود لو يصفعه لخيانته الأمانة، ولكنه تراجع وأردف بما في نفسه:

– للأسف أنا مش شايف غير الخذلان وخيبة الأمل، فِبنتي اللي وثقت فيها وأديتها الحرية والآخر خذلتني وغدرت بيا.

هز أمجد رأسه بالنفي وسارع بقوله:

– لا يا عم شُهدي، منار معملتش حاجة تخزيك، ولو على طلوعها هنا فأنا اللي طلبت منها تطلع علشان أقدر أقنعها توافق تخليني أقابلك وأطلب أيدها منك.

اتسعت عينا شُهدي وحدق به بدهشة وسأله بريبة:

– وهو أنت كنت عايز تطلب أيدها وهي اللي رفضت! طب ليه؟

خفض أمجد رأسه وأجابه بحرج:

– علشان مش عايزة تزود الحِمل عليك، يا عمي منار بتحبك ودايمًا تقول نفسي أساعد بابا وأشيل الحِمل معاه.

ولما كنت أقولها خليني أتكلم معاه، تقولي أنا عارفة إن بابا مش هيرفض، بس هو هيضغط على نفسه بزيادة، ودا أنا مش هقدر أقبله.

رُغم قوله إلا أن شُهدي لم يشعر إلا بالخزي، فأدار بصره حوله وأشار بيده قائلًا:

– عمومًا زي ما أنت شايف، لا دا المكان ولا الوقت المناسب للكلام، ولو أنت فعلًا عند قولك وطلبك، فأنا هستناك بكرة بعد صلاة المغرب، عن إذنك.

أومأ أمجد، ولكنه سرعان ما أحس بالخوف من ردة فعله نحوها، فاعترض طريقه قائلًا:

– عمي أرجوك بلاش تعنف منار، وصدقني اللي حضرتك شوفته كان لحظة طيش لا أنا ولا هي عملنا حسابها.

وأقسم لك إن منار عمرها ما سمحت لي ألمس أيدها، علشان بتخاف من ربنا، وحرصها على دينها، وخوفها على حضرتك من أنها تخذلك.

لم يعقب شُهدي على حديثه، واستدار عنه واتجه لأسفل، وتبعه أمجد بقلق شابه الضيق، وهو يلعن هالة لافسادها كل ترتيبه.

وبالأسفل أوصدت منار غرفتها، ورفضت الاستجابة لطلب رنا ونهلة الدخول إليها، وارتمت فوق فراشها تبكي.

حتى انتبهت لصوت والدها يأمرها باللحاق به لغرفته، فَاعتدلت وكفكفت دموعها.

فَوقع بصرها على صورتها في المرآة، فأشاحت بوجهها وهي تقول:

– بقيتي فنظر نفسك أسوأ واحدة يا منار، بعد ما كسرتِ نفس بابا.

وقفت منار أمام والدها برأس منكس وعيون باكية، بينما راقبها شُهدى بأسى للحظات، فلم يتحمل رؤية انكسارها فأشاح بوجهه عنها وأردف:

– ليه عملتِ كده يا منار؟

ارتفع صوت نحيبها، فَزاده غضبًا، فاستدار إليها وأضاف:

– اوعي تفتكري أني هَصدق عياطك وأنسى اللي شوفته فوق، وأقول عيلة وغلطت والمسامح كريم.

أنتِ يا محترمة ضربتيني فِمقتل، وأنا لا هسامحك ولا هنسى، علشان أنتِ استغليتي ثقتي بيكِ، وخدعتيني بتمثيلك، وافتكرتِ أني مش هعرف بعلاقتك مع البيه.

حاولت منار أن تخبره بحقيقة الأمر، ولكنه رفض قائلًا:

– مهما حاولتِ تقولي، مش هقدر أنسى الخذلان اللي شفته منك.

فيا ريت من هنا ورايح تحافظي على مكانك بعيد عني، ومتحاوليش تتكلمي معايا إلا للضرورة وبس.

ولو ينفع تخلي حد من أخواتك يتكلم بدل منك يبقى أحسن، وعلشان تبقي عارفة إن البيه اللي تعرفيه كتر خيره قال لي إنه عايز يرتبط بيكِ.

ما هو بعد اللي حصل أنا مجبر أوافق، علشان أداري على أي حاجة حصلت بينك وبينه و…

شهقت منار لِجوره عليها بكلماته، فارتمت أسفل قدميه وهتفت بتوسل:

– والله ما حصل بينا أي حاجة، وأمجد عمره ما حاول يتجاوز حده معايا، صدقني أنا…

صرخ شُهدي بها ومنعها من الحديث، وأمسك يدها بحزم وحذرها بقوة قائلًا:

– اخرسي، أنا مش قادر أسمع صوتك ولا متحمل أشوف وشك.

وبدل ما أنتِ قاعدة تتبجحي قصادي إنه محاولش يلمسك، روحي استغفري وتوبي عن الذنوب اللي مغطياكِ بكلامك معاه.

ولا يا أستاذة ياللي بتروحي دروس الفقه والدين، متعرفيش إن كلامك معاه من البداية حرام.

أبعدها عنه، لكنها لم تهتم بأي ألم، وتطلعت نحوه باكية، وأمام نظراته المحتقنة بغضبه نكست رأسها.

فسمعته يضيف بحسرة:

– أنتِ لا عملتي حساب لِربنا، ولا عملتي حساب لِسمعتي وشيبتي، وكنتِ قريبة منه على الملأ، ومفكرتيش إن لو حد شافك من الجيران كان زمان سيرتك على كل لسان.

حاولت منار استجداء عفوه، ولكنه تشبث برفضه، وحكم عليها بِملازمة غرفتها وبِعدم مغادرتها المنزل حتى لِدروسها.

ظل شُهدي بغرفته يسير بلا هوادة، حتى تذكر أمر هالة، فاتجه إلى غرفتها وولجها.

فهبت الفتاتان بخوف، وحين أحكم شُهدي غلق الباب وبّخهن بقسوة وعاقبهن عقابًا صارمًا حتى أفرغ شحنة غضبه.

ووقف يتطلع إليهم باشمئزاز ونفور وأردف:

– من النهارده لو عرفت إن واحدة فيكم نقلت حرف ولا قالت كلمة عن حد، مش هكتفي بعقابها.

لا أنا هأدبها بقسوة وهعاقبها لحد ما تعجز عن الحركة، طالما مش عايزين تحترموا نفسكم وتبطلوا نقل كلام وفتنة.

واعملوا حسابكم أنا خلاص قاعد لكم وِهَربيكم من أول وجديد، ويا تتعلموا الأدب يا هدفنكم وأخلص منكم قبل ما تفضحوني بين الناس.

لم يغمض لِشُهدي جفن طوال الليل، فكيف ينام وكرامته استباحت على يد ابنته وربيبه الذي ظنه سيصون معروفه معه؟

ألم أحتشى بقلبه ودمعة ألهبت عينه، زفرة حارة غادرت حلقة صاحبها، تأوه مكتوم والتفاتة نحو صورة جمعت بينه وبين زوجته الراحلة.

فخفض بصره بخزي وأردف:

– معرفتش أصون الأمانة يا حنة واتكسرت، بنتك اللي كنت حاطط عليها أمل كبير غدرت بيا.

8 من 8التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى