منوعات

صمت غفران التامن

امانى السيد

في صباح اليوم التالي، لم يعد مراد قادرًا على احتمال هذا الصمت الذي يحيط به من كل جانب. قضى ليلته يتقلب في فراشه، يفتح هاتفه كل بضع دقائق ليتأكد إن كانت غفران قد قرأت رسائله أو حاولت الاتصال به، لكن لا شيء تغير. حتى غرفتها التي دخلها أكثر من مرة، كانت تذكره بغيابها في كل تفصيلة فيها، فقرر أن يذهب إلى بيت أهلها مرة أخرى، وهذه المرة لن يغادر قبل أن يراها ويتحدث معها.
وصل إلى المنزل في وقت مبكر، وترجل من سيارته بخطوات سريعة، ثم طرق الباب بعنف نسبي، وما إن فتح له والد غفران حتى اندفع بالكلام قبل أن يسمح له الرجل حتى بالترحيب به.
ـ أنا لازم أشوف غفران يا عمي، والموضوع ده مينفعش يفضل كده! أنا بقالي يومين بحاول أكلمها وهي مش بترد، وكل ما أجيلكم ترفضوا تخلوني أشوفها. إنتوا عايزين توصلوا لإيه بالظبط؟

نظر إليه والدها ببرود، ثم تنحى عن الباب قليلًا دون أن يدعوه للدخول.
ـ إحنا مش عايزين نوصل لحاجة يا مراد، بنتي قالت كلمتها، وإنت المفروض تحترم قرارها بدل ما تفضل تلف وراها.
اشتعل الغضب في عيني مراد، وقال بحدة:
ـ قرارها إيه اللي أحترمه وأنا مش عارف هي قالت إيه ولا حصل إيه؟! أنا جوزها، ومن حقي أتكلم معاها، مش كل ما أجي حضرتك تقفلي الباب في وشي!
ـ جوزها اللي فاكر إن كلمة جوزها دي تديلك الحق يعمل اللي هو عايزه؟! إنت كنت فاكر غفران هتفضل ساكتة لحد إمتى؟ ولا كنت متخيل إنها عمرها ما هتقدر تقولك لأ؟

ـ أنا معملتش حاجة تستاهل كل ده!
ضحك والدها بسخرية، ثم قال:
ـ أهو ده اللي يوجع يا مراد، إنك لحد دلوقتي مش شايف إنت عملت فيها إيه. إنت مش بس اتجوزت عليها، إنت خليتها تعيش في بيتها من غير كرامة ولا مكان، ولما رجعت لأهلها تدور على الأمان، جيت بدل ما تحاول تفهم غلطك، تتهمنا إننا بنضغط عليها!
اقترب مراد منه خطوة، وقد ارتفع صوته رغم محاولته السيطرة على نفسه.
ـ أنا مش جاي أتشاكل مع حضرتك، ومش هقبل إن حد يتكلم بالنيابة عن غفران. أنا عايز أسمع منها هي، ولو هي قالتلي إنها مش عايزاني، ساعتها هبقى أتصرف.
ـ وهي قالت إنها مش عايزاك، وأنا مش هخليها تواجهك عشان تسمع منها الكلام اللي إنت مش عايز تصدقه.
ـ يبقى حضرتك بتمنعني عنها، وده مش من حقك!
ـ وأنا بقولك بنتي مش هتشوفك إلا لما هي تقرر ده بنفسها. إنت مش هتفرض نفسك عليها لمجرد إنك مش متقبل إنها مشيت.
احتدم النقاش بينهما، حتى خرجت غفران من غرفتها بعدما سمعت الأصوات المرتفعة. كانت تقف عند مدخل الصالة، تستمع إلى مراد وهو يصر على رؤيتها، وإلى والدها الذي يرفض السماح له بالاقتراب منها. وللحظات، شعرت أن الأمر أصبح مواجهة لا مفر منها، وأن استمرار اختبائها خلف صمتها لن يغير شيئًا.
اقتربت منهما وقالت بهدوء:
ـ خلاص يا بابا، سيبه يدخل. أنا هقابله وهتكلم معاه.
التفت إليها والدها فورًا، وظهرت في عينيه علامات القلق.
ـ يا بنتي، إنتِ مش مضطرة تعملي كده دلوقتي لو مش مستعدة.

ـ أنا مستعدة يا بابا، ومش هتراجع عن قراري. أنا بس عايزة أخلص الموضوع ده بوضوح، من غير ما أفضل مستخبية وكل شوية ييجي هنا تحصل مشكلة.
نظر إليها مراد بلهفة، وكأنه لم يصدق أنها ظهرت أمامه أخيرًا. حاول الاقتراب منها، لكنها أشارت إليه أن ينتظر، ثم التفتت إلى والدها.
ـ متقلقش عليا، أنا مش هرجع في كلامي.
أومأ والدها على مضض، ثم سمح له بالدخول، لكنه ظل قريبًا منهما، مستعدًا للتدخل إذا شعر أن مراد يحاول الضغط على ابنته.
جلس مراد في غرفة الضيوف، وجلست غفران في المقعد المقابل له، وبينهما مسافة بدت له أكبر من كل المسافات التي تفصل بينهما منذ زواجهما. ظل ينظر إلى وجهها، يحاول أن يقرأ ملامحها، لكنه لم يجد ابتسامتها المعتادة، ولا تلك النظرة الهادئة التي كانت تستقبله بها دائمًا. كانت تجلس أمامه بثبات لم يألفه منها، وكأنها لم تعد المرأة التي يعرف كيف يجعلها تتراجع بكلمة أو يهدئها بابتسامة.
بدأ حديثه بصوت حاول أن يجعله هادئًا:
ـ غفران، أنا مش فاهم إنتِ وصلتي نفسك لكده ليه. كان ممكن نتكلم في أي حاجة مضايقاكي بدل ما تسيبي البيت وتمشي بالشكل ده. أنا فضلت أتصل بيكي وأبعتلك، وإنتِ مش راضية حتى تردي عليا.
نظرت إليه طويلًا، ثم سألته بهدوء:
ـ وإنت كنت عايزني أرد أقولك إيه يا مراد؟

ـ تقوليلي إيه اللي مزعلك، ونشوف حل. أنا عمري ما كنت عايز أوصلك لمرحلة إنك تطلبي الطلاق.
ابتسمت غفران ابتسامة باهتة، ثم قالت:
ـ إنت عمرك ما فكرت أنا وصلت للمرحلة دي إزاي. كل اللي شاغلك دلوقتي إني مشيت، وإنك مش قادر توصلى، لكن قبل ما أمشي، كنت فين؟ لما كنت قاعدة في نفس البيت معاك، ومش لاقية منك اهتمام ولا سؤال، كنت فين؟
تنهد مراد، وحاول أن يقترب من الحديث الذي ظل يهرب منه.
ـ أنا عارف إني قصرت معاكي، وممكن أكون غلطت في حاجات كتير، بس إنتِ كمان لازم تفهمي إن شغلي ومسؤولياتي…
قاطعته دون أن ترفع صوتها:
ـ شغلك ومسؤولياتك مكنوش مانعينك تهتم بشذا، ولا تسأل عليها، ولا تحرص إنها تكون مرتاحة ومبسوطة. إنت كنت عارف إني موجودة، وعارف إني مش هعمل مشكلة، فسبتني على جنب، وكأن وجودي في حياتك حاجة مضمونة مهما عملت.
ـ الموضوع مش زي ما إنتِ متخيلاه. أنا مكنتش قاصد أوجعك، وشذا…
ـ متدخلش شذا في كلامك على إنها حاجة حصلت بالغلط يا مراد. إنت اتجوزتها بإرادتك، وقررت إنها تبقى معاك في نفس الفيلا اللي أنا عايشة فيها، وكنت عايزني أتعامل مع الموضوع كأن مفيش حاجة حصلت. وحتى لما كنت بشوف بعيني اهتمامك بيها، كنت بكتم زعلي وأقول لنفسي إن دي طبيعة الظروف، وإن لازم أستحمل.
سكتت للحظة، ثم أكملت وهي تنظر مباشرة إلى عينيه:

ـ بس أنا فهمت دلوقتي إن المشكلة مكنتش في شذا لوحدها. المشكلة إنك عمرك ما اهتميت بيا بالشكل اللي كنت بستناه منك. إنت كنت عايزني موجودة في حياتك من غير ما أطلب منك حاجة، ومن غير ما أعاتبك، ومن غير ما أحسسك إن ليّا حق عندك.
هز مراد رأسه معترضًا، وقال بسرعة:
ـ لأ يا غفران، إنتِ ليكي حق عندي، وأنا مش بنكر ده. وأنا ممكن أصلح كل حاجة، وممكن نبدأ من جديد، وأنا هراعي مشاعرك بعد كده، بس متاخديش قرار زي ده وإنتِ متضايقة.
ضحكت غفران ضحكة قصيرة، لم تحمل أي فرح، ثم ردت:
ـ نبدأ من جديد؟ بعد إيه يا مراد؟ بعد ما بقيت بكره وجودي في بيتي؟ بعد ما بقيت أحس إني غريبة في حياتك؟ إنت فاكر إن المشكلة إني شفتك مع شذا واتوجعت، وإنك لو وعدتني إنك هتراعي مشاعري خلاص كل حاجة هترجع زي الأول؟
ـ أنا مستعد أعمل أي حاجة عشان نصلح اللي بينا.
ـ بس أنا مش عايزة أصلح يا مراد.
خرجت الكلمات من فمها بهدوء، لكنها وقعت عليه كالصاعقة. ظل ينظر إليها غير مصدق، بينما تابعت هي حديثها بعدما شعرت أن الوقت قد حان لتقول كل ما ظلت تخفيه طويلًا.
ـ إنت كده كده كنت هتتجوز شذا وتعمل اللي إنت عايزه، لأنك عمرك ما اهتميت بيا ولا فكرت أنا حاسة بإيه. وحتى لو كنت رفضت في الأول، كنت هتتجوزها برضه، لأنك ببساطة كنت عايزها، ومكنش فارق معاك أنا موافقة ولا رافضة، مبسوطة ولا مكسورة.
ـ إنتِ ظالماني يا غفران. أنا مكنتش شايف إنك بالشكل ده، ولو كنت عارف إنك بتتعذبي، مكنتش سبت الأمور توصل لكده.
نظرت إليه بألم، وقالت:

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى