
والي الساعة عشرة، دخل محمود ولقى إخواتي قاعدين.
قال:
— هو في ناس عندنا؟
قلت:
— إخواتي.
رحب بيهم وقعد، وبعد شوية أخويا أبو بسام طلع شيك بـ200 ألف جنيه وكارت البنك.
محمود بص له بدهشة:
— إيه ده؟ المشروع بتاعكم كسب كده في ست شهور؟
قال أخويا:
— الحمد لله، مكسبه كويس.
وبدأ محمود يقرب منه ويسأله عن التجارة والمشاريع، وأنا كنت ساكتة.
وأثناء العشا، أبو بسام قال لي:
— نهاد، تعالي اقعدي جنبي، عايزك في موضوع.
قعدت جنبه، وفضلنا نهزر ونضحك، ومحمود قاعد بعيد.
قلت له:
— أنا عايزة أرجع حقي، كفاية اللي محمود عمله فيا.
قال:
— لو عايزة تدخلي معانا في مشروع، ساهمي.
قلت:
— كل اللي يهمني أرجع الـ600 ألف اللي ضاعوا مني.
محمود سمعنا وقال:
— هترجعيهم إن شاء الله، اصبري.
وأخويا قال له:
— لما يبقى عندنا مشروع مناسب، نبقى نكلمك.
فضل محمود يسأل عن المشاريع، وكل ما يسأل، أبو بسام يغير الموضوع.
وأنا في سري بقول:
اصبر يا محمود… فلوسي هترجع، بس مش بالطريقة اللي إنت فاكرها.
بعد ما إخواتي مشيوا، فضلت أرتب البيت، ومحمود مستنيني.
لحد ما ناداني وقال:
— نهاد، تعالي اقعدي معايا. أنا الليلة دي مش طايق عفاف.
قعدت جنبه وقلت:
— مالك؟
قال بحسرة:
— أنا ندمت على الجوازة دي. عفاف لا بتقدر ولا بتساعد ولا بتراعي ظروفي. من يوم ما اتجوزتها وأنا في هم ونكد وخساير.
قلت:
— صلي على النبي يا محمود، إيه اللي حصل؟
قال:
— أنا غلطت. إنتِ كنتِ واقفة جنبي، وبدل ما أعوضك وأرد لك جميلك، رحت جبت واحدة تانية على دماغي.
وبعدين قال:
— أنا ندمان، ووعديني ترجعي تقفي جنبي لحد ما ظروفي تتحسن.
قلت:
الكاتبة نرمين عادل همام
— حاضر، بس رجع لي الـ600 ألف الأول.
اتنهد وقال:
— مقدرش أجيبهم كلهم، بس أكتب لك نص البيت باسمك.
هزيت راسي:
— لا، مش عايزة نص البيت. أنا ساكنة فيه أصلًا. أنا عايزة فلوسي.
قلت له:
— دبر نفسك، خد قرض، بيع عربية، اعمل أي حاجة. المهم رجع لي فلوسي، حتى لو 500 ألف أحطهم مع أخويا في مشروع وأعوض خسارتي.
قال:
— طب والأقساط؟
رديت:
— لو رجعت لي فلوسي، هقف جنبك. وإخواتي كمان ممكن يساعدوك ويدخلوك معاهم في مشاريعهم.
فضل طول الليل يقنعني إنه كره عفاف وندمان على الجوازة، وأنا كنت عاملة نفسي مصدقاه.
فعلًا، الصبح دبر 500 ألف جنيه وقال لي:
— خديهم وديهم لأخوكي يشغلهم.
قلت له:
— أبو بسام رفض ياخدهم، وقال دي فلوسك ومش هينفع يشغل فلوس واحد خدع أخته.
قلت:
— لو عرف إنهم فلوسي، ممكن يوافق.
وفعلًا، عزمت أخويا، ومحمود قال له:
— الفلوس دي فلوس نهاد، وهي ساعدتني بيها وقت بناء البيت.
أخويا سأله:
— متأكد؟
— متأكد.
قال:
— يبقى نكتب الكلام ده في ورقة ويشهد عليها ناس.
وافق محمود، واتكتب إقرار رسمي إن الفلوس تخصني.
وبعدها أخويا كلمني وقال:
— كتبنا الورقة وشهدنا عليها، وخدنا الـ500 ألف. هضيف عليهم من عندي وأرجع لك فلوسك.
وبالفعل، شغّل الفلوس، وأنا استخدمت اللي رجع لي في دفعة لبيت جديد، وبقيت أسدد قسط 7 آلاف جنيه في الشهر، والبيت اتأجر بحوالي 115 ألف جنيه في السنة.
ساعتها حسيت إني أخيرًا رجعت جزء من حقي.
لكن محمود ماكانش يعرف الحقيقة كلها، فقلت له:
— أنا اديت الفلوس لأخويا يشغلها، وزودت عليهم الـ200 ألف اللي عندي.
بص لي باستغراب وقال:
— ليه كل ده؟ إنتِ مش خايفة؟…
بصيت له وقلت:
— يخسر؟ دي وحدات سكنية، وأخويا مشارك فيها مع شركات كبيرة، والمكسب إن شاء الله مضمون.
قال:
— طيب هتتصرفي إزاي ومرتبك كله أقساط؟
قلت:
— أخويا هيبعت لي 5 آلاف كل شهر من مرتبي اللي حطيته معاه، وكده الدنيا هتمشي معايا لحد ما أخلص الأقساط.
ولما المرتب نزل، كلمت أخويا وقلت له:
— ابعت لي الـ5 آلاف في ظرف مع السواق، عشان محمود وعفاف عندي.
وصل الظرف، وابني أخده من السواق.
فقلت بصوت عالي، متعمدة إن محمود يسمع:
— خد يا محمود الـ3 آلاف دول مساعدة مني، وربنا يقدرني وأفضل واقفة جنبك لحد ما تخلص ديونك.
محمود بص لعفاف وقال:
— شايفة؟ أهي مرات أخوها واقفة جنبه وبتساعده وبتراعي ظروفه.
عفاف اتضايقت، وهو حاول يبرر:
— يعني الجواز مش عيب ولا حرام، وناس كتير بتتجوز مرة واتنين.
وأنا كنت كاتمة ضحكتي.
فضلت على الحال ده حوالي 3 شهور، كل شهر أدي محمود 3 أو 4 آلاف، وكمان كنت أعزم عفاف عندي مرة أو مرتين في الأسبوع.
وفي يوم قلت له:
— لو محتاج الشغالة تساعد عفاف، مافيش مشكلة.
وبقت الشغالة تطلع لها، وتسمع منها كلام كتير، وكانت بترجع تحكي لي كل حاجة.
كنت حاسة إن محمود ما يستاهلش مني أكتر من كده، لكن قررت أكمل خطتي.


