روايات وقصص

احكام بقلم زهرة الربيع

عند خالد، وصل الحارة ونزل من التاكسي، وجري بأقصى سرعة على بيته وكلام الناس بيتردد في ودانه عن الخلاف والمشاكل اللي حصلت.
وصل شقتهم وبقى يخبط على الباب بقوة وجنون.
نوال فتحت بسرعة وقالت… خالد.. حمد لله على السلامة.
خالد مردش ودخل وهو بيدور على أخوه بعيونه وقال… جوده فين.. هو فيييين؟
جوده طلع وقال ببرود… هنا.. حمد لله على سلامتك يا ابن أبويا.
خالد مسكه من هدومه بغضب وقال… أحكام فين.. مراتي فين يا جوده.. وإيه اللي الناس بتحكيه تحت ده؟
جوده نزل إيديه بضيق وقال… إيه يا خالد.. هتضرب أخوك الكبير ولا إيه؟
وقعد بمنتهى الهدوء وقال… اللي حصل حصل، ربنا يعوضك، مرتك مشيت لبيت أهلها بعد المشاكل اللي حصلت.
خالد الأرض كانت بتدور بيه، قال بذهول… إيه اللي حصل يا جوده؟
جوده اتنهد وقال… اللي حصل إني جيت لقيت الدنيا مقلوبة، والناس كلها بتتكلم، والموضوع كبر ومبقاش ينفع يكمل.
خالد بصله بحزن ميتوصفش وقال… ليه يا جوده ليه.. ده أنا أخوك، يهون عليك تشوفني مكسور؟
جوده وقف وقال… انت تقدر تتحاشى كل ده.. اهدى ونظف اسمك وشرفك بأنكم تتفاهموا بعيد عن المشاكل.
خالد ابتسم بسسخرية ووجع وقال… ماشي يا ابن أبويا.. شكراً على النصيحة.. حنان فين؟ أمها كلمتني ومنهارة عايزه تشوفها.
خالد دخل على أوضة بنته، لقاها نايمة ودموعها على خدها، شالها بحزن ولسه هيطلع من الشقة.
جوده قال… راجع نفسك يا خالد، مش هينفع تسبها كده.
خالد بلع ريقه بحزن وطلع بشرود وهو حاضن بنته.
نزل وتوجه ناحية بيت أحكام، وخالد كان منزل راسه من نظرات الناس ومشي بسرعة.

عند أحكام، كانت مستنية عند الباب ودموعها منشفتش.
أمها قالت بحزن… يا بنتي حرام عليكي نفسك، زمانه على وصول ارتاحي شوية.
أحكام قالت بدموع… حنان يا ماما سبتها بتعيط.. والله أعلم هما عاملين إيه.. أنا هتجنن.
ابراهيم كان واقف وقال بحزن… اهدي يا أحكام، خالد عارفك كويس وكمان عارف أخوه ومش هيظلمك.
أحكام لسه هتتكلم، شافته جاي وشايل بنتها، ابتسمت بسعادة وجريت عليه وبقت تبكي بقوة.
خالد قال… أهدي.. انا هنا خلاص.
أحكام مسحت دموعها بسرعة وهزت راسها بالموافقة وقالت… فعلاً.. خلاص أنت بقيت هنا أنا مطمنة.
خالد ابتسم لها وادلها بنتها ودخل سلم على والدتها.
أحكام قالت… يا حبيبتي يا قلبي.. جسمها بارد..
خالد لسه هيطمنها، ابراهيم قرب منه وقال… وحشتنا يا خالد.
بس خالد بعد خطوة وقال بجمود… أحكام، ممكن تسيبي البنت مع حماتي وتجيبي معايا.. لازم نتكلم.
أحكام وابراهيم بصوا لبعض بتوتر، وأحكام قالت… طبعاً أكيد.
ونيمت البنت على الكنبة ودخلت معاه البلكونة.
أحكام أول ما جات تتكلم، خالد قال بسرعة… قبل ما تتكلمي.. لازم تعرفي أني مستحيل أشك فيكي يا أحكام.. بس عايز أعرف منك الموضوع باختصار وصل فين.
أحكام هزت راسها بالموافقة وقالت بدموع… اللي حصل إني كنت في المطبخ، وحنان كانت بره، وحصلت مشادة كلامية مع جوده ومراته على حاجات تافهة وكبرت لوحدها ووصلت للي انت شوفته.. والله ما عملت حاجة غلط.
خالد غمض عينه بحزن رهيب وقال… مصدقك يا أحكام.. مصدقك يا قلبي.
أحكام ابتسمت وسط دموعها وقالت.. أنا.. أنا كنت مستنياك.. كنت متأكدة هتصدقني وتعرف إننا مظلومين.
بس قطعت كلامها لما قال بصوت متعب… بس للأسف مش هينفع نكمل سوا.. مهما كنت مصدقك، الكلام وك كثرة المشاكل بين العيلة بقت فوق استيعابي.
أحكام اتسعت عينها بصدمة وقالت… ايه.. انت.. انت بتقول ايه؟!
خالد قال بدموع… اللي سمعتيه.. أنا مصدقك ومش شاكك في حرف، بس سامحيني.. دي غلطتي أنا لأني سبتكم في العمارة دي.. لحد هنا وطريقنا انتهى.
أحكام الأرض بقت تدور بيها وكانت هتقع من طولها، وقالت بصدمة… أنت لو طلقتني دلوقتي تبقى بتأكد كلامهم وتظلمني زيهم!
خالد قال… لأ، والله ما بشك فيكي، بس مش هقدر أكمل.. أنتي طالق يا أحكام، وكل حقوقك هتوصلك بزيادة.
ممكن تكونوا فاكرين إن دي أسوأ حاجة، لكن اللي جاي كان صعب كمان.. أحكام من كثرة الصدمة وهي بتجري ورا خالد وهو ماشي ومعاه البنت، رجلها انزلقت على السلم ووقعت وقعة شديدة، والدم غرق المكان.
ابراهيم صرخ باسمها برعب… أحكاااااام!
خالد انتبه واتصدم بشدة لما شافها بالحالة دي، وتجمد مكانه مش قادر يتحرك.
ابراهيم بقا يصرخ… إسعاف.. هاتوا إِسعاف بسرررعة!
الناس تلمت وطلبوا الإسعاف، وخالد أخيرًا اتحرك وجري عليها وهو بيبص لها برعب… أحكام.. أحكام حبيبتي ردي عليا!
ابراهيم ركب معاها هي ووالدتها في الإسعاف، وخالد أخد بنته وركبوا وراهم على المستشفى.

بعد ساعات في المستشفى:
الدكتور خرج وقال بأسف… مين جوز الحالة دي؟
جوده وخالد قربوا منه.
الدكتور قال… المدام بخير ومحصلهاش حاجة خطيرة، شوية جروح وكدمات وذراعها اتجبس، وكل ده إصابات طفيفة.. بس للأسف.. الجنين سقط.
خالد اتسعت عينه بصدمة وقال بهمس… جنين؟
الدكتور قال… أيوه، للأسف كانت حامل في أول الشهر الثاني وما كانتش تعلم.. عن إذنكم.
الدكتور مشي، وخالد قعد على الكرسي حط إيديه على راسه وبقى يبكي بدموع وندم شديد على كل اللي حصل.
ابراهيم بص له بقرف واستحقار، واخد أم أحكام وحنان علشان يدخلوا يطمنوا عليها، وهم عارفين إنها سليمة جسدياً، لكن قلبها مكسور من اللي شافته.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”

2 من 2التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى