روايات وقصص

جمعيه مرات أبنى 2

اماني سيد

ـ إزاي أسيبه؟
ـ سيبه الليلة.
ـ وليه؟
ـ لأننا كلنا متعصبين.

وبعدين خدت العقد وحطته في الظرف تاني.
ـ بكرة نتكلم.

دخلت أوضتها وقفلت الباب. أما أنا فدخلت أنام وأنا مقتنعة إن بكرة هتنسى. وإن يومين والموضوع هيعدي. لكن تاني يوم الصبح… صحيت على صوت جرس الباب. بصيت في الساعة. كان بدري جدًا. فتحت الباب وأنا مستغربة. ولقيت قدامي صاحبة الجمعية نفسها. واقفة ومعاها راجل كبير في السن. وأول ما شافتني قالت:
ـ صباح الخير.. جايين نتكلم في موضوع الفلوس اللي اتسلمت باسم غير صاحبتها.

وفي اللحظة دي… حسيت إن الموضوع اللي كنت فاكرة إنه انتهى… لسه بيبدأ.

وقفت أبصلهم وأنا مش فاهمة أقول إيه. صاحبة الجمعية دخلت هي والراجل الكبير، اللي عرفت بعد كده إنه أخوها. وقعدوا في الصالون. ابني خرج من أوضته على الصوت، وإيمان خرجت هي كمان. صاحبة الجمعية بصت لإيمان وقالت:
ـ يا بنتي أنا ماكنتش أعرف إن الموضوع واصل لكده.

إيمان ردت بهدوء:
ـ ولا يهمك يا أم سيد.

بعدها بصت الست ناحيتي وقالت:
ـ أنا جيت بس عشان أوضح حاجة.

سكتت شوية وكملت:
ـ يوم ما استلمتي الفلوس أنا صدقت كلامك عشان قولتي إنك جاية من طرف إيمان.

حسيت بالإحراج لأول مرة. أما أخوها فقال:
ـ وإحنا مش جايين نعمل مشاكل، إحنا جايين نشوف حل.

ابني اتكلم:
ـ والحل موجود.

وبص ناحيتي.
ـ هنرجع كل حاجة اتجابت.

سكت شوية وكمل:
ـ واللي ماينفعش يرجع هيتباع.

بصيتله بصدمة. لكن قبل ما أتكلم، لقيت إيمان هي اللي ردت.
ـ لا.

كلنا بصينا لها. قالت:
ـ لا للبيع ولا للمحاكم ولا للمشاكل.

استغربنا كلنا. قالت وهي باصة لي:
ـ أنا كنت زعلانة من الفلوس… لكن أكتر حاجة وجعتني إن حضرتك شفتيني عدوة.

سكتت. وأكملت:
ـ طول السنتين اللي فاتوا كنت بحاول أخلي البيت واقف على رجليه، وعمري ما فكرت أخد ابنك منك.

البيت كله سكت. وأنا لأول مرة أحس إن الكلام داخل قلبي. ابني قال:
ـ يبقى ننهي الموضوع.

سكتت شوية وأنا باصة لإيمان. ولأول مرة أحس إن البنت دي مش بتحاربني. ..دي كانت بتحاول تحافظ على بيتها بطريقتها. اتنهدت وقلت:
ـ خلاص يا إيمان… أنا هحل المشكلة دي.

إيمان بصتلي باستغراب.
ـ إزاي؟

قلت بهدوء:
ـ هتصرف.

ابني قال:
ـ يا أمي إحنا ممكن نرجع الحاجات وخلاص.

هزيت راسي.
ـ لا.
ـ ليه؟
ـ عشان الحاجات دي اتجابت واتركبت، والبيت اتبهدل عشانها كفاية.

إيمان قالت:
ـ بس الفلوس…
قاطعتها:
ـ قولتلك هتصرف. ماقولتش أكتر من كده.

وقمت من مكاني ودخلت أوضتي. قفلت الباب ورايا، وفتحت الدرج اللي محتفظة فيه بحاجتي القديمة. طلعت علبة صغيرة مخبياها من سنين. فتحتها بهدوء. وكان جواها سلسلة دهب غالية على قلبي جدًا. الله يرحم أبو ابني كان جايبهالي في أول عيد جواز لينا.

فضلت أبصلها شوية. وعيني دمعت من غير ما أحس. لكن في الآخر قفلت العلبة وقولت لنفسي:
ـ الفلوس لازم ترجع لصاحبتها.

تاني يوم الصبح نزلت لوحدي. ورحت للصائغ. وبعت السلسلة. ولما رجعت البيت كان معايا المبلغ. نادت على ابني.
ـ تعال يا ابني.

جالي وهو مستغرب. مديت إيدي بالفلوس.
ـ خد.

بصلي باستغراب.
ـ إيه ده؟
ـ فلوس الجمعية.

اتصدم.
ـ جبتيهم منين؟

ابتسمت ابتسامة صغيرة.
ـ من حاجة تخصني.

عرف إني مش عايزة أتكلم أكتر. قلتله:
ـ خدهم واديهم لإيمان.
ـ بنفسك أحسن.

هزيت راسي.
ـ لا… كفاية اللي حصل.

في اللحظة دي كانت إيمان خارجة من المطبخ. وشافت الفلوس في إيده. بصت بينا إحنا الاتنين باستغراب. ابني قال:
ـ أمي رجعت الفلوس.

إيمان بصتلي بعدم تصديق.
ـ رجعتيهم؟

هزيت راسي.
ـ أيوة.
ـ منين؟

ابتسمت وقلت:
ـ المهم إن حقك رجع.

سكتت شوية وبعدين كملت:
ـ وأنا آسفة يا إيمان.

الجملة كانت أصعب من بيع السلسلة نفسها. لكن أول ما قولتها حسيت براحة كبيرة. إيمان قربت مني. ومسكت إيدي. وقالت:
ـ وأنا كمان آسفة لو حسستك إني بخبي عنك.

ابتسمت لأول مرة من أيام. أما ابني فكان واقف يبص لنا وهو مرتاح. وأخيرًا حسيت إن البيت رجع بيت. لا فيه منتصر… ولا فيه مهزوم. فيه بس ناس غلطت. ..وعرفت تصلح غلطها قبل ما تخسر بعض.

ومن ساعتها بطلت احشر نفسى بين ايمان وجوزها واتاكد إن كل بيت بيمشى على قده.

تمت.

4 من 4التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى