روايات وقصص

جمعيه مرات أبنى 1

اماني سيد

عرفت من جارتي إن مرات ابني عامله جمعيه من غير ما تقولي، وقتها قررت أعملها درس عشان بعد كده تحرم تعمل حاجه من ورايا. أنا بقى قررت أورّيها معنى إن “البيت له كبيرة”. عرفت من جارتي ميعاد القبض بالظبط، وسبقت الكل.

روحت لجارتنا قبلها بيوم، وقولتلها ببرود أعصاب: “بصي يا أم سيد، إيمان بعتتني أخد الجمعية عشان ابنها تعبان ومش قادرة تيجي وعايزاه يروح للدكتور”. الجارة، اللي هي أصلاً من هواة القيل والقال، ما صدقت لقت حد “كبير” يخلصها من الحيرة، واديتني الفلوس وأنا مضيت مكانها!

رجعت البيت، ومن نفس الفلوس دي، جبت طقم كرسي جديد للسفرة، واشتريت شاشه جديدة وستارة شيفون تليق على الصالون، وركبت طقم مفاتيح كهرباء جديد في المطبخ. البيت بقى بيبرق، وأنا قاعدة حاطة رجل على رجل، مستنية العاصفة. جه اليوم الموعود..

مرات ابني لبست واتشيكت وراحت لجارتنا بكل ثقة عشان تقبض، لكن اتفاجئت إن أنا اللي أخدت الجمعية! لقيتها راجعة البيت وشها أصفر، وعيونها مدمعة، وبتهز في إيديها مش مصدقة اللي حصل. دخلت عليا وهي بتنهج: “ماما.. أنا.. أنا روحت لام سيد، قالتلي إنك إنتي اللي قبضتي الجمعية!”.

بصيت للستارة الجديدة، وبعدين بصيت للسفرة، وخدت رشفة من كوباية الشاي بمنتهى الهدوء، وقولتلها: “أهلاً يا حبيبتي، أيوة طبعاً.. قلت حرام الفلوس تضيع في أي كلام، فقلت أجدد البيت عشان تتبسطوا.. مش أحسن برضه؟”. شفت بعيني نظرة الانكسار والصدمة في عيونها، كانت عايزة تصرخ بس مش قادرة، لأنها عارفة إن أي رد فعل هيعمل مشكلة مع ابني، وأنا لعبتها صح.

بفلوسها، جددت بيتي، وكسرت شوكتها قدامي! إيمان فضلت تبص للشاشة والكراسي والستارة ومش عارفة تقول إيه، ورجعت بصتلي تاني:
ـ يعني إيه إنتي عارفه الفلوس دي أنا هعمل بيها إيه؟
ـ مايهمنييش يا حبيبتي، إنتي ماقولتلييش وخبيتي عليا من الأول، ودي جزات اللي يعمل حاجه من ورايا.

لقتها بتقوللي:
ـ دي هدفع منها قسط الشقة ومصاريف المدرسة، النتيجة بتاعت العيال محجوبة عشان لسه مادفعتش مصاريف المدرسة لمدة سنتين.
ـ مش مهم، اعملي جمعية تانيه وادفعي منها المصاريف مش هتغلى، لكن التلفزيون والحاجات اللي أنا جبتها دي هتغلى.

إيمان بصتلي بذهول، وكأنها مش مصدقة إن اللي حصل ده حقيقي. بلعت ريقها بالعافية وقالت:
ـ هو ابنك يعرف إنك أخدتي الجمعية وجبتي التلفزيون والحاجات دي؟

ضحكت وأنا باخد رشفة شاي وقلت بثقة:
ـ ابني؟! ابني ما يقدرش يقوللي حاجة.

فضلت باصة لي ثواني، وبعدها قالت:
ـ يعني لو عرف هيوافق على اللي عملتيه؟

حطيت الكوباية على الترابيزة ورديت بحدة:
ـ وأنا مستنية موافقته ليه؟ أنا أمه، والبيت ده بيتي قبل ما يكون بيتك.

هزت راسها بعدم استيعاب وقالت:
ـ بس الفلوس دي فلوسي.

قاطعتها فوراً:
ـ فلوسك إيه بس؟ إنتي اللي عايزة تاخدي من مرتب ابني وتحوشي من وراه، وأنا قفشتك.
ـ أحوش من وراه إيه؟! ده قسط الشقة ومصاريف العيال!
ـ كلام يتقال وخلاص. لو كنتي ناوية على حاجة محترمة كنتي قولتي من الأول، لكن طول ما الموضوع مستخبي يبقى أكيد فيه حاجة غلط.

إيمان بدأت أعصابها تفلت وقالت:
ـ يعني المفروض أقولك على كل جنيه بدخله أو بطلعه؟

رفعت حاجبي باستنكار:
ـ طول ما إنتي قاعدة في بيت ابني، أيوة أعرف.
ـ ده جوزي، مش ابن حضرتك بس!
ـ وده ابني قبل ما يكون جوزك.

سكتت لحظة وهي بتحاول تتمالك نفسها، وبعدها قالت:
ـ طيب لما يرجع من الشغل هنعرف رأيه.

ابتسمت بمنتهى الثقة واتكأت في مكاني:
ـ اسأليه، وأنا قاعدة أهو.
ـ ومش خايفة يزعل؟
ـ يزعل مني أنا؟ عشان حافظت على بيته؟ مستحيل.

إيمان بصت حواليها على الشاشة الجديدة والستاير والكراسي، وبعدها رجعت تبصلي. كانت الدموع مالية عينيها، لكن المرة دي كان باين عليها الغضب أكتر من الحزن. وقالت بصوت واطي:
ـ ربنا بينا.

لكن رغم إنها قالتها بهدوء، كان واضح إن اللي جواها أكبر بكتير من الكلام اللي خرج منها.

أما أنا ففضلت قاعدة مكاني، مقتنعة إني لقنتها درس عمرها ما هتنساه، ومستنية ابني يرجع عشان تشوف بنفسها إنه هيقف في صفي زي كل مرة. إيمان ما ردتش عليا، خدت شنطتها ودخلت أوضتها وقفلت الباب وراها.

أما أنا فقعدت مكاني، كل شوية أبص للشاشة الجديدة وأقول لنفسي:
ـ أهو على الأقل الفلوس راحت في حاجة ليها لازمة.

عدى كام ساعة والبيت ساكت بشكل غريب، لحد ما سمعنا صوت مفتاح الشقة. ابني رجع من الشغل.

أول ما دخل حس إن فيه حاجة مش طبيعية. إيمان خرجت من الأوضة وعينيها باينة إنها كانت بتعيط، وأنا قاعدة قدام التلفزيون الجديد بمنتهى البرود. بصلها وقال:
ـ مالك؟

إيمان ردت:
ـ اسأل والدتك.

بصلي باستغراب:
ـ فيه إيه يا أمي؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى