روايات وقصص

حاميها حارميها ل نرمين عادل

فتحت باب الشقة بهدوء تام. لقيت أمي، الحاجة نعمات، قاعدة في الصالون زي الباشا، لابسة عبايتها الغالية، وحاطة رجل على رجل، وبتشرب كوباية الشاي بلبن بتاعتها بمزاج ولا كأن في أي حاجة حصلت.
أول ما شافتني دخلت، رفعت حاجبها وبصتلي من فوق لتحت، وقالت بنبرة حادة وواثقة بتحاول ترجع بيها سيطرتها اللي اتهزت امبارح.

أهلا يا سي محمود.. أهلا بالابن البار المحترم اللي طرد أمه في أنصاص الليالي عشان خاطر حتة عيلة بتاعة دراما ومحن. إيه، جيت وراجعت لعقلك؟ عرفت إن مالكش غير حضن أمك اللي ربتك وشقيت عليك، وإن المرة بتتعوض لكن الأم ماتتعوضش؟

مردتش عليها بنص كلمة. مشيت بخطوات ثابتة ناحية أوضة نومي، فتحت درج الكومودينو وبصيت، وفعلا.. المفتاح مش موجود. لفيت وخرجت لها تاني، وبصتلها في عينيها، وقلت بصوت هادي جدا، هدوء مرعب زي الهدوء اللي بيسبق حبل المشنقة.
فين مفتاح الخزنة يا أمي؟ وفين طقم الألماظ وسبايك الدهب بتاعة سلمى؟

ملامح نعمات اتهزت لثانية واحدة، عنيها زاغت، بس بسرعة جدا لبست قناع الجبروت والتبلي اللي متعودة عليه، وقالت بسخرية وصوت عالي أهو.. بدأنا في شغل الحوارات وتهمات السنيورة مراتك اشتغلت! أنا أسرق يا محمود؟ أنا الحاجة نعمات اللي الناس كلها بتحلف باسمها وبأخلاقها في العيلة وفي المنطقة بحالها؟

البت دي كدابة ومخرفة، دي تلاقيها كانت مأثرة عليها أدوية الهلوسة والمسكنات اللي بتاخدها، وقامت تتبلى عليا وتخترع الحوار ده عشان تخرب العلاقة بيني وبينك وتطردني من حياتك!
طلعت موبايلي من جيبي ببرود، وفجرت القنبلة الموقوتة في وشها.

قلتلها بابتسامة نصر مليانة مرارة ووجع، كنت عارف ومتأكد إنك هتقولي الكلمتين دول، وإنك هتطلعيها كدابة ومجنونة.. وعشان كده أنا مكنتش محتاج أسمع كلام سلمى وبس. أنا كلمت الشركة بتاعة كاميرات المراقبة السرية اللي أنا جبتهم وركبتهم في الصالون وفي الطرقة اللي بتودي على أوضة النوم من شهرين عشان أطمن على البيبي وأنا في الشغل.
والتسجيل بتاع يوم التلات اللي فات معايا هنا لايف يا أمي، تحبي نتفرج سوا؟

دست على الشاشة وشغلت الفيديو. ظهرت الحاجة نعمات بوضوح وهي بتتسحب وتدخل الأوضة، بتفتح الخزنة، وبترص الدهب والألماظ في شنطتها الكبيرة. وصوتها وهي بتهدد سلمى وبتطعن في شرفها وفي أهلها كان واضح ونقي لدرجة بتخرق الودن وبتوجع القلب.

كوباية الشاي وقعت من إيد الحاجة نعمات واتدشْدشت على رخام الأرضية. وشها بهت وبقى أصفر زي الليمونة، ورجعت لورا بخطوات تقيلة وهي بتنهج وتتأتأ في الكلام من كتر الرعب.
محمود.. يا ابني.. افهمني.. أنا كنت بشيلهم ليكم وبحافظ عليهم! كنت خايفة البت دي تضيعهم في التفاهات أو أهلها الجعانين دول يطمعوا فيهم وياخدوهم! أنا أمك يا محمود.. إنت هتعمل فيا إيه؟ هتحبس أمك؟

رديت عليها بقوة وجمود عمري ما عرفته في حياتي كلها.. إنتي مش أمي يا نعمات هانم.. الأم هي اللي تحن وتطبطب، الأم هي اللي تصون العرض وتحافظ على الأمانة، الأم هي اللي لما تشوف طفل صغير بيصرخ من الجوع ومرات ابنها ميتة من التعب على الكنبة، تشيلهم في عينيها وفي قلبها، مش تقعد تضرب في المحشي بكل برود وتقول عليها بتاعة دراما!

إنتي وحش نرجسي مريض، عيشتينا تلاتين سنة في كدبة كبيرة اسمها الكبرياء والالتزام والأصول، والحقيقة المرة إنك مبتحبيش في الدنيا دي كلها غير نفسك والسيطرة وبس.

وفجأة، جرس الباب رن.
فتحت الباب، ودخل هشام المحامي بتاعي، ووراه اتنين أمناء شرطة ببدلهم الميري. ملامح أمي اتسحبت، ووشها اللي كان مليان كبرياء من ثواني بقى عامل زي حتة القماشة البهتانة.

وقفت قدامها، وببرود قاتل وثبات عمري ما حسيته قبل كده قلت لها، الدهب والسبايك لو مرجعوش في خلال ساعة واحدة بالدقيقة يا نعمات هانم، البلاغ اللي هشام بيه مجهزه ده هيتحرك للنيابة فورا بتهمة السرقة، وخيانة الأمانة، والابتزاز، والطعن في شرف مراتي.

ومش بس كده، التوكيل العام اللي كنت عاملهولك عشان تديري شقة أبويا الله يرحمه، أنا لغيته النهاردة الصبح في الشهر العقاري. كل حاجة انتهت، وكل الصلاحيات اللي اديتهالك اتسحبت.

نعمات بدأت تصرخ، وتخبط على صدرها وتلطم على وشها بانهيار وتمثيل، يا لهوي! بتسجن أمك يا محمود؟ بتبهدلني وتجيبلي البوليس وتبيع شقى عمري عشان خاطر حتة بت غريبة؟

رديت عليها وصوتي قاطع زي السيف، الغريبة دي صانتني، وصانت بيتي واسمي وعرضي في غيابي، واستحملت اللي محدش يستحمله. إنما إنتي اللي من دمي، جيتي تخربي بيتي بدم بارد وتدوسي على لحمك. خدي حاجتك واطلعي برة حياتنا.. المرة دي بلا رجعة، ومش عايز أشوف وشك تاني.

تحت ضغط وجود الشرطة، والمحضر اللي كان جاهز يتمضي، وكاميرات المراقبة اللي فضحت كل حاجة، اضطرت نعمات إنها تتنازل عن كبريائها المزيف. إيديها كانت بتترعش وهي بتطلع الدهب والسبايك اللي كانت مخبياهم، ورجعت كل مليم وكل قطعة خدتها.

الفضيحة مابقتش مقتصرة على الأوضة دي، العيلة كلها عرفت حقيقتها، وعرفوا إن الست اللي كانت بتدعي المثالية والأصول طلعت بتسرق بيت ابنها. خرجت من الشقة مطرودة، وحيدة، ومكسورة، وكبريائها الكداب اتداس على الأرض للأبد.

بعد مرور شهرين بالتمام على الليلة الكابوس دي..
شقتنا في التجمع الخامس رجع ليها النور والدفا من تاني. ريحة الشياط والخنقة راحت، وحلة اللبن بقت تفور بالحب والأمان، والغسيل بقى متطبق ومترتب بنظام يخلي الأوضة تفحفح بريحة الفانيليا والورد.
سلمى صحتها ردت وبقت زي الفل، الوش البهتان رجعله لونه الوردي الجميل وضحكتها نورت البيت، وطارق ابننا كبر شوية وبقى يقعد في سريره يضحك ويناغي ويمسك لعبه بصفاء ونقاء.

كنت واقف في المطبخ بالليل، بجهزلها كوباية سحلب سخنة بالمكسرات عشان تدفيها، حسيت بيها بتقرب مني، لفت إيديها وحضنتني من ضهري وسندت راسها على كتفي بحنية بتهون أي تعب.

قالتلي بابتسامة مليانة دموع فرحة، عارف يا محمود؟ الليلة اللي أخدتنا فيها من الشقة ونزلت بينا على اللوكاندة.. دي الليلة اللي حسيت فيها بجد إن ليا ضهر وسند مابينكسرس في الدنيا دي.. ربنا يخليك لينا وميحرمناش منك أبدا.

لفيت وبست راسها بحنية الدنيا كلها، أنا اللي المفروض أشكرك.. أشكرك لأنك أصيلة واستحملتي كتير لحد ما النور شق الضلمة اللي كانت على عيني وشفت الحقيقة واضحة. بيتنا ده خلاص اتقفل علينا، ومبقاش فيه أي مكان للوحوش.. مفيش فيه غير مكان ليكي ولابننا وللحب اللي بينا وبس.

في النهاية، محمود اتعلم درس عمره. اتعلم إن بر الوالدين عمره ما كان معناه الطاعة العمياء في الظلم والافترا. وإن الست اللي بتسيب بيت أهلها وحياتها عشان تيجي تبني معاك بيت جديد وتأمنك على نفسها، تستحق إنك تهد الدنيا كلها وتبنيها من تاني عشان تحمي كرامتها ودموعها ونفسها الغالية.

سيبنا نعمات تشبع بكسرتها ووحدتها في قصرها الفاضي اللي مابيدخلوش حد، وعشنا إحنا فوق السحاب، مرتاحين البال، متحصنين بالصدق والرحمة والنور اللي عمره ما بينطفي أبدا.

تمت
الكاتبة نرمين عادل همام
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”

3 من 3التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى