روايات وقصص

حاميها حارميها ل نرمين عادل

لفيت وشي وبصيت لها، بهدوء مرعب، هدوء يخوفني أنا شخصيا من نفسي، لأ يا أمي.. ده بيتي أنا، اللي دافع فيه دم قلبي.. ودي مراتي.. وده ابني.. اتفضلي إنتي بره الشقة دي حالا، وياريت متدخليش هنا تاني.
ابتسامتها السمجة اتهزت، ووشها جاب ألوان، وملامحها اتغيرت للصدمة.

شلت سلمى بين إيديا، والواد كان مربوط على صدري في الشيالة، دخلت الأوضة رميت شوية هدوم في شنطة صغيرة بسرعة، وأمي ماشية ورايا في الطرقة لحد باب الشقة، بتزعق وتخبط على صدرها وتتكلم عن الأصول، والعقوق، وغضب الرب، وقلة رباية الجيل ده اللي بيفضل مراته على أمه.

مردتش عليها بنص كلمة. متكلمتش لأن الكلام مابقاش ليه أي لازمة.
خرجت من باب الشقة، وبصيت ورايا بصة واحدة بس.
كانت واقفة على الباب، مذهولة.. الست اللي عاشت عمرها كله فاكرة إنها بتملك البيت، وبتملكني، وبتملك أرواحنا معاها.
ولأول مرة في حياتها كلها.. كان باين في عينيها الخوف الحقيقي والشك.

قفلت الباب، ونزلت بيهم على المستشفى نطمن على سلمى ونعلقلها محاليل، ومنها على أقرب لوكاندة.. عشان نبدأ من جديد، بعيد عن أي وحش.

واجهة اللوكاندة القديمة في وسط البلد كانت بهتانة، حيطانها متقشرة واليافطة بتاعتها نورها أصفر كئيب بيطفي وينور تحت كشافات الشارع، بس بالنسبة لي في اللحظة دي، اللوكاندة دي كانت زي طوق النجاة اللي ظهرلي فجأة في وسط بحر هايج وأنا بأغرق فيه.

سندت سلمى اللي كانت شبه فاقدة الوعي ووشها في الأرض، وطارق ابني الصغير راسه نايمة على صدري جوة الشيالة، ونفسه بدأ يهدى وينتظم واحدة واحدة بعد ساعات من الصريخ المتواصل اللي كان هيشرخ حنجرته الصغيرة.

دخلنا الأوضة البسيطة، ريحتها كانت قديمة بس نضيفة. حطيت سلمى على السرير براحة خالص كأني شايل حتة إزاز خايف تتكسر، وغطيتها بالبطانية كويس. وبعدين طلعت الببرونة، غسلتها وعقمتها بشوية ماية سخنة جبتهم من الكاتل اللي في الأوضة، وعملت لطارق رضعة دافية لحد ما نام في هدوء.

محمود.. الراجل اللي عاش عمره كله مقتنع إن بر الأم معناه إنه يغمض عينيه عن قسوتها وجبروتها.. قعد على الأرض جنب السرير، حط راسه بين إيديه، وانهار. فضلت أعيط في صمت، عياط مكتوم يقطع القلب، لأول مرة أعيط بالشكل ده من وأنا عيل صغير.

فجأة سمعت صوت سلمى بيترعش زي خيط ضعيف هينقطع. محمود.. إحنا فين؟

قمت بسرعة من على الأرض، مسكت إيديها التلج دي وبستها من جوة قلبي. إحنا في أمان يا قلب محمود. إحنا في مكان مفيهوش وحوش، مفيهوش حد هيستقوى عليكي ويجبرك تقفي على رجلك تطبخي وتكنسي وإنتي بتنزفي من تعب الولادة.

حقك عليا.. سامحيني.. أنا اللي استأمنتها عليكي وسبتك ليها وأنا فاكر إنها أم هتحن عليكي زي بنتها.
دموع سلمى نزلت زي السيل على المخدة، ومكنتش مجرد دموع من تعب جسمها ولا وجع الولادة، دي كانت دموع قهر مدفون، قهر انفجر وخرج كله مرة واحدة.

قالتلي وصوتها بيقطع، مامتك مكنتش بس بتستعبدني وتخليني أطبخ وأنضف الشقة وأنا مش قادرة أصلب طولي يا محمود.. مامتك عملت حاجات تانية أبشع وأوسخ من كده بكتير.
جسمي كله اتخشب مكاني، وحسيت برعب جديد بيسري في دمي.

حاجات إيه يا سلمى؟ قوليلي متخافيش، الست دي خلاص مابقاش ليها أي سلطة علينا تاني، ولا هتقدر تقربلك طول ما أنا فيا نفس.

سلمى خدت نفس بصعوبة، وشهقت وهي بتعيط، الأسبوع اللي فات.. لما إنت كنت في المأمورية بتاعت الشغل في بورسعيد. مامتك جات الشقة بحجة إنها هتقعد معايا تساعدني في شيل البيبي عشان أرتاح.

دخلت أوضة نومنا، ولما لقتني رايحة في النوم من التعب والمهدئات اللي الدكتور كتبهالي عشان وجع الخياطة، فتحت الخزنة الصغيرة اللي مدارية ورا الدولاب.. الخزنة اللي إنت نسيت مفتاحها في درج الكومودينو.
سكتت ثانية تاخد نفسها، وكملت كلامها اللي كان بينزل على قلبي زي الرصاص.

أنا صحيت على صوت تكة قفل الخزنة. فتحت عيني نص فتحة، وشفتها بعيني وهي بتلم طقم الألماظ اللي بابا الله يرحمه جابهولي في شبكتي، وبتسحب سبايك الدهب الصغيرة اللي كنا محوشينها وشايلينها عشان نسدد بيها باقي مصاريف المستشفى والولادة.

ولما قمت مفزوعة وأنا مرعوبة وبقولها إنتي بتعملي إيه يا حماتي.. بصتلي بمنتهى الجحود والبجاحة وقالتلي، الدهب ده هيتشال في حتة أمان، لأن واحدة زيك جاية من منطقة شعبية وعيلة جعانة متؤتمنش على قرش أحمر من شقى ابني، ومسيرك تسرقيه وتديه لأهلك.

التمثال اللي بنيته لأمي جوايا على مدار أربعة وتلاثين سنة اتهد واتكسر حتت في اللحظة دي. الشريط كله مر قدام عيني، افتكرت كل كلمة رمتهالي في النص عشان تزرع الشك في قلبي ناحية سلمى وعيلتها.

افتكرت إزاي كانت دايما تزن على ودني إن سلمى مبذرة وإيديها مخرومة وماتعرفش تدير قرش، وإن عيلتها طمعانين فيا. أتاريها كانت بتخطط وتدبر من زمان عشان تجرد مراتي من كل حتة صيغة تملكها، وتستغل ضعفها وقلة حيلتها بعد الولادة.

وكانت ساندة وواثقة في ولائي الأعمى ليها، وثقتي اللي مكنتش بتتهز فيها أبدا.

قمت وقفت بطولي كله، وعينيا كانت بتطلع نار من الغضب الصافي اللي مفيش فيه ذرة رحمة. الدهب والسبايك دول تمنهم يعدي التمنمية ألف جنيه يا سلمى.. دي مش مجرد سرقة عادية، دي واقعة خيانة أمانة ونهب، دي استغلت حالتك الصحية وإنتي بين الحياة والموت عشان تسرقك وتبتزك.

تاني يوم الصبح، على الساعة تسعة بالظبط، كنت سايب سلمى وطارق في اللوكاندة تحت رعاية ممرضة خاصة محترفة أجرتها من مستشفى قريبة عشان تاخد بالها منهم وتحميهم، وأخدت عربيتي وطلعت طيران على شقتي في التجمع.
الكاتبة نرمين عادل همام

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى