
بدأ ياسين يلف حول نفسه زي المجنون، الحفلة اللي كانت مليانة أضواء وضجيج اتحولت في عينه لسرادق عزا. نيفين شافت لونه اللي خطف وسألته بخوف:
“في إيه يا ياسين؟ وشك ماله؟”
ياسين زق إيدها بعنف وهو بيصرخ بصوت واطي: “انخمدي خالص! المخازن اتكشفت، والبنك جمد الرصيد.. حد غرز السكينة في ضهري ولفها بتمكن!”
المواجهة الأولى
بعد يومين، ياسين اضطر يروح يزور رشا في السجن، مش حب فيها، لكن عشان يتفاوض على حياته. وقف ورا السلك، وشاف رشا وهي داخلة عليه.. مش ماشية بكسرة، كانت ماشية بخطوات ثابتة، ووشها خالي من أي تعبير.
ياسين بصوت مخنوق من الغيظ: “انتي اللي عملتي كده يا رشا؟ انتي اللي بعتي المستندات للضرائب؟”
رشا رفعت حاجبها ببرود: “أهلا يا جوزي العزيز.. مبروك على الجوازة، ومبروك على البدلة الغالية اللي لابسها.. الحق اتمتع بيها، عشان قريباً هتلبس زيي.”
ياسين خبط على السلك: “هتدمريني وتدمري نفسك؟ الفلوس دي كانت مستقبلك ومستقبلي! لو الأرصدة طارت مش هتعرفي تطلعي!”
رشا قربت من السلك وهمست: “أنا أصلاً ضعت يا ياسين.. اللي زيك قتلوا فيا الست اللي كانت بتخاف من خيالها. أنا هنا عشان أدفع تمن هبلي، وأنت هتيجي هنا عشان تدفع تمن غدرك. والهانم؟ نيفين اللي كنت خايف عليها؟ أنا هخليها تتمنى الموت وما تلاقيهوش!”
انهيار “مملكة” نيفين
خرج ياسين من السجن وهو بيترنح، رجع البيت لقى “نيفين” قاعدة بتعيط ومنهارة لأن البوليس صادر العربية “المرسيدس” اللي كانت بتتمختر بيها.
نيفين بصرخ: “يعني إيه؟ يعني إيه أركب تاكسي؟ إتصرف يا ياسين!”
ياسين بصلها بحقارة، ولأول مرة يشوفها على حقيقتها.. مجرد ست سطحية كانت سبب في ضياع كل اللي بناه. نطق بمرارة:
“انتي السبب.. لو مكنتيش خدتي العربية وعملتي الحادثة، كان زمانا في حالنا.. رشا كانت السند، وانتي كنتي الخراب.”
نيفين ردت عليه: “دلوقتي بقت رشا السند؟ مش أنت اللي كنت بتقول عليها كبش فداء؟ أنت اللي غدرت بيها عشان شهوتك، ودلوقتي بتلبسني أنا الغلط؟”
بدأ الخناق بينهم يوصل للضرب، البيت اللي كان مفروش بفلوس رشا اتحول لساحة معركة. وفي وسط الخناقة، الباب خبط بقوة.. كانت قوة من تنفيذ الأحكام ومعاهم أمر ضبط وإحضار لنيفين في قضية الحادثة، وأمر لياسين بتهمة التزوير وتقديم بلاغ كاذب.
النهاية
بعد سنة.. رشا واقفه قدام مراية الزنزانة، بتسوي هدومها. النهاردة يوم خروجها بعد ما القضية اتعاد فيها الحكم وخدت براءة في الحادثة، وقضت مدة قصيرة.
وهي خارجة من باب السجن، شافت “بوكس” الترحيلات داخل.. وفي وسط المساجين، شافت نيفين.. وشها باهت، شعرها منكوش، ولابسة البدلة البيضا. نيفين شافت رشا، ووقفت مكانها بصدمة.
رشا كانت بتراقب نيفين وهي بتتسحل لجوه السجن، ولأول مرة تحس ببرودة “النصر”.
هبة سألتها وهي بتسوق: “هنروح فين يا رشا؟ تحبي تروحي تقعدي عندي؟”
رشا بصت للطريق قدامها وقالت بهدوء: “لأ يا هبة.. وديني شقتي.”
هبة اتصدمت: “شقتك؟ بس دي مابقتش شقتك، ياسين رما كل حاجتك والبيت بقى ملك لنيفين!”
رشا طلعت من شنطتها ورقة قديمة مطوية: “العقد ده مسجل في الشهر العقاري بمنع التصرف.. يعني أي بيع عمله هو باطل قانوناً. أنا مش بس هسترد شقتي، أنا هسترد مملكتي.”
وصلت رشا البيت، فتحت الشقة.. دخلت وقالت للعمال بجمود: “كل حاجة تخص الست اللي كانت هنا، أو تخص ياسين.. تترمي في المنور. مش عايزة قشاية واحدة تفكرني بيهم.”
في اللحظة دي، تليفون رشا رن.. كان رقم المحامي بتاع ياسين، صوته كان ذليل:
“أستاذة رشا.. ياسين بيه بيموت في الحجز، وعايز يشوفك.. بيقولك هو مستعد يرجعلك كل حاجه، بس تطلعي نيفين من قضية الحادثة عشان الجنين اللي في بطنها.”
رشا ضحكت بمرارة وقالت للمحامي: “قول لياسين إن العدل مبيجزأش.. الجنين اللي هيتولد في السجن ده ذنبه في رقبة أبوه.. قول له رشا ماتت في السجن، واللي بره دي حسابك القديم اللي جه يصفيه.”
مر شهر..
ياسين اتحكم عليه بـ 7 سنوات بتهم التزوير والرشوة وغسيل الأموال.
نيفين لبست حكم 3 سنوات في قضية الحادثة.
رشا كانت قاعدة في بلكونة شقتها، الشقة اللي رجعت نضيفة. هبة دخلت عليها ومعاها قهوة: “رشا.. المحامي بيقول إن ياسين بعت يطلب خلع عشان يطلق نيفين ويحاول يرجعلك.”
رشا شربت بؤ قهوة وبصت للسما: “ياسين ده زي العملة المزيفة يا هبة.. لا نيفين نفعته ولا أنا هنفعه. أنا النهاردة بدأت إجراءات بيع الشقة دي.. مش عايزة أي حاجة تربطني بماضي كله قهر.”
هبة: “وهتعملي إيه بالفلوس؟”
رشا قامت ووقفت قدام المراية، شافت الست القوية اللي الزمن نحتها: “هفتح مشروع لمساعدة الستات اللي دخلوا السجن بسبب طيبتهم أو فقرهم، عشان مفيش واحدة تانية تكون كبش فداء لحد مايسواش.”
رشا سابت البيت وقفلت الباب وراها للمرة الأخيرة، مشيت في الشارع وهي رافعة راسها، شايلة حريتها وكرامتها بنفسها.. وده كان أغلى من أي ألماظ.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




