منوعات

أنا وحماتى ٢

أمانى سيد

تاني يوم الصبح، صحيت على صوت خبط جامد على باب شقتي، ولما فتحت لقيت جارتنا أم محمد واقفة قدامي ووشها متغير، وقالتلي من غير مقدمات:

ـ إنتِ يا بنتي عملتي إيه في حماتك؟!

بصيت لها باستغراب وقلت:
ـ عملتلها إيه بس يا أم محمد؟ هو أنا لحقت أعمل حاجة؟!

قالتلي وهي بتبص حواليها:
ـ مش عايزة أظلمك، بس حماتك امبارح كانت عندي وبتحكيلي إنك من يوم ما دخلتي العيلة وإنتِ مش طايقة بنتها، وإنك بتغيري منها، وإنك السبب في انفصالها مرتين، وإنك دلوقتي بتحاولي تخوفي الناس بالحركات اللي بتعمليها على السلم عشان محدش يصدق كلامها عنك.

وقتها ضحكت من قلبي، مش عشان الكلام مضحك، لكن عشان اكتشفت إن حماتي مصممة تكمل في نفس الطريق مهما حصل.

قلت لها:
ـ طيب يا أم محمد، أنا هسألك سؤال واحد، وإنتِ جاوبيني عليه بصراحة. لو أنا فعلًا بعمل حاجات لسماح زي ما حماتي بتقول، إيه اللي يخليني أعمل الحركات دي قدام شقتي أنا؟! مش المفروض أخاف على نفسي بدل ما أفضل كل يوم أزعق وأشتكي؟!

بصت لي وسكتت، فاستغليت سكوتها وكملت:

ـ وبعدين يا أم محمد، هو أنا اللي تسببت في انفصال سماح عن جوزها الأول؟ ولا أنا اللي تسببت في انفصالها عن التاني؟ ولا أنا اللي اشترطت عليها إنها تسيب ولادها عشان تتجوز وتسافر؟! أنا كل ذنبي إني قلت إني مش قادرة أربي تلات عيال فوق مسؤولية ولادي، وده لا عيب ولا غلط. أنا ست بشتغل، وعندي طفلين، والتوأم لسه بيرضعوا، يعني أنا مش برفض أساعدها في حاجة بسيطة، أنا برفض أشيل مسؤولية عمر كامل.

أم محمد فضلت باصة لي، وبعدها قالت:
ـ والله يا بنتي كلامك صح، بس حماتك بتتكلم عنك بطريقة تخلي الواحد يشك في نفسه.

رديت عليها:
ـ ما هو ده اللي هي عايزاه، إنها تفضل تشوه صورتي لحد ما الناس كلها تصدق إني وحشة، وساعتها لو اتكلمت محدش هيصدقني.

خرجت أم محمد من عندي، وأنا كنت عارفة إنها هتنقل الكلام لغيرها، لكن المرة دي مكنتش خايفة؛ لأني بدأت ألاحظ إن الناس اللي كانت بتصدق حماتي من غير ما تفكر، بقت تسأل وتناقش وتشك في الحكاية كلها.

وفي نفس اليوم، نزلت على السلم وعملت نفس الحركة، دلقت شوية ميه قدام باب شقتي، وبعدها عليت صوتي وقلت:

ـ يا ناس، هو مفيش حد عنده إحساس؟! كل يوم ألاقي ميه قدام بابي! هو أنا عملت إيه لكل ده؟!

طلعت جارتنا أم مينا من شقتها، وقالتلي:
ـ يا بنتي، ما يمكن إنتِ اللي بتدلقي الميه بنفسك!

بصيت لها وقلت:
ـ وليه أعمل كده؟! أنا ناقصة وجع دماغ؟!

قالتلي:
ـ أصل فيه كلام كتير بيتقال، والناس بقت مش فاهمة مين الظالم ومين المظلوم.

وقبل ما أرد عليها، لقيت حماتي نازلة من الدور اللي فوقينا، ووقفت أول ما سمعت كلامنا.

قالتلي بسخرية:
ـ أيوه بقى، كملي تمثيل! يمكن الناس تصدق إن حد بيعملك حاجات غريبة زي ما إنتِ عايزة تفهميهم!

بصيت لها وقلت:
ـ يا ماما، هو أنا جبت سيرة الحاجات دي؟ أنا بشتكي من الميه اللي قدام بابي، حضرتك اللي ربطتي كل حاجة بالموضوع ده.

الجارة بصت لحماتي، وبعدها بصت لي، وقالت:
ـ هي فعلًا يا أم فلان، إنتِ ليه كل ما تحصل حاجة تربطيها بالموضوع ده؟ ما يمكن الموضوع ملوش علاقة بالكلام ده كله.

حماتي اتعصبت وقالت:
ـ إنتوا كلكم بقيتوا تدافعوا عنها ليه؟! ما هي عملت لكم إيه؟!

ردت عليها أم مينا:
ـ محدش بيدافع عن حد، بس إحنا بقينا نسمع كلام كتير، وكل شوية رواية جديدة. مرة بتقولي إنها بتعمل حاجات لبنتك، ومرة بتقولي إنها السبب في انفصالها، ومرة بتقولي إنها بتعطل جوازتها الجديدة. طب هي عملت إيه لكل ده؟!

حماتي سكتت للحظة، وفضلت تبصلها بغضب، وبعدها بصت لي وقالت:
ـ إنتِ اللي وصلتي الناس لكده، بس أنا هوريكي!

وسابتنا ونزلت، وأنا دخلت شقتي وأنا حاسة إن خطتي بدأت تجيب نتيجة، لكن كنت عارفة إن حماتي مش من النوع اللي يستسلم بسهولة.

وبالفعل، بالليل رجع جوزي من الشغل، وأول ما دخل الشقة لقيته متعصب، ورمى مفاتيحه على الترابيزة وقاللي:

ـ إنتِ ناوية تفضلي لحد إمتى في المهزلة دي؟!

بصيت له باستغراب وقلت:
ـ مهزلة إيه؟!

قال بعصبية:
ـ أمي اتصلت بيا وعيطت، وقالتلي إنك بتسببي لها مشاكل قدام الجيران، وإنك بتعملي حركات على السلم عشان الناس تفتكر إنها بتتهمك بحاجات مش حقيقية!

ضحكت من الصدمة وقلت:
ـ هي قالتلك كده؟! طب إنت سألت نفسك أنا ليه ممكن أعمل كده؟!

رد بضيق:
ـ أنا مش عايز أدخل في مشاكلكم، أنا كل اللي عايزه إنك تبطلي الحركات دي وتسيبي أمي في حالها.

وقتها حسيت إن الغضب بيزيد جوايا، وقلت له:

ـ أسيب أمك في حالها؟! هي سابتني في حالي لما اتهمتني باتهامات مش صحيحة؟! سابتني في حالي لما خلت الناس توقفني في الشارع وتبصلي كأني عملت حاجة غلط؟! إنت كنت فين وقتها؟! وليه لما هي اتكلمت عني سكت، ولما أنا بدأت أشتكي من اللي بيحصل لي بقيت أنا الغلطانة؟!

اتنهد وقال:
ـ يا ستي خلاص، أنا هتكلم معاها، بس إنتِ بطلي اللي بتعمليه ده.

بصيت له وقلت:
ـ وأنا هبطل لما هي تعتذرلي قدام نفس الناس اللي شوهت صورتي قدامهم، وتقول لهم إنها اتهمتني ظلم. غير كده، أنا مش هفضل طول عمري ساكتة عشان حضرتك مش عايز مشاكل.

سابني ودخل الأوضة، وأنا فضلت قاعدة مكاني بفكر. كنت عارفة إن جوزي مش هيقف في صفي بسهولة، وإنه طول ما الموضوع مش بيأثر عليه شخصيًا، هيفضل عامل نفسه مش شايف.

لكن تاني يوم حصلت حاجة مكنتش في حساباتي.

كنت راجعة من الشغل، ولقيت سماح أخت جوزي واقفة قدام العمارة، وأول ما شافتني جت ناحيتي وقالتلي بصوت عالي:

ـ إنتِ مبسوطة كده؟! إنتِ خربتي حياتي مرتين، ودلوقتي عايزة تعطلّي جوازتي التالتة؟!

وقفت وبصيت لها، وقلت:
ـ أنا خربت حياتك إزاي يا سماح؟! أنا حتى مكنتش موجودة في حياتك وقت انفصالك الأول!

ردت بعصبية:
ـ أمي قالتلي كل حاجة! إنتِ اللي بتتسببي لي في المشاكل، وإنتِ اللي مش عايزاني أتجوز وأسافر، عشان تفضلي تتحكمي فيا وتخليني مسؤولة عن كل حاجة!

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى