
طب افرض الدكتورة ما وافقتش المرة دي؟ إنت عارف دكتورة ميرفت اللي بتتابعها بدأت ترخم وتسأل كتير عن الدوا وعن سبب تدهور حالتها.. إنت مش قولتلي إنك بتخفف الجرعة؟ هشام ضحك ضحكة مكتومة، ضحكة خبيثة شلت أطرافي من الرعب: بخفف مين يا هبلة؟! أنا بحط لها المنوم والمهدئ في عصير البرتقال كل يوم عشان تفضل مسطولة وتفضل الدوخة ملازماها! لو فاقت، كل اللي بنيناه في التلات سنين دول هيروح في ثانية.. وبعدين دكتورة ميرفت دي في جيبي، قرشين حلوين بيخرسوا أي لسان، بس إحنا نخلص من مصيبة النهاردة.. قومي هاتي إزازة الكحول من الحمام ورشي على وشها شوية، خلينا نفوقها قبل ما حد من الشغالين يطلع يشوف المنظر ده.
في اللحظة دي، حسيت الدم بيهرب من عروقي. العصير اللي كان بيعملهولي كل يوم بإيده الصبح، ويقولي بحنية قدام الدادة اشربي يا حبيبتي عشان تتغذي والدوخة تروح.. كان بيسمّني بيه بالبطيء! كان بيموت خلايا مخي ويدمر أعصابي عشان أفضل عامية، عشان مقومش، عشان أفضل البنت الهبلة المكسورة اللي بتلم وراهم الزبالة!
سمعت خطوات دينا داخلة الحمام، وهنا أدركت إني لو فضلت نايمة وفتحت عيني فجأة لما ترش الكحول، هيحسوا بتغير في نظرتي.. نظرة الست اللي فاقت مش هتكون أبداً زي نظرة الست التايهة اللي مش عارفة هي فين. استجمعت كل ذرة قوة في روحي، وبدأت أتحرك ببطء شديد، وأطلع صوت أنين واهي، كأني بصحى من كابوس تقيل. غمضت عيني نص غمضة، وحركت رأسي يمين وشمال كأني بتألم من الخبطة. هشام رما السجارة بسرعة في الطفاية وقرب من الكنبة، حط إيده على كتفي وهزني: ياسمين؟ ياسمين.. إنت سامعاني؟ فتحي عينك يا بت! فتحت عيني براحة خالص، وخليت نظرتي مشوشة، باصة في السقف في الفراغ، ومفيهاش أي تركيز. بصيت له ورجعت رمشت كذا مرة، وقولت بصوت بيترعش وضعيف جداً: أ.. أنا فين؟ دماغي.. دماغي وجعاني أوي.. هو إيه اللي حصل؟
دينا خرجت من الحمام ماسكة إزازة الكحول، وبصت لهشام بترقب وخوف. هشام بصلها بإشارة من عينه إنها تقف مكانها وماتنطقش، وقعد على ركبه قدام الكنبة، ورسم على وشه فوراً قناع الزوج الطيب الحنين اللي بيخاف على نملة تدوس على مراته! مسك إيدي، واللمسة دي كانت كفيلة تخليني أرجع من كتر الاشمئزاز، بس ضغطت على ضوافري في كفي التاني ومبينتش أي حاجة. ألف سلامة عليكي يا روحي.. وقعتي وإنت بتلمي الكوباية وخبطتي راسك في الرخام. خوفتيني عليكي يا ياسمين! قولتلك ميت مرة متتعبيش نفسك في شغل البيت، إحنا عندنا خدم، بس إنت اللي بتصممي تتحركي.
الكلام نزل عليا زي السم، هو اللي كان لسه زاققني وشاتمني وقايلي يا فاشلة! ودلوقتي بيتكلم وكأنه ملاك نزل من السما!
بصيت لدينا اللي كانت واقفة بعيد، وابتسمت ابتسامة باهتة وقولت بتوهان مقصود: دينا.. إنت هنا من بدري؟ هو.. هو بابا فين؟ هي ماما مروحتش لسه؟ دينا وهشام بصوا لبعض بنظرة ارتياح وسخرية في نفس الوقت! النظرة دي قالتلي كل حاجة.. هما اطمنوا تماماً، وافتكروا إن الخبطة دي رجعتني أسوأ من الأول، وخلتني أخلط بين الحاضر والماضي أكثر وأكثر، لدرجة إني بسأل عن بابا اللي مات من سنين، وبسأل عن أمي الله يرحمها!
دينا ضحكت ضحكة صفرا وقربت مني، حطت إيدها الباردة على شعري وقالت بتمثيل يقرف: حبيبتي يا ياسمين، شكلك لسه دايخة خالص. بابا زمانه جاي، وماما كمان هتيجي.. المهم إنت قومي بس خدي الدوا بتاعك وادخلي أوضتك التانية عشان ترتاحي وتنامي، إحنا مش عايزينك تتعبي خالص يا روحي. أوضتك التانية.. الكلمة خبطت في قلبي زي الخنجر. الأوضة التانية دي كانت أوضة الخزين الصغيرة اللي تحت السلم، الأوضة اللي نقلوني فيها من سنة بحجة إن صوتي بالليل وأنا بهلوس بيقلق نوم هشام، بينما أوضة نومي الرئيسية، سريري وعفشي ودولابي وكل ذكرياتي، بقت أوضة دينا وهشام!
اتسندت على الكنبة وقومت ببطء شديد، وكنت بتمايل كأني مش قادرة أشيل نفسي.. مسكت رأسي بإيدي وقولت: حاضر.. أنا هدخل أنام.. بس.. بس هو جدي الحاج محمود مش هيجي النهاردة؟ كنت حاسة إني عايزة أشوفه.. ملامح هشام اتغيرت للحغظة، وعينيه لمعت بغضب مكتوم، لكنه كتمه بسرعة وقال بصوت ناعم زي الحية: جدك مسافر يا ياسمين، عنده شغل في الإسكندرية ومش هيرجع غير بعد أسبوعين.. قولتلك الكلام ده الصبح ونسيتيه تاني. متفكريش في حاجة بقى، وخليكي في سريرك. مسافر الإسكندرية؟! هنا ضرب جرس إنذار جوا عقلي.. جدي عنده عملية في القلب وممنوع من السفر نهائياً بأمر الدكاترة من ست شهور! جدي مستحيل يسافر إسكندرية! هشام بيكدب عليا ليه؟ وبيمنعني أشوف جدي ليه؟
هزيت رأسي زي البلهاء وقولت: أه.. صح، أنا نسيت.. معلش يا هشام، دماغي ثقيلة أوي. خرجت من الأوضة بخطوات بطيئة، ساندة على الحيطة كأني متعبة، ونزلت السلم الصغير اللي بيودي على أوضتي الضيقة اللي تحت. أول ما دخلت وقفلتي الباب الخشب ورايا، سندت ضهري عليه وانهارت قواي تماماً.. قعدت على الأرض، وكتمت بوقي بكفي الاتنين عشان صوت شهقاتي وصراخي ما يطلعش برة. كنت بتنفس بصعوبة كأن الأكسجين اتسحب من الأوضة كلها.
الصور كانت عمالة تنهال على دماغي ورا بعضها: صورتي وأنا في قاعة الاجتماعات الكبيرة في برج الجوهري، والمهندسين الكبار واقفين بيسمعوا ملاحظاتي على مشروع الساحل الشمالي.. صورتي وأنا بضحك في حضن بابا قبل ما يموت.. وصورتي لما شفت دينا أول مرة وهي داخلة بيتنا مع أمها، البنت الغلبانة المسكينة اللي كانت بتبص على لعبي وهدومي بحسرة، فقربتها مني وشاركتها في كل حاجة بملكها، لحد ما كبرت وشاركتني في جوزي وعمري وحياتي!




