
الواحد ساعات بيفضل السكوت على وجع الدماغ والمشاكل، خصوصاً لما بيكون الغايب ده أخ حنين مسافر وشقيان عشان يفرح العيلة كلها. أخويا أحمد، ربنا يديله الصحة، مسافر بقاله سنين طويلة في غربة صعبة، وكل ما يبعت شنطة مع حد نازل، كانت بتتبقى فرحة غامرة للبيت كله؛ لأمي وأبويا، ومراته شهيرة، وليا أنا وابني الصغير أحمد. الغربة صعبة، وأخويا كان دايماً يحب يعوض أهله عن بُعده بالهدايا والنفحات اللي بتدخل السرور على القلوب.
بس للأسف، كان فيه مشكلة متكررة مابتخلصش، ومصدرها شهيرة مراته. من يوم ما دخلت البيت، أول ما الشنطة توصل وتتفتح، كانت تمد إيديها بسرعة وبدون استئذان، تنقي العباية أو الجلابية الأجمل والأغلى وتقول بثقة: دي بتاعتي! جوزي بيقولي انتي نقي واختاري الأول، والباقي بعدك! حتى لو العباية مكتوب على كيسها اسمي أنا شخصياً، عادي جداً تاخدها، ولو حاجتي مش على مزاجها، المهم تاخد الحاجة اللي اسمي عليها عشان تفرض سيطرتها.
وأنا؟ كنت دايماً بسكت وأقول معلش، عشان أخويا ما يزعلش، وعشان استقرار البيت. أنا أصلاً كنت دايماً أكون في بيتي مع جوزي وابني، ولا بحضر فتح الشنط أصلاً، ولما أروح ألاقي العباية اللي فضلت بعد اختيارها اخدها وخلاص. ورغم إن أمي كل مرة كانت تفضل تقولي: بتاخد حاجتك بقصد، تعالي بدري يا عبيطه واشبطي في حاجتك، بس أنا ولا كان بيفرقلي، وكنت باخد الموضوع بروح رياضية بحتة وبقول الرزق بتاع ربنا والمظاهر دي ما بتفرقش.
لحد ما جه اليوم اللي فرق معايا بجد، وحصل الموقف اللي غير شكل التعامل كله. في يوم من الأيام، لقيت أخويا أحمد بيكلمني فجأة فيديو كول، وقعد يوريني صور أربع عبايات مختلفة، وقال لي بحب وابتسامة صافية: بقولك ايه يا سهام، نقي أحلى واحدة فيهم عشان هوديها هدية لحد وبثق في ذوقك جداً.
بصيت للصور واخترت عباية سوداء شيك جداً، وتفصيلتها تهبل وقيمتها عالية، وكنت فاكره بيشتريها لشهيرة مراته كالعادة. ضحكت وقلتله دي فخمة أوي يا أحمد، دي أحلى واحدة فيهم بجد، تسلم إيدك مقدماً للي هياخدها.
قفل معايا وهو مبسوط، وأنا قفلت التليفون ونسيت الموضوع خالص، واعتبرتها مكالمة عادية للاستشارة في الذوق.
بعديها بأسبوع تقريباً، كلمني وقالي روحي عند ماما النهارده يا سهام، هبعت شنطة مع واحد صاحبي، فيها العباية اللي اخترتيها، وفيه طقم تاني على ذوقي لأحمد ابنك. اتفاجئت وقلتله بحب وسعادة: ليه يا حبيبي تتعب نفسك وتتكلف ده انت مش مخلي في نفسنا حاجة! ده أنا كنت فاكراك بتنقيها لشهيرة والله.
قال لي بصوت حنون دافئ: لا دي هدية لكي إنتي يا غالية، تستاهلي كل خير، وحتى شهيرة خليتها تختار لنفسها عباية على ذوقها برضه بنفس الطريقة عشان ميبش في زعل بين حد.
فرحت ورحت بيت أمي، وقعدت مستنية وصول الشنطة بفارغ الصبر.. أول ما وصلت، اتفتحت الشنطة، وكل واحد خد نصيبه. شهيرة طلعت العباية بتاعتها، والعباية بتاعتي اللي مكتوب عليها اسمي بوضوح تام. وفجأة، زي كل مرة وبدون أي إحساس بالذوق، قامت شهيرة خطفت العباية السوداء بتاعتي من قدامي، وقالت ببرود وبجاحة تامة:
بقولك ايه يا سهام، أنا هاخد دي لانها عجبتني وشكلها غالي، وانتي خدي التانية المزخرفة دي وخلاص!
بصيتلها بضيق شديد وقلت: بس يا شهيرة اسمي مكتوب على العباية السوداء دي بالظبط، وأخويا كلمني وقالي إن دي بتاعتي وهو اللي مخترها لي والمره دي بالذات قالي دي لكي إنتي يا سهام!
بصتلي بحدة وقالت باستخفاف: نعم؟! إحنا أصحاب الحاجة وأنا اللي أختار الأول! اخوكي هو اللي بيقولي كده، بيقولي اختاري أنتِ يا شهيرة والباقي بعدك!
قلتلها بنبرة مخنوقة وضيق حاولت أسيطر عليه: بس اسمي عليها أهو قدامك، وأخويا قالي عليها بالخصوص، وأصلًا أنا مش بلبس ألوان زاهية، والتانية دي قال إنك أنتِ اللي اخترتها لنفسك من الصور.
ردت ببرود مقرف: فعلاً أنا اخترتها، بس غيرت رأيى وعايزة أبدل، خدي أنتِ دي وأنا هاخد دي! وزقت في اتجاهي العباية الملونة بعنف.
نفضت إيدي وقلت لها بصرامة: لأ معلش، مش عايزة أبدل، هاتي عبايتي خليني أمشي وأروح بيتي.
هنا ضحكت بصوت عالي وقالت جملة نزلت عليا زي الصاعقة: شحاتة وعينها بجحة! قلت لك أنا صاحبة الحاجة وأنا اللي أختار، ولو عجبتك العباية أوي كده خليه جوزك يجبلك زيها!
اتصدمت من بجاحتها وقسوة كلامها اللي مكنش ليه أي مبرر، وأمي قالت لها بعصبية شديدة: عيب كده يا بنتي، بلاش الكلام ده والألوب طريقتك دي!.
ردت بوقاحة: دي الحقيقة يا حماتي، والكل عارف كده!.
أنا سكت تماماً، وسبت العبايتين قدامها على الترابيزة، وقلت لها بهدوء غريب ومريح لأعصابي: اللي تشوفيه يا شهيرة، مبروكين عليكي، أنا مش عايزه حاجة خالص، ومشيت بهدوء من غير ما أزعق، ومن غير ما أتصل بأخويا أشكي له أو أكدره في سفره، وأنا عارفه كويس جداً إني بسيب الحق لناس تعرف تجيبه صح.
أما شهيرة، فبقت قاعدة في بيت أمي بتتفرج على العبايتين، مبهورة ومبسوطة إنها قدرت تفرض رأيها وتاخد الاتنين لنفسها بطريقتها الاستفزازية. وتاني يوم على العصر كده، وصل عند شهيرة شنطة سودا جديدة ومغلفة بعناية، ومكتوب عليها اسمها هي بالكامل! شهيرة لما شافت الشنطة طارت من الفرحة، وافتكرت إن جوزها بعتلها هدية تانية تصالِحني بيها وتعوضني عن العباية اللي سهام خدتها، وجريت فتحتها بسرعة البرق.. بس أول ما فتحت الشنطة وبصت جوة، اتفاجئت تماماً ومبقاش على وشها أي ابتسامة!
اللي حصل يا سادة إن أمي، ربنا يديها الصحة وطولة العمر، مكنش طايقها الصبر ولا السكوت الحكيم اللي أنا عملته. أول ما مشيت وسيبت العبايتين على الترابيزة وخرجت، أمي جابت آخرها من طريقة وقليلة ذوق شهيرة وبجاحتها المعتادة، خصوصاً لما جابت سيرتي بكلمة وجعت قلب أمي قبل ما توجعني. أمي مسكت تلفونها فوراً وضربت رقم أخويا أحمد في السفر، وفضلت تعيط وتقوله على كل اللي حصل بالحرف الواحد، من غير ما تنقص كلمة ولا تزود حرف، وحكت له إزاي شهيرة خطفت الهدية اللي هو مختارها لي بنفسه، وإزاي هزأتني في بيتها وأهانتني وأنا ساكتة.



