
بصيتله وعيوني دمعت بجد من التعب والضعف وقولت بصوت مرتعش:
“لا يا رحيم.. ده شوية هبوط من كتر التفكير.. أنا حاسة إني تيهت في الدنيا ومبقاش ليا سند.”
زينب بكل طيبة ونقاء قربت مني وقالت لرحيم:
“يا رحيم، سعاد حالتها صعبة أوي، والبيت اللي هي قاعدة فيه لوحدها ده مش أمان.. شوف لها حل، أنت ابن خالها وأقرب حد ليها يقدر يساعدها بنصيحة أو موقف.”
رحيم سكت لحظة، وبص في الأرض بتفكير، وقال بنبرة حنينة وطيبة:
“متقلقيش يا سعاد.. طول ما أنا موجود، مفيش حد هيأذيكي، وأي حاجة تقف معاكي اعتبريني ضهرك وسندك فيها.”
ساعتها حسيت بانتصار وهمي جوه نفسي، مع إن زينب الطيبة هي اللي كانت بتفتحلي الباب بحسن ننية، وهي مش عارفة إن الغيرة اللي جواتي هتبتدي تاكل في استقرار بيتها.
عدا أسبوع، وكنت فعلاً محتاجة مساعدة في البيت عندي، السباكة كانت تعبانة، فرجعت لزينب وطلبت منها وأنا صوتي كله عياط مكتوم:
“الحقيني يا زينب.. أنا مرعوبة وقاعدة في الظلمة والماي قاطعة!”
زينب مكدبتش خبر، وبعتت رحيم يشوفلي حل في مشكلة البيت.
لما فتحت لرحيم، كان ماسك شنطة العدة وعينه في الأرض:
“معلش يا سعاد، زينب قالت لي إن عندك مشكلة، ومينفعش أسيبك في الظروف دي لوحدك.”
دخل وبدا يصلح العطل، وأنا كنت واقفة قريبة، وقلتله بصوت هادي وناعم بيعكس ضعفي:
“أنا مش عارفة من غيركم كنت عملت إيه.. الرجالة اللي عرفتهم قبل كدة استقووا عليا، لكن أنت يا رحيم غيرهم.”
رحيم إيده وقفت ثانية، وقال بنبرة وقورة:
“ده واجبي يا بنت خالي، والرجولة أفعال مش كلام.. وربنا هيعوض صبرك خير.”
قربت خطوة وقلت بكسرة:
“العوض اللي بتمناه.. إني ألاقي حد يحسسني بالأمان اللي زينب عايشاه.”
رفع عينه لثانية وشاف دموعي، ارتبك ونزل عينه بسرعة وقال:
“أنتي ست محترمة يا سعاد، وخلاص، صلحت لك الدنيا.. هسيبك وأمشي.”
تاني الصبح، جه وجاب لي طلبات البيت وقال إن زينب هي اللي بعتها تطمن عليا. مسكت إيده عن قصد وقولت:
“زينب دي طيبة أوي.. بس تفتكر هي مقدرة النعمة اللي فيها معاك؟”
رحيم اتنهد وقال: “زينب أصيلة.. وهي اللي طلبت مني أطمن عليكِ بنفسي.”
بدأت السموم الصغيرة تدخل في كلامي، من غير مؤامرات مدبرة، بس كانت الغيرة بتسوق لساني لوحدها. بقيت ألمح إن الطيبة الزيادة ممكن تضر، وإن البيت محتاج رعاية أكتر. وزينب، على نياتها، بدأت تحس بقلق خفيف لما لاحظت إن رحيم بيفكر في ظروفي كتير، ومرة سألته بقلق عن سبب اهتمامه الزيادة بيا.
رحيم اتخنق من كتر ما حس إن في توتر في البيت، وقال لزينب بعصبية مش معتادة:
“دي بنت خالي وست وحيدة، وأنتِ اللي كنتي بتقوليلي ساعدها! للدرجادي مبقتيش تثقي فيا؟”
ساب البيت وخبط الباب وراه، وطلع خبط عليّا أنا. فتحت وعملت نفسي مش فاهمة حاجة. دخل وحط راسه بين إيديه وقال:
“زينب اتغيرت يا سعاد.. والشك دخل قلبها.”
قربت منه ولمست كَتفه بحنية مبالغ فيها وقولت:
“حقك عليا أنا.. أنا السبب.. لو وجودي بيعمل مشاكل بينكم أنا مستعدة أبعد خالص.”
رفع راسه وقال بصوت مهزوز: “تبعدي تروحي فين؟ أنتِ مالكيش ذنب.”
وهنا، استغليت لحظة ضعفه، ونزلت دمعة حقيقية من كتر حبي السلبي ليه وقولت:
“لو كان عندي راجل زيك.. كنت شلته في عيني.”
في اللحظة دي، رحيم بصلي نظرة طويلة، وحسيت إن الحبل بيتقطع بينه وبين مراته، ومد إيده مسح دمعتي وقال:
“أنتي ست غالية يا سعاد.. والظاهر إنك فعلاً محتاجة حد يرعاكِ.”
الموضوع تطور بسرعة، وبدأت أضغط بطريقة غير مباشرة عن طريق خالي وخالتي، لحد ما حصلت المواجهة الكبيرة. زينب شافت رحيم وهو بيتكلم مع أهله في موضوع جوازه مني، فوقفت مذهولة مصدومة وصسخت بدموع حرقة:
“تتجوز سعاد يا رحيم؟! تجيبها في بيتي؟!”
رحيم انفجر فيها من ضغط الشك والزن الكتير وقال بغضب:
“أيوة! مادام البيت بقى كلو شك وتحقيق، يبقى دور على الراحة برا!”
زينب وقعت على الأرض بتعيط، وأنا وقفت ورا رحيم كأني كسبت المعركة.
الجواز تم بسرعة، وزينب لمت هدومها وراحت لبيت أهلها مكسورة القلب. دخلت شقتي الجديدة كضرة، وكنت بتمثل الست المثالية اللي بتخدم جوزها بكل حب، بس جوة نفسي، كنت لسه ببعث لزينب أخبار مقطوعة عشان أضمن إنها متقربلوش تاني.
في يوم، رحيم رجع وقال بتنهيدة تعب:
“قابلت أخو زينب النهارده.. قالي إنها تعبانة وفي المستشفى ونفسها تشوفني.”
قلت بذكاء مصطنع عشان أبين إني طيبة: “ألف سلامة عليها.. طبعاً لازم تروح.. بس استنى كام يوم وأنا هاجي معاك عشان متفهمش غلط.”
قال بإعجاب: “أنتي أصيلة يا سعاد.. بتفكري في مصلحتها رغم إنها ظلمتك.”
لكن اللي مكنتش أعرفه، إن زينب وأهلها كانوا بيجهزوا لمفاجأة تنهي اللعبة دي كلها. زينب بعتت لي رسالة من رقم غريب: “لو عايزة تقفلي صفحة زينب نهائي، تعالي بكرة الشقة القديمة الساعة 5 العصر ومعايا أوراق تهمك.”
طماعي وعماي خلوني أروح من غير ما أفكر. دخلت الشقة ولقيت زينب واقفة ببرود. ضحكت بغرور وقلت:
“أنا خدت منك كل حاجة يا زينب.. رحيم بقى ليا، وأنتِ خلاص انتهيتي، وأنا اللي عرفت أروضه بضعفي ومسكني!”
فضلت أتباهى بكل كلامي، وإني أنا اللي كنت بسبب التوتر وأني لعبتها صح عشان أخد اللي عيزاه.
وفجأة.. باب الأوضة اتفتح، وطلع منه “رحيم”!
كان واقف وبيغلي من الغضب، وعينه مليانة احتقار وصدمة مخلتنيش قادرة أنطق بحرف واحد. كان سامع كل كلمة اعترفت بيها من أولها لآخرها!
قرب مني وصوته كان زي الرعد في المكان:
“بقى أنتِ يا سعاد؟ الست المكسورة اللي كنت مفكرها مظلومة، طلعتي حية بتخربي بيتي وبتمثلي عليا؟! أنا كنت بظلم مراتي وأم عيالي عشانك أنتِ؟!”
ترعشت وطلعت أتكلم بتلعثم: “يا رحيم.. اسمعني.. دي هي اللي..”
قاطعني بصوت جهوري هز الحوائط:
“اطلعي برا! أنتِ لا تلزميني ولا تشرفيني لحظة واحدة.. أنتِ طالق بالثلاثة، ومش عايز أشوف وشك قدامي تاني طول عمري!”
طلعت أجري من الشقة بجر أذيال الخيبة والذل، خسرت كل حاجة في دقيقة صدق واحدة وانكشاف تام لحقيقتي.
ورحيم لف لزينب اللي كانت واقفة بدموعها، ولسه هيكلمها بندم حقيقي..
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”




