عام

عمليه اختى

زهره الربيع

بعد ما أختي عملت عملية كبيرة في المخ، جوزها رفض تيجي عند أمي لحد ما تخف، فبقيت أروح بيتها أخدمها هناك… بس جوزها مكانش عايزني أروح عنده، واللي قاله لجوزي في وشه صدمني صدمة عمري وحطني في موقف ملوش أي حل!!!!

كان يوم صعب يوم ما أختي الكبيرة عملت العملية الصعبة دي في المخ. بعد فترة طويلة وتعب ملهاش أول من آخر في المستشفى، أخيراً الدكتور كتب لها خروج، لكنه قعد يوصي وينبه علينا ألف مرة:

“الست دي محتاجة راحة تامة، متتحركش كتير، والأهم من كل ده… ميبقاش فيه أي ضغط عصبي ولا زعل، لأن أي توتر ممكن يأثر على صحتها.”

أمي من خوفها عليها قالت لجوزها:

“يا ابني سيبها تيجي تقعد عندي الفترة دي لحد ما تقف على حيلها.”

بس هو رفض وقال:

“مراتي متسيبش بيتها أبداً! إحنا نخدمها برموش عنينا، أمي وأختي قاعدين تحت وموجودين، مش هيقصروا.”

أنا وأختي قلبنا اتقبض لما قال الكلمة دي، لأن أختي ياما شكتلي من حماتها وأخت جوزها، وإنهم مبيحطوش إيدهم في شغل البيت ومبيساعدوهاش.

بس قلنا يمكن… يمكن لما يشوفوها في الظرف ده، وبعد العملية الكبيرة، قلوبهم تحن ويقفوا جنبها.

وراحت أختي بيتها، ومر أول يوم والتاني. وأنا كل ما أكلمها ألاقي صوتها رايح ومش قادرة تتكلم، تقول لي:

“معلش يا سعاد، شوية تعب ويروحوا لحالهم.”

لحد اليوم التالت، لقيت تليفوني بيرن. فتحت الخط لقيت أختي بتبكي بحزن وشهقاتها طالعة بالعافية:

“تعاليلي يا سعاد… تعاليلي حالا… أنا مش قادرة أقوم من السرير، ولا حد بيطلعلي ولا يعملولي لقمة أكل، والعيال بيبكوا وأنا مش عارفة أعمل حاجة، ومش قادرة أغير للصغير!”

ساعتها جريت عليها ورحت لها. دخلت لقيتها مرهقة على السرير، وشها أصفر وحالتها صعبة.

حكتلي والدموع نازلة على خدها إنهم من أول يوم طلعولها شوية شوربة ونزلوا، ومفيش واحدة فيهم عتبت باب شقتها تاني! وهي بالتعب ده كله بتتحامل على نفسها وتقوم تخدم جوزها وعيالها الصغار!

أنا اتضايقت جداً وقلت لها:

“أنا هكلمهم دلوقتي! وهتصل بأمي نيجي نكلم جوزك. لما هما مش قد المسؤولية وجايبينك هنا ليه يسيبوكي كده؟!”

أختي مسكت إيدي وهي بتترجاني والدموع في عينها:

“عشان خاطري يا سعاد، مش عايزة مشاكل… أمي تعبانة وعندها الضغط ولو عرفت هتتعب، وجوزي مش هيريح في الكلام، أنا عرفاه. عشان خاطري بلاش تتعبوني عليا أكثر من كده.”

سألتها بقلة حيلة:

“طب والحل إيه في الوضع ده؟”

قالت لي:

“تعاليلي أنتِ كل يوم، معلش هتعبك معايا… جوزك إنسان كويس ومحترم وأنا متأكدة إنه مش هيمانع.”

قلت لها فوراً:

“ماشي يا ستي، دي بسيطة، أهم حاجة راحتك.”

استأذنت جوزي، ورغم إن واحدة تسيب بيتها كل يوم دي حاجة تضايق أي راجل، لكنه قال لي:

“وماله يا سعاد، دي أختك، ربنا يشفيها ويقومها بالسلامة.”

وبقيت كل يوم من صباحية ربنا أصحى، آخد عيالي أوديهم عند أمي، وأطلع أركب وأروح لشقة أختي.

أراعيها، وأراعي عيالها الصغار، أطبخ، وأغسل، وأكوي، وأروق البيت من أوله لآخره عشان متمدش إيدها في حاجة.

وبدأت أختي فعلاً ترتاح، ووشها يرد، وتتحسن شوية بشوية.

بس المشكلة كانت في جوزها!

الراجل ده كان في إجازة أسبوعين من شغله لأنه مرشد سياحي، وكان قاعد في البيت. طول ما أنا شغالة، داخل خارج ومتضايق، ويقول بصوت عالي يسمعني:

“أمي كانت طالعة تخدم وتعمل، بس لما لقت أختك هنا قالت ملوش لزوم ندخل بين الأخوات!”

كنت أرفع رأسي وأبقى عايزة أرد عليه، بس أختي تمسك إيدي وتقول لي:

“طنشي عشان خاطري… عشان خاطري يا سعاد اسكتي.”

وكنت أبلع كلامي وأسكت، عشان عارفة إن أي ضغط أو زعل ممكن يأثر على صحتها.

لحد ما في يوم دخل الصالة، وبصلي ببرود وقال:

“هو أنتِ معندكيش حاجة تعمليها في بيتك ولا إيه؟ على طول فاضية كده يا سعاد؟”

أنا من كتر الإحراج وشي جاب ألوان ومقدرتش أرد.

أختي اتضايقت وقالت له:

“بتيجي تشوف طلباتي! أنا عاملة عملية كبيرة ومفضية نفسها عشاني!”

قعدت أهدي في أختي وأقول لها:

“حصل خير.”

وأنا جوايا بدعي الأيام تعدي وأختي تقف على حيلها، عشان أقدر أرجع لبيتي وأرتاح.

وصل بيه الحال بعد كده إنه يتعمد يقعد بملابس البيت في الصالة عشان يحرجني وأمشي، أو يتكلم بصوت عالي وهو ماشي في الشقة:

“والله الواحد مش عارف ياخد راحته في بيته ولا يعيش حياته!”

كنت بعدي بالعافية، وأقول عشان خاطر الغلبانة اللي جوة.

لحد ما في يوم جاب آخره…

كنت واقفة في المطبخ بعمل الأكل، وهو دخل على أختي الأوضة، واتعمد يعلي صوته عشان أسمعه:

“هي أختك دي هتفضل طالعة لنا كل يوم كده؟ هي مش وراها بيت ولا راجل؟!”

أختي قالت له بخوف وصوت واطي:

“وطي صوتك، عيب الكلام ده! أنا اللي عايزاها تيجي عشان بحتاجها ومقدرش أستغنى عنها.”

رد عليها بضيق:

“لا، متحتجيهاش! كفاياكي دلع بقى، وقومي شدي طولك بدل ما البيت بقى ساحة! أختك قاعدة هنا وأمك كل يومين تيجي… بقت عيشة صعبة! هو انتي أول واحدة تعمل عملية؟”

أول ما سمعت كلامه ده، كنت طالعة أكلمه والموضوع خلاص وصل لآخره.

بس في اللحظة دي…

الباب خبط بقوة!

راح فتح الباب، ولقى جوزي واقف!

جوز أختي بصله ببرود وقال:

“أهلاً… كملت والله! أنت كمان جاي تقعد ولا إيه؟!”

ساعتها الأرض دارت بيا.

جوزي اتصدم من الطريقة والكلام، وأنا وقفت في المطبخ مسمرة في مكاني، ركبي بتخبط في بعضها وموقف ملوش أي حل.

يا ترى جوزي هيمشي بيا ويمنعني أدخل البيت ده تاني وأسيب أختي للتعب ده؟

ولا هيتخانق معاه وتكبر المشكلة، وأختي هي اللي تدفع الثمن من صحتها؟

وقف جوزي في وش الباب، عينيه بتوسع من الصدمة، وملامح وشه اتغيرت في ثواني من الابتسامة الهادية اللي كان داخل بيها لملامح راجل كرامته اتجرحت.

هو مكانش جاي يتخانق، ده كان معدي عليا وهو راجع من شغله عشان ياخدني وننزل نسأل على الدكتور المتابع لحالة أختي.

بس كلام جوز أختي والطريقة اللي اتكلم بيها كانت صدمة كبيرة.

جوزي بلع ريقه، وصدره بقى يعلى وينزل، وبص لجوز أختي بنظرة كلها ضيق وحزن في نفس الوقت، وقال بصوت واطي لكنه حاسم:

“أنا جاي آخد مراتي يا أستاذ… مراتي اللي سابت بيتها وعيالها وجات تقف جنب أختها اللي كانت محتاجة رعاية، في الوقت اللي بيتها التاني كان المفروض يشيلها!”

جوز أختي اتضايق وقال:

“والله مرتك جت بأمرها، ومحدش طلب منها! وبيتنا عامر بناسه، ومحدش طلب من حد يخدمنا! الراجل منكم ياخد مراته ويقعدها في بيتها، إحنا مش ناقصين زحمة في بيت أهلي!”

في اللحظة دي، أنا كنت واقفة عند باب المطبخ مش قادرة أتحرك، رجليا مش شايلاني، ودموعي نازلة على وشي.

خرجت أختي من الأوضة ببطء شديد، ساندة على الحيطة ووشها شاحب، وعينيها بتترجى كل واحد فينا.

بصتلي وبصت لجوزي وقالت بصوت طالع بالشهقات:

“عشان خاطرك يا أبو العيال… عشان خاطرك يا سعاد، متخربوش بيتي… مسامحاك يا أحمد، أرجوك يا سعاد مت مشيش وتسيبيني… أنا والله مش قادرة من غيرك.”

جوزي بص لأختي ونظرته انكسرت.

الراجل كان فاهم إن أختي لو سابها في اللحظة دي مع الظروف دي، ممكن حالتها الصحية تسوء جداً، وفي نفس الوقت كان شايف إن كرامته اتجرحت قدام شخص مش مقدر للموقف.

جوزي مسك إيدي، وكانت إيده بتترعش من كتر الضيق، وبصلي وقال بصوت قاطع:

“امشي معايا يا سعاد… البسي خمارك وهاتي حاجتك ويلا بينا.”

أنا وقفت محتارة في نص الصالة.

الموقف كان كابوس ملوش أي منفذ.

لو مشيت مع جوزي، أختي ممكن يحصل لها حاجة وهي لسه في فترة التعافي، وساعتها مش هسامح نفسي طول عمري.

ولو رفضت أمشي مع جوزي وقعدت عشان أختي، أنا كده بكسر كلمته وبسيب كرامته قدام شخص أساء له ولينا.

أختي تعبت من كتر الضغط والخوف، وقعدت تبكي وهي ماسكة رأسها:

“دماغي هتتعبني… يا رب فرجها عليا واستريح!”

أول ما أختي حطت إيدها على رأسها ورجلها خانتها، جوز أختي نفسه اتخض ولونه اتغير، لكن التوتر كان مسيطر على الموقف.

جوزي بصلي وبص لأختي وهي على الأرض، ولحظة الشهامة اللي جواه غلبت كل حاجة.

قرب من أختي وساعدها مع جوزها وحطوها على السرير، وبعدين بص لأحمد وقال له بصوت حازم:

“أنا مش هسيب أخت مراتي تتعب عشان إحنا مختلفين! مراتي هتقعد هنا لحد ما تطمن عليها، وأنا مش هعتب البيت ده تاني… بس اعلم يا أحمد، الموضوع بيني وبينك مش هينتهي هنا، واليوم اللي أخت مراتي تقف فيه على حيلها، هتعرف يعني إيه رجولة ويعني إيه أصول!”

جوزي بصلي بصه عمري ما هنسى شكل عينيه فيها.

كانت مزيج من الزعل مني ومن الموقف كله، وقال لي:

“أنا هروح يا سعاد… خليكي مع أختك، ولما تخلصي قوليلي أبعتلك أخوكي ياخدك، رجلي مش هتطأ المكان ده تاني.”

مشي جوزي وقفل الباب وراه، وأنا قعدت جنب سرير أختي أعيط.

الموقف مكانش مجرد خلاف وعدى، الموقف عمل شرخ كبير بيني وبين جوزي، وفي نفس الوقت سابني تحت ضغط كبير في بيت أختي.

مرت الأيام اللي بعد كده ببطء شديد.

كنت بروح لأختي وقلبي مقسوم نصين.

نص مع أختي اللي كانت حالتها النفسية اتأثرت جداً من اللي حصل، وأي صوت عالي كان بيخليها تتوتر من وجع رأسها.

والنص التاني مع جوزي اللي بقى يرجع البيت ساكت، مبيكلمنيش غير على قد السؤال والجواب.

مكانش بيزعقلي، بس سكوته كان أصعب عليا من ملايين الكلمات.

كان حاسس إن كرامته اتأثرت بسبب الموقف، وأنا معرفتش أصلح اللي حصل.

حماتها وأخت جوزها لما عرفوا باللي حصل، بدل ما يحسوا بالذنب، بقوا يطلعوا ويعدوا من قدام الشقة ويقولوا كلام يسمع:

“إيه الناس اللي قاعدة هنا دي؟ ناس معندهاش إحساس! تدخل بيوت الناس من غير ما حد يطلب!”

كنت بتجاهل الكلام، وأدخل المطبخ أعيط في السر عشان أختي متشوفنيش.

كنت بعمل الأكل، وأراعي العيال، وأدي لأختي علاجها في مواعيده، وأول ما يجي الليل ألم حاجتي وأمشي.

أحمد جوز أختي بقى يتجاهلني تماماً، يدخل ويخرج ولا كأني موجودة.

وأوقات يتعمد يجيب أصحابه ويقعدوا في الصالة ويتكلموا بصوت عالي، عشان يضايقني ويضايق أختي اللي محتاجة هدوء تام.

بعد أسبوعين كاملين من التعب ده، جه يوم المتابعة.

اليوم اللي الدكتور هيشوف فيه مكان العملية ويتأكد من التئامه.

أنا اتصلت بأخويا الصغير وقلت له ييجي معايا، عشان يوصلنا للدكتور وعشان أختي متبقاش لوحدها.

دخلنا للدكتور، وبص على مكان العملية وقال:

“الحمد لله، العملية التئمت بشكل ممتاز، وكل شيء ماشي كويس. أهم حاجة الفترة الجاية تبدأ العلاج الطبيعي والتغذية الكويسة، وتبعد تماماً عن أي ضغط عصبي.”

أول ما سمعت الكلمة دي من الدكتور، حسيت إن جبل اتشال من على صدري!

رجعت الشقة مع أختي، ولميت كل طلباتها، ونظفت البيت للمرة الأخيرة، وقعدت جنبها على السرير ومسكت إيدها.

قلت لها بصوت هادي بس مليان وجع:

“يا أختي يا حبيبتي… أنتِ دلوقتي بقيتي كويسة وتقدري تتحركي وتقفي على حيلك شوية بشوية. أنا أديت أمانتي قدام ربنا، ووقفت جنبك في أصعب أيام حياتك… بس لحد هنا ودوري خلص.”

أختي مسكت إيدي وبكت:

“يا سعاد متزعليش من اللي حصل… أنا عارفة إنك استحملتي اللي محدش يستحمله عشاني.”

قلت لها:

“أنا مستخسرتش فيكي وقت ولا مجهود، بس جوزي كرامته اتأثرت يا أختي… وجوزك أساء لنا في بيته، وأنا لو فضلت أدخل البيت ده تاني هبقى بظلم نفسي وبظلم جوزي اللي وقف جنبي وصانك في وقت شدتك.

أنا مش هجي هنا تاني يا أختي، وأي حاجة تحتاجيها أهلك موجودين، أو جوزك يهتم بيكي، وحقك عليا… بس بيتي وجوزي أولى بيا دلوقتي.”

أختي وبكينا إحنا الاتنين بكاء طويل.

السابق1 من 2
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى