
إياد مكنش يتيم!
إياد كان ابن ممدوح من دنيا.. ابنه الحقيقي اللي مخلفه في السر على ضرة وسخة من وقت ما كان أخوه عايش أو بعد ما توفى!
شريط الذكريات كله اتعرض قدامي في ثانية واحدة وبقى واضح وضوح الشمس.
نظرات دنيا ليه في المطعم.. الدلع المايع.. حتة الاستاكوزا اللي كانت بتأكلهاله في بقه قدام أمه.. كلام حماتي وهي بتقول ده راجل العيلة وسيدها.. حماتي كانت عارفة! الحجة تحية كانت عارفة ومغطية على ابنها وراضية بالمهزلة عشان ممدوح كان بيوهمها إنه بيحافظ على عيل الشهاوي اللي هيشيل الاسم، في حين إن مريم بنتي مكانتش عاجباهم عشان مجرد بنت!
ضربة الشوكة على إيد مريم مكنتش قسوة عابرة.. ده كان غل دفين من بنتي اللي شايفها عبء، وعايز يصفي كل حاجة عشان ابنه الحقيقي من حبيبته دنيا!
دموعي نزلت، بس مش دموع ضعف.. دي كانت دموع قهر اتحولت في ثانية لنار بتاكل في عروقي.
طارق.. الفايل ده يتحرز في محضر التفتيش حالاً.
سارة.. إنتي ناوية تعملي إيه؟ ده كده الموضوع بقى جنا ونسب وتزوير في أوراق رسمية وقيد مواليد!
مسحت دموعي بطرف كمي، ووقفت مستقيمة ناوية أروح زيارة لقسم التجمع الأول.. عايزة أبارك للعروسين في حجزهم.
في قسم التجمع الأول، الجو كان خانق، ريحة السجاير الرخيصة وصوت الشاويشية وأهالي المتهمين اللي واقفين في الطابور بكراتين الأكل.
بواسطة طارق وإذن رسمي من النيابة، قعدت في أوضة المأمور، وطلبوا إحضار ممدوح ودنيا من الحجز على انفراد.
دخلت دنيا الأول.
كانت متبهدلة.. الطقم الشيك بقى كله كرمشة وتراب، وشها باهت من غير ميكياج، شعرها منكوش وعينيها منفوخة من كتر العياط والقهر. مكنتش الست المغرورة اللي كانت قاعدة في المرسيدس بتاعتي بتتبغدد.
أول ما شافتني، عيطت وقربت تحاول تبوس إيدي سارة! أبوس رجلك يا سارة، اتنازلي وخرجينا.. أنا ابني في الشارع مع أمه في شبرا، مش متعود على كده، الواد هيموت من غيري!
سحبت إيدي بقرف ابنك؟ ولا ابن ممدوح؟
دنيا اتجمدت مكانها.. الدم هرب من وشها تماماً، لسانها اتشل وعينيها برقت برعب كأنها شافت عزرائيل قدامها.
إنتي… إنتي بتقولي إيه؟
رميت صورة تحليل ال DNA على الترابيزة قدامها بقول الكلام اللي مكتوب هنا يا مدام.. الخزنة اللي في البدروم اتفتحت، وكل وساختكم طلعت على الوش.
دنيا قعدت على الأرض زي الكومة المهدودة، حطت إيديها على وشها وبدأت تشهق من غير صوت، صوت رعب حقيقي متقوليش لحد.. ونبي يا سارة متفضحيش الواد.. ممدوح قالي إنه هيتجوزني رسمي أول ما نسافر اليونان.. قالي مش هسيب ابني يتربى فقير زي ما أنا اتربيت، وقالي إنك بطرانة وبنت أكابر ومش هتحسي بالفلوس اللي هناخدها!
بطرانة؟ الفلوس اللي كبرتكم دي كانت عرق أبويا وتعبي، يا رخيصة. إنتي خنتي أخو جوزك، وخنتي بيتك، وجاية تعملي عليا دور اليتيم والغلبان؟
في اللحظة دي، دخل العسكري ومعه ممدوح مكلبش.
ممدوح كان دبلان، دقنه نبتت وشعره مشعث، والبدلة الكحلي بقت زي خرقة المسح. أول ما شاف دنيا قاعدة في الأرض بتعيط، وشاف الورقة اللي قدامي، فهم كل حاجة من غير ما أنطق.
قعد على الكرسي قصادي، ودماغه متشعلقة في الأرض مقدرش يرفع عينه في عيني.
كنت ناوي تهرب بالفلوس وتسيبني للحبس يا ممدوح؟ سألته بصوت هادي، هدوء ما قبل العاصفة.
ممدوح فضل ساكت، صوابعه اللي مكلبشة كانت بتفرك في بعضها بعصبية.
طب مريم؟ قربت منه وبصيت في ملامحه المكسورة بنتك اللي من صلبك.. اللي أذيتها بالشوكة واستكترت عليها طبق لحمة ب 180 جنيه عشان تدلع ابن الحرام بتاعك.. مريم كان ذنبها إيه؟ كنت هتسيبها هي وأمها يتشردوا ويناموا على البلاط؟
ممدوح رفع راسه، وعينيه كانت مليانة غل وضعف في نفس الوقت مريم بنت! البنات بيتجوزوا ويمشوا، مش هيشيلوا اسمي ولا هيعملوا لشركتي قيمة! أنا كنت عايز ولد.. ولد من صلبي يورثني، وإنتي بعد ما خلفتي مريم الدكاترة قالوا مش هينفع تخلفي تاني! كنتي عايزاني أعمل إيه؟ أموت وحيلي مقطوع ومحيلتيش غير بت تورثها عيلتكم المغرورة؟!
ضحكت.. ضحكت من قلبي لدرجة إن المأمور اللي كان واقف على الباب التفت وبصلي.
عيلتي المغرورة دي هي اللي عملت منك بني آدم.. هي اللي نضفتك من فقر الروح اللي عايش فيه! بس تعرف يا ممدوح؟ إنت غلطان في حاجة واحدة.
بصلي باستغراب وهو بيمسح عرقه بكُم قميصه الوسخ.
مريم بنتي.. هتكبر، وهتاكل أحسن أكل، وهتتعلم في أحسن مدارس برة مصر، وهتبقى سيدة أعمال تشرف بلد بحالها.. وهتشيل اسم السيوفي، لأن اسمك ده أنا همسحه من شهادة ميلادها بحكم إسقاط ولاية وشرف وأبوة بعد الفضايح دي كلها. أما ابنك ده؟ شاورت على دنيا اللي عمالة تلطم فالتحليل ده هيروح للنيابة بكرة. وهيتفتح بيه تحقيق في تزوير شهادة ميلاد وإثبات نسب لغير والده الشرعي.. يعني إياد قانوناً هيتسحب منه اسم أخوك المرحوم، وهيتسجل باسمك في السجن، عشان يبقى ابن رد سجون بجد!
ممدوح صرخ وقام وقف، حاول يهجم عليا وهو مكلبش لا يا سارة! إياد لأ! أرجوكي دمريني أنا بس متدمريش مستقبل الواد! الواد ملوش ذنب!
العساكر مسكوه وكتفوه في ثواني، ورزعوه على الكرسي تاني.
وقفت، وعدلت جاكتي، وبصيتلهم هما الاتنين بنظرة خلتهم يحسوا بصغرهم ووضاعتهم زي ما استكترت على بنتي اللقمة وحرمتها من الهوا عشان ابنك، ربنا حرمك من الدنيا كلها.. خمس سنين بتوع الأموال العامة دول كانوا مقبلات.. قضايا التزوير وإسقاط النسب وخيانة الأمانة الجديدة هتخليك تعجز جوة الزنزانة دي ومش هتخرج منها غير على عكاز.




