
متخافيش يا قلب مامي. قومي معايا، متخافيش من حاجة طول ما أنا جنبك.
حاولت أوقف تاكسي، لكن الشارع في التجمع وقت المطرة كان واقف، العربيات بتعدي تطرطش ومحدش سائل. فتحت أوبر وإيدي كانت بتتحرك بصعوبة من البرد، كل كابتن يوافق يلغي بعدها بدقيقة لما يلاقي الدنيا غرقانة. مريم بدأت تكح، كحة ناشفة ومخنوغة، وحسيت بجسمها بيسخن فجأة بين إيديا، سقعانة من برة وبتغلي من جوة.
مريم؟ حبيبتي.. بتكحي ليه كده؟
البنت حطت إيدها على رقبتها مش قادرة أتنفس يا مامي… زوري بيحرقني… بيقفل.
في اللحظة دي افتكرت.
المنديل!
إياد لما حدف عليها المنديل المليان زفارة ودهن استاكوزا، المنديل كان لازق فيه بقايا قشر الاستاكوزا المهروسة. مريم عندها حساسية مفرطة من القشريات البحرية، حساسية لو شمتها أو لمست شفايفها بتعملها صدمة تحسسية وتقفل الحنجرة. ممدوح عارف الكلام ده كويس.. عارفه وحافظه، بس الغل والجهل عماه لدرجة إنه حتى محاولش يفكر إيه اللي ابن أخوه رماه في وش بنته!
يا نهار أسود.. يا نهار أسود ومنيل!
شيلت مريم على دراعي، وزنها كان تقيل على جسمي المتبهدل، بس الأدرينالين شال جبل. جريت في اتجاه الشارع الرئيسي، المطر بينزل في عيني بيعميني، لغاية ما شفت ميكروباص راكن على جنب السواق بتاعه بينضف المساحات.
جريت عليه وخبطت على الإزاز بإيدي التانية بالله عليك يا أخي! البنت بتموت في إيدي.. وصلني أقرب مستشفى ولك اللي تطلبه!
الراجل بص لمنظري، هدومي كلها طين ووشي متبهدل وشايلة عيلة بتفرفر وشفايفها بدأت تزرق بجد، اتخض ونزل فتح الباب اركبي يا أستاذة بسرعة! اركبي الله يسترها معاكي ومعانا!
طول الطريق لمستشفى الدفاع الجوي، وأنا قاعدة ورا حاضنة مريم، البنت نفسها بقى عامل زي صفارة خشنة، صدرها بيعلى ويهبط بسرعة جنونية، وعينيها بتتقلب لفوق. السواق كسر إشارتين وكان بيضرب كلاكسات كأنه سايق إسعاف، وأنا مش بنطق غير بكلمة واحدة عمالة أكررها بهستيريا يا رب.. يا رب بنتي.. يا رب خده هو واديني هي.. يا رب بنتي متحرمنيش منها.
وصلنا الطوارئ، السواق حتى مرضاش ياخد ولا مليم، قالي ادخلي ببنتك يا أختي، ربنا ينجيها، ده يوم ما يعلم بيه إلا ربنا.
دخلت أصرخ في الاستقبال دكتور! حساسية قشريات.. البنت بتتخنق!
التمريض جرى، نقلوها على ترولي في ثواني، ودخل دكتور شاب ودكتورة تانية.
ضغطها واطي جداً، التشبع بالأكسجين 82، جهزوا أمبول إبينفرين حالاً، وهاتوا كورتيزون وماسك أكسجين 10 لتر!
كنت واقفة على الباب، الممرضة منعتني أدخل. سندت ضهري على الحيطة البيضا الباردة، وبدأت أتسحب لتحت لغاية ما قعدت على السيراميك. بصيت على إيدي، الطين نشف عليها، وهدومي كانت بتنقط مية وسخة على أرضية المستشفى المعقمة. الناس اللي في الطوارئ بيبصوا عليا بقرف وشفقة، فاكريني متسولة مقطوعة جاية من الشارع.
محدش كان يتخيل إن المتسولة دي، هي سارة السيوفي، شريكة في تلت مصانع كابلات، وبنت عيلة السيوفي اللي كانت بتصرف على ممدوح وشركته من تحت لتحت من يوم ما دخل بيتهم بشحتفته وعينيه المكسورة.
طلعت التليفون من جيبي بمعجزة لقيته لسه شغال رغم المية.
لقيت مكالمتين فايتتين من طارق أخويا. ومكالمة من حمايا الله يرحمه في الجنة.. لا، دي كانت رسالة على الواتساب من رقم ممدوح.
فتحت الرسالة وصوابعي بتترعش من القهر إنتي اتجننتي يا سارة؟ إزاي تسبقينا وتنزلي قدام الناس وتصغريني؟ أمي ضغطها علي ودنيا قاعدة بتعيط في الصالون عندي في البيت عشان ابنها حس إنه مكسور ومنبوذ بسبب قلة ذوقك. وعربيتك دي إنتي ملكيش فيها مسمار خلاص، العربية دي داخلة في أصول الشركة اللي بينا، ولو فاكرة إنك هتلوي دراعي بطارق وأهلك، تبقي عبيطة. ارجعي اعتذري لأمي ودنيا وادخلي برجلك اليمين، وإلا والله العظيم ورقة طلاقك هتوصلك على بيت أبوكي ولبسك هيترمي في الشارع.
قريت الرسالة مرة.. واتنين.. وتلاتة.
ضحكت. ضحكت بصوت واطي وسط صوت أجهزة القلب وكلاكسات الإسعاف برة. الضحكة كانت مقسومة نصين نص وجع على السنين اللي ضاعت مع راجل رخيص، ونص غل هيحرق الأخضر واليابس.
دخلت الحمام بتاع المستشفى، غسلت وشي بمية حنفية متلجة، ربطت شعري المبلول لورا، وطلبت رقم طارق.
رد من أول رنة سارة! إنتي فين؟ كلمتك مرتين ماردتيش، ورسالتك بتاعة فحص الملف دي قلقتني.. في إيه؟ مال صوتك؟
طارق.. أنا في طوارئ المستشفى الجوي. مريم جالها انسداد تنفسي بسبب حساسية الاستاكوزا.
طارق صوته اتحول في ثانية من القلق للغضب المرعب إيه؟! إزاي؟! ممدوح فين؟! وأنا جاي حالاً، خمس دقايق وأكون عندك!
استنى يا طارق.. اسمعني الأول.
اسمع إيه وزفت إيه! بنتي وبنت أختي في الطوارئ وعايزاني أسمع؟!
طارق.. قولتلك اسمعني! صوتي طلع حاد لدرجة إنه سكت فجأة. ممدوح مش هنا. ممدوح هو اللي رمى المنديل في وشها بإيد ابن أخوه، وزقني في الطين قدام المطعم وسابنا ومشي بالعربية المرسيدس بتاعتي، واخد معاه أمه ودنيا وابنها.
السماعة سكتت تماماً، مكنش طالع منها غير صوت نَفَس طارق وهو بيتقل وبيغلي. طارق هادي، وطبعه بارد في الشغل، بس لما بيقلب بيبقى بلدوزر مبيقفش.
هو عمل كدة؟ طارق سأل بصوت واطي ومخيف.



